ନୂଆପଡା ଅଫିସ/କୋମନା,୭।୯(ଡି.ଏନ.ଏ.)
ନୂଆପଡା ଜିଲା କୋମନା ବ୍ଲକ ଅନ୍ତର୍ଗତ ଟିକ୍ରାପଡା ଗାଁରେ ଏକ ଅଜଣା ରୋଗରେ ୨୫ରୁ ଊର୍ଦ୍ଧ୍ୱ ଲୋକ ଆକ୍ରାନ୍ତ ହୋଇଥିବା ଖବର ମିଳିଛି । ଗତ ନୂଆଁଖାଇ ସମୟରେ ଲୋକେ ଏଥିରେ ଆକ୍ରାନ୍ତ ହୋଇଥିବାରୁ ନୂଆଁଖାଇରୁ ମଧ୍ୟ ବଞ୍ଚତ୍ତ ରହିଥିବା ଜଣାପଡ଼ିଛି। ଖବର ଅନୁଯାୟୀ ଟିକ୍ରାପଡାର ମକଡଦମ ପଡାର ଭୋଲା ସଗରିଆ (୩୦), ହେମକାନ୍ତି ସଗରିଆ (୨୫), ସୁନାଧର ସବରିଆ (୫୫), ପ୍ରିତି ସଗରିଆ (୫), ରିଙ୍କୁ ବୌକ (୩୩), ଅମ୍ରିତା ବୌକ (୬୦), ନମିତା ବୌକ (୩୮), କଲ୍ୟାଣି ବୌକ (୪୦), ଲୀଲାବତୀ ହଂସ(୩୫), ଲିପୁ ବେହେରା (୩୪), ଗଉରି ବେହେରା (୨୬), ସବିତା ଦଲପତି (୬୨), ମକାରାଉ ଦଲପତି (୪୨), ସୌମ୍ୟ ଦଲପତି (୧୭), ନିନି ଦଲପତି (୩୮), ବୈଷ୍ଣବ ହଂସ (୪୫) ପ୍ରମୁଖ ଆକ୍ରାନ୍ତ ହୋଇଛନ୍ତି । ସେମାନେ ବିଭିନ୍ନ ପ୍ରକାର ଘରୋଇ ଚିକିତ୍ସା କରୁଥିଲେ ମଧ୍ୟ ଠିକ ହେଉ ନ ଥିବା ଗ୍ରାମବାସୀ କହିଛନ୍ତି । ଏହା ଏକ ଅଜଣା ଜ୍ୱର ବୋଲି କୁହାଯାଉଛି । ଏହା ଉପରେ ଜିଲା ସ୍ବାସ୍ଥ୍ୟ ବିଭାଗ ତୁରନ୍ତ ହସ୍ତକ୍ଷେପ କରି ଚିକିତ୍ସା ବ୍ୟବସ୍ଥା କରିବାକୁ ଦାବି ହେଉଛି।