ବଡବିଲ,୧୭।୬(ସ୍ବ.ପ୍ର.)-କେନ୍ଦୁଝର ଜିଲା ଯୋଡା ଥାନା କଣ୍ଡରା ଗ୍ରାମର ଜଣେ ଯୁବକ ଏକ ଅଜଗର ସାପକୁ ମାରି କାନ୍ଧରେ ପକାଇ ବୁଲିବା ତାଙ୍କୁ ମହଙ୍ଗା ପଡିଛି। ସମ୍ପୃକ୍ତ ଯୁବକଙ୍କୁ ବନବିଭାଗ କର୍ମଚାରୀ ଗିରଫ କରି ବୁଧବାର କୋର୍ଟଚାଲାଣ କରିଛି। ସେ ହେଲେ ବୁଧୁରାମ ମୁଣ୍ଡା।
ସୂଚନାଅନୁଯାୟୀ, ବୁଧୁରାମ ମଙ୍ଗଳବାର ପୂର୍ବାହ୍ନରେ ନିକଟସ୍ଥ ଜଙ୍ଗଲରେ ବୁଲୁଥିବାବେଳେ ଏକ ଅଜଗର ଦେଖିବାକୁ ପାଇଥିଲେ। ପରେ ଅଜଗରଟିକୁ ମାରି ନିଜ କାନ୍ଧରେ ପକାଇ ୫୨୦ ନମ୍ବର ଜାତୀୟ ରାଜପଥରେ ବୁଲୁଥିବାବେଳେ ବନବିଭାଗ କର୍ମଚାରୀମାନେ ଖବର ପାଇଥିଲେ। ଏ ନେଇ ବନବିଭାଗ ପକ୍ଷରୁ ଓଆର ୨ ବିଏଲରେ ବନ୍ୟଜନ୍ତୁ ସଂରକ୍ଷଣ ଆଇନ ଅନୁଯାୟୀ ଏକ ମାମଲା ରୁଜୁ ହୋଇଥିଲା। ଅଜଗରଟିର ଲମ୍ବ ପ୍ରାୟ ୧୦ ଫୁଟ୍ ହେବ ବୋଲି ଜଣାପଡିଛି।