ଢେଙ୍କାନାଳ ଅଫିସ, ୨୯।୮: ଦୁଃଖ ଆସେ ସାଙ୍ଗସାଥୀକୁ ନେଇ। ଏହାକୁ ମର୍ମେ ମର୍ମେ ଅନୁଭବ କରିଛନ୍ତି ଢେଙ୍କାନାଳର ପ୍ରିୟବ୍ରତ ସାମଲ (୨୪)। ସହରର ଏକ ଆପାର୍ଟମେଣ୍ଟରେ ସୁରକ୍ଷା କର୍ମୀ ଭାବେ କାର୍ଯ୍ୟ କରୁଥିବା ପ୍ରିୟବ୍ରତ ସୁଠାମ ଶରୀରର ଅଧିକାରୀ। ହେଲେ ଦେଢ଼ମାସ ହେଲା ସବୁକିଛି ଯେମିତି ଓଲଟପାଲଟ ହୋଇଯାଇଛି। କୌଣସି ଏକ ଅଜଣା ରୋଗରେ ଉଭୟ ଶ୍ରବଣ ଏବଂ ଦୃଷ୍ଟିଶକ୍ତି ହରାଇଛନ୍ତି ସେ। ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି ଶଯ୍ୟାଶାୟୀ ହୋଇଯିବା ପରେ ତାଙ୍କ ଆରୋଗ୍ୟ ନେଇ ସନ୍ଦିହାନ ହୋଇପଡ଼ିଥିଲେ ବାପା। ଏପରି ଦୁର୍ଦ୍ଦିନ ସମୟରେ ପରିବାର ସଦସ୍ୟ ସବୁ ଆଶା ଛାଡ଼ି ଦେଇଥିବାବେଳେ ପ୍ରିୟବ୍ରତଙ୍କ ପାଖରେ ସାହାରା ହୋଇ ଛିଡ଼ା ହୋଇଛନ୍ତି ସାଙ୍ଗସାଥୀ। ତାଙ୍କୁ ଚିକିତ୍ସା କରାଇ ଭଲ କରିବାକୁ ସେମାନେ ଅଣ୍ଟା ଭିଡ଼ିଛନ୍ତି। ଏହାପରେ ପ୍ରିୟବ୍ରତଙ୍କ ଓଠରେ ଉକୁଟିଛି ଚେନାଏ ହସ।
ଢେଙ୍କାନାଳ ସହର ଚାନ୍ଦମାରି ଅଞ୍ଚଳରେ ରୁହନ୍ତି ପ୍ରିୟବ୍ରତଙ୍କ ପରିବାର। ବାପା ଗଗନ ସାମଲ ଏକ ଶିକ୍ଷାନୁଷ୍ଠାନ ହଷ୍ଟେଲରେ ରୋଷେୟା ଭାବେ କାର୍ଯ୍ୟ କରୁଛନ୍ତି। ମା’ ମାନସିକ ରୋଗୀ। ପ୍ରିୟବ୍ରତଙ୍କ ରୋଜଗାର ଟଙ୍କାରେ ପରିବାର ଚଳେ। ସୁରକ୍ଷାକର୍ମୀ ଭାବେ କାର୍ଯ୍ୟ କରୁଥିବାରୁ ପ୍ରିୟବ୍ରତ ସବୁଦିନ ଜିମ୍ ଯାଇ ଶରୀରକୁ ଫିଟ୍ ରଖୁଥିଲେ। ଦେଢ଼ମାସ ତଳେ ତାଙ୍କୁ ହଠାତ୍ କୌଣସି ଅଜଣା ରୋଗ ମାଡ଼ିବସିଲା। ଫଳରେ ସେ ଦୃଷ୍ଟିଶକ୍ତି ଏବଂ ଶ୍ରବଣଶକ୍ତି ହରାଇ ବସିଛନ୍ତି। ଏହାପରଠୁ ସେ ଘରେ ଶଯ୍ୟାଶାୟୀ ଅବସ୍ଥାରେ ଅଛନ୍ତି। ଦୀର୍ଘଦିନ ଧରି ଜିମ୍କୁ ନ ଆସିବାରୁ ତାଙ୍କର ସାଙ୍ଗସାଥୀ ଚିନ୍ତାଗ୍ରସ୍ତ ହୋଇପଡ଼ିଲେ। ଖବର ନେବାରୁ ସବୁକଥା ଜଣାପଡ଼ିଲା। ଅସହାୟ ବ୍ୟକ୍ତିଙ୍କୁ ସହାୟତା କରିବାକୁ ସାଙ୍ଗସାଥୀମାନେ ‘ହେଲ୍ପିଂ ହ୍ୟାଣ୍ଡ’ ସଂସ୍ଥା ଗଠନ କରିଥିବାବେଳେ ଏହା ହିଁ କାମରେ ଆସିଥିଲା। ସେମାନେ ପ୍ରିୟବ୍ରତଙ୍କୁ କଟକ ବଡ଼ ମେଡ଼ିକାଲ ନେଇଯାଇଥିଲେ। ପରୀକ୍ଷା ନିରୀକ୍ଷା ପରେ ସେଠାକାର ଡାକ୍ତର ଭୁବନେଶ୍ୱରସ୍ଥିତ ଏକ ଘରୋଇ ଚକ୍ଷୁ ଚିକିତ୍ସାଳୟରେ ପରୀକ୍ଷା କରିବାକୁ ପରାମର୍ଶ ଦେଇଥିଲେ। ହେଲେ ଏଥିରେ ଅର୍ଥ ସାଜିଲା ପ୍ରତିବନ୍ଧକ। ଏହି ସମୟରେ ସହରବାସୀଙ୍କ ସାହାଯ୍ୟ ଲୋଡ଼ାଯାଇଥିଲା। ପ୍ରିୟବ୍ରତଙ୍କ ଏପରି ଅସମୟରେ ବିଭିନ୍ନ ଆଡ଼ୁ ସହାୟତା ମିଳିଛି। ବୁଧବାର ପ୍ରିୟବ୍ରତ ନିଜ ମାମୁଙ୍କ ସହ ଜିଲାପାଳ ଭୂମେଶ ଚନ୍ଦ୍ର ବେହେରାଙ୍କ ଦ୍ୱାରସ୍ଥ ହୋଇଥିଲେ। ଏହାପରେ ଜିଲା ପ୍ରଶାସନ ପକ୍ଷରୁ ତାଙ୍କୁ ରେଡ୍କ୍ରସ୍ ପାଣ୍ଠିରୁ ସହାୟତା ପ୍ରଦାନ କରାଯାଇଛି। ଅଧିକ ଚିକିତ୍ସା ଲାଗି ସମସ୍ତ ପ୍ରକାର ସହଯୋଗ କରାଯିବ ବୋଲି ଜିଲାପାଳ ନିର୍ଭର ପ୍ରତିଶ୍ରୁତି ଦେଇଛନ୍ତି। ସେହିପରି ବିଧାୟକ ସୁଧୀର କୁମାର ସାମଲ ମଧ୍ୟ ସହାୟତା ପ୍ରଦାନ କରିଛନ୍ତି। ‘ହେଲ୍ପିଂ ହ୍ୟାଣ୍ଡ’ ସଦସ୍ୟ ଷ୍ଟାଲିନ ମହାନ୍ତି, ଭବସାଗର ମହାପାତ୍ର ପ୍ରମୁଖ ପ୍ରିୟବ୍ରତଙ୍କ ଚିକିତ୍ସା ଲାଗି ସହାୟତା ସଂଗ୍ରହ କରୁଥିବା କହିଛନ୍ତି।