ଖପ୍ରାଖୋଲ, ୧୩।୩ (ଡି.ଏନ୍.ଏ.)- ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଭାନପୁର ପଁଚେତ୍ ତୁର୍ଲା ଗଁାର ବୁଡୁ ଛତର(୭୧)କଁର ମାଏକିନା ଫୁଲ ଛତର(୬୦)। ସେ ଅନେକ ଦିନ ହେଲା କେହେନ୍ସି ଗୁଟେ ଅଜନା ରୋଗ୍ରେ ପୀଡ଼ିତ ଅଛନ୍। ବୁଡୁ ଧାରଉଧାର କରି ଆସରପାସର ଡାକ୍ତରଖାନାରେ ଫୁଲକଁର ଚିକିଛା କରେଇ ନିରାଶ ହେଇଛନ୍। ଏହେଦେ ଟଁକା ପଏସା ଅଭାବୁ ଫୁଲର ଚିକିଛା କରେଇ ନାଇଁ ପାରବାର। ସେନ୍ତା ଦମ୍ପତି ଅନେକ ପରକାର ସରକାରୀ ଯୋଜନାରୁ ବି ବଁଚିତ୍ ଥିବାର ଅଭିଯୋଗ କରିଛନ୍।
ସୂଚନା ଅନ୍ସାରେ ବୁଡ଼ୁ ଛତରକଁର ପରିବାର କହେଲେ ମାଏକିନା ଫୁଲ ଗୁଟେ ପୁଓ, ଗୁଟେ ଝି’କେ ନେଇ ସଁସାର। ପରିବାରଟା ନିହାତି ଗରିବ୍, ସଁପତି ବଲି କିଛି ନାଇଁ। ବୁଡୁ ଦୁଖ୍ସୁଖ କରି ପୁଓକେ ବିହାଚୁରା କରିଛନ୍। ପୁଓ ବିହାଚୁରା ଉତାରୁ ନିଜର କୁଟୁମ ଧରି ଅଲଗେ ରହୁଛନ୍। ଏହେଦେ ଘରେ ବୁରୁଧ୍ ଦମ୍ପତି ସଂଗେ ଅବିହାରି ଝି’ ରହିଛନ୍। ପରିବାରଟା ମୂଲ ଦିନୁ କୁଲିମଜୁରି କରି ଚଲୁଥିଲାବେଲେ ଆଏଜ୍କେ ୫ ବଛର ହେଲା ଫୁଲ କେହେନ୍ସି ଗୁଟେ ଅଜନା ରୋଗ୍ରେ ଖଟେ ପଡ଼ି ରହିଛନ୍। ଚାଲିବୁଲି ନାଇଁ ପାରବାର। ବୁଡୁ ଧାରଉଧାର କରି ଫୁଲକୁଁ ଆସରପାସର ଡାକ୍ତରଖାନାରେ ଚିକିଛା କରେଇ ନିରାଶ ହେଇଛନ୍। ଏହେଦେ ଟଁକା ପଏସା ଅଭାବୁ ସେ ତାକର ଚିକିଛା କରେଇ ନାଇଁପରୁଥିବାର କହିଛନ୍। ସେନ୍ତା ପରିବାରରେ ୩ ଝନ୍ ରହିଥିଲାବେଲେ ଜାତୀୟ ଖାଏଦ୍ ସୁରକ୍ଷା ଯୋଜନାରେ ରାଶନକାର୍ଡ ପାଏବାରୁ ବଁଚିତ୍ ହେଇଛନ୍। ହେଲେ ପଁଚେତ୍ କତୁରପକ୍ଷ ପରିବାରକେ ଅନ୍ନପୂର୍ଣ୍ଣା ଯୋଜନାରେ ମାସିକ ମାହାଲିଆ ୧୦ କେ.ଜି. ଚାଉଲ ଯୁଗେଇ ଦେଉଛନ୍। ସେନ୍ତା ଫୁଲକଁର ଭିନ୍ନକ୍ଷମ ପରମାନପତର ଥିଲାବେଲେ ବୁଡୁକଁର ବଏସ୍ ୭୦ ଟପି ଯାଇଛେ। ହେଲେ ଆଏଜ୍ ବି ବୁରୁଧ୍ ଦମ୍ପତି ଭତାରୁ ବଁଚିତ୍ ହେଇ ରହିଛନ୍। ଫୁଲ ରୋଗ୍ ପରଭାବରେ ଚାଲିବୁଲି ନାଇଁ ପାରବାର ଲାଗି ବୁଡୁ ତାହାକୁ ରଁାଧିବାଢ଼ି ଖାଏବାକେ ଦେଉଛନ୍। ଅବିହାରି ଝି’ ପରହର କୁଲିମଜୁରି କରି ଦୁଇ ପଏସା ଆନ୍ଲେ ଘରର ତେଲନୁନ୍ ଚଲୁଛେ। ଏନ୍ତାଥି ଫୁଲକଁର ଚିକିଛା କଥା କିଏ ପଚାରେ ବଲି ବୁଡୁ କହିଛନ୍। ଇ ଦିଗେ ଜିଲା ଆର ଥାନୀଅ ପରଶାସନ ଦୁରୁଷ୍ଟି ଦେଇ ବୁରୁଧ୍ ଦମ୍ପତିକୁଁ ଭତା ଆର ଫୁଲକୁଁ ଚିକିଛା ସାହାଯ୍ ଯୁଗେଇ ଦେବାକେ ଗଁାବାସୀ ଦାବି କରିଛନ୍।