ନୂଆଦିଲ୍ଲୀ,୩୧।୮: ଦେଶର ଆର୍ଥିକ ସ୍ଥିତି ନେଇ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କଡ଼ା ସମାଲୋଚନା କରିଛନ୍ତି। ସେ ଶନିବାର ଟୁଇଟ୍ କରି କହିଛନ୍ତି, ଅଛେ ଦିନ୍ ଆଣିବାର ତୁରୀ ବଜାଉଥିବା ମୋଦି ଏବେ ଦେଶର ଅର୍ଥ ବ୍ୟବସ୍ଥା ଟାୟାର ପଙ୍କଚର୍ କରିଦେଇଛନ୍ତି। ଦେଶର ଜିଡ଼ିପି ହ୍ରାସ ଏହାର ଉଦାହରଣ ଦେଉଛି ବୋଲି ପ୍ରିୟଙ୍କା କହିଛନ୍ତି। ଜିଡ଼ିପି କମିବାରେ ଲାଗିଛି। ସେହିପରି ଟଙ୍କାର ମୂଲ୍ୟ ଧୀରେଧୀରେ ଦୁର୍ବଳ ହେବାରେ ଲାଗିଛି। ଦେଶରେ ଛଟେଇ ଜାରି ରହିବା ସହିତ ନୂତନ ନିଯୁକ୍ତି ହୋଇପାରୁନି। ଫଳରେ ଲୋକଙ୍କ ସ୍ଥିତି ସଙ୍କଟ ଜନକ ହେବାରେ ଲାଗିଛି। ଭାରତୀୟ ରିଜର୍ଭ ବ୍ୟାଙ୍କ ପକ୍ଷରୁ କୁହାଯାଇଛି ଯେ, ୨୦୧୮-୧୯ରେ ୭୨ ୦ଜାର କୋଟି ଟଙ୍କାର ବ୍ୟାଙ୍କ ଦୁର୍ନୀତି ହୋଇଛି। ସେହିପରି ଗତ ୫ ବର୍ଷ ମଧ୍ୟରେ ଜିଡ଼ିପିରେ ସର୍ବାଧିକ ହ୍ରାସ ହୋଇ ଏହା ୫.୮ ପ୍ରତିଶତରୁ ୫ ପ୍ରତିଶତରେ ପହଞ୍ଚିଛି। ଗତବର୍ଷ ଦେଶର ବିକାଶ ହାର ୮.୨ ପ୍ରତିଶତ ଥିଲା ତେବେ ୨୦୧୯-୨୦ର ପ୍ରଥମ ତ୍ରୟମାସରେ ଏହା ୫ ପ୍ରତିଶତରେ ପହଞ୍ଚିଛି। ଦେଶର ଏଭଳି ସ୍ଥିତି ନେଇ ପ୍ରିୟଙ୍କା କ୍ଷୋଭ ପ୍ରକାଶ କରିଛନ୍ତି।