ହାତର ସୌନ୍ଦର୍ଯ୍ୟ ବୃଦ୍ଧି କରିବାରେ ମୁଦିର ବି ଅନେକ ଭୂମିକା ରହିଛି। ହେଲେ ଏଠାରେ ଯେଉଁ ମୁଦିଗୁଡ଼ିକ କଥା କୁହାଯାଉଛି, ତାହା ହୁଏତ କାହାକୁ ପସନ୍ଦ ଆସିପାରେ କିମ୍ବା ନ ଆସିପାରେ ଅଥବା ଏହା ହାତର ସୌନ୍ଦର୍ଯ୍ୟ ବୃଦ୍ଧି ନ କରିପାରେ, ହେଲେ ତା’ର ଅଜବ ଗଠନ ଶୈଳୀକୁ ଦେଖିଲେ ଯେ କେହି ବି ତାକୁ ଘଡ଼ିଏ ଚାହିଁ ରହିବେ…
ମାଉସ୍ ରିଂ: ଚୁଇଁ ଚୁଇଁ ମୂଷା ଛୁଆ ଆକୃତିର ହୋଇଥିବା ଏହି ମୁଦିକୁ ହାତରେ ପିନ୍ଧିବାକୁ ହୁଏତ କେହି ପସନ୍ଦ ନ କରିପାରନ୍ତି, ହେଲେ ଏହା ଦେଖିବାକୁ ଭାରି କ୍ୟୁଟ୍ ଲାଗିଥାଏ। ମାର୍କେଟ୍ରେ ଏବେ ସୁନା ହେଉ କିମ୍ବା ରୁପା ଏପରିକି ଇମିଟେଶନ୍ରେ ମଧ୍ୟ ମାଉସ୍ ଡିଜାଇନ୍ର ରିଂ ମିଳୁଥିବା ଦେଖିବାକୁ ମିଳୁଛି।
ରିୟଲ ଫ୍ଲାଓ୍ବାର ରିଂ: ଏହି ମୁଦିଗୁଡ଼ିକୁ ଏପରି ଡିଜାଇନ୍ କରାଯାଇଛି ଯେ, ଲାଗିବ ସତେ ଯେମିତି ଏହି ମୁଦି ଭିତରେ ସତ ସତିକା ଫୁଲ ରହିଛି। ହେଲେ ପ୍ରକୃତରେ ତାହା ସେୟା ନୁହେଁ ଯାହା ଦେଖାଯାଏ। ତଥାପି ବି ଏହା ଫ୍ଲାଓ୍ବାର୍ ଡିଜାଇନ୍ର ହୋଇଥିବାରୁ ଅନେକଙ୍କ ଦୃଷ୍ଟି ଆକର୍ଷଣ କରିଥାଏ।
ସ୍କ୍ରାବଲ୍ ରିଂ: ଏହି ମୁଦିରେ ଚାରି ଧାଡି ହୋଇ ଇଂଲିଶ ଅକ୍ଷର ‘ଏ ଠାରୁ ଜେଡ୍’ ଯାଏଁ ଲେଖା ହୋଇଥାଏ। ଆଉ ସେହି ଚାରି ଧାଡିର ଅକ୍ଷରକୁ ରୋଟେଟିଂ କରି ନିଜ ପସନ୍ଦର କୌଣସି ଶବ୍ଦ ଏହି ମୁଦି ଉପରେ ଲେଖିହୁଏ। ଖାସ୍କରି ପ୍ରେମକଟିଏ ନିଜ ପ୍ରେମିକାକୁ ଇମ୍ପ୍ରେସ୍ କରିବା ପାଇଁ ଏହି ମୁଦିରେ ଲଭ୍ କିମ୍ବା କିସ୍ ଭଳି ଶବ୍ଦ ଲେଖିବାର ଷ୍ଟାଇଲ୍ ଏବେ ଖୁବ୍ ଚାଲିଛି।
ନଟ୍ ଆଣ୍ଡ ବୋଲ୍ଟ ଓ୍ବେଡିଂ ରିଂ: ଆଜିକାର ଯୁବପିଢ଼ିମାନେ ଏନ୍ଗେଜ୍ମେଣ୍ଟ କିମ୍ବା ବିବାହ ସମୟରେ ଥିମ୍ ବାଲା ଓ୍ବେଡିଂ ରିଂ ପିନ୍ଧିବାକୁ ପସନ୍ଦ କରୁଥିବା ଦେଖିବାକୁ ମିଳୁଛି। ସେମିତି ଏକ ଥିମ୍ ହେଉଛି ନଟ୍ ଆଣ୍ଡ ବୋଲ୍ଟ ଓ୍ବେଡିଂ ରିଂ। ନଟ୍ ସହ ବୋଲ୍ଟକୁ ଫିଟିଂ କଲେ ତାହା ଯେମିତି ଷ୍ଟ୍ରଙ୍ଗ୍ ହୋଇ ରହିଥାଏ, ଠିକ୍ ସେମିତି ଏହି ଥିମ୍ ବାଲା ଓ୍ବେଡିଂ ରିଂ ପିନ୍ଧିଲେ ସମ୍ପର୍କ ଦୃଢ ହୋଇଥାଏ ବୋଲି ଅନେକଙ୍କ ଧାରଣା ରହିଛି।
ଓ୍ବିଣ୍ଟର ଇନ୍ ପାରିସ୍ ରିଂ: ଶୀତଦିନେ ପାରିସ୍ ବୁଲିଗଲେ ଯେମିତି ତୁଷାରପାତର ନଜିର ଦେଖିବାକୁ ମିଳେ, ଠିକ୍ ସେହି ଥିମ୍ରେ ଏହି ମୁଦିଟିକୁ ତିଆରି କରାଯାଇଥାଏ। ଏହି ମୁଦିକୁ ଦେଖିଲେ ହିଁ ଯେ କେହି ବୁଝିଯିବେ ଶୀତଦିନେ ପାରିସ୍ର ପାଣିପାଗ କେମିତି ରହିଥିବ।
ଡାଇମଣ୍ଡ ରିଂ ଇନ୍ ଏ ବକ୍ସ: ଯଦି କୌଣସି ପ୍ରେମିକ ତାଙ୍କ ପ୍ରେମିକାଙ୍କୁ ସରପ୍ରାଇଜ୍ ଗିଫ୍ଟ ଦେବାକୁ ଚାହୁଁଥାନ୍ତି, ତା’ହେଲେ ତାଙ୍କ ପାଇଁ ଏହି ମୁଦିଟି ଗୋଟେ ଭଲ ଅପ୍ସନ ହୋଇପାରିବ। କାରଣ ଏହି ମୁଦିକୁ ଏମିତି ଡିଜାଇନ୍ କରାଯାଇଛି ଯେ, ଯାହା ଦେଖିବାକୁ ଗୋଟିଏ ସାଧାରଣ ମୁଦି ପରି ଲାଗିଥାଏ। ହେଲେ ସେହି ମୁଦିରେ ଲାଗିଥିବା ଛୋଟ ବକ୍ସ ଆକୃତିର ଖୋଳକୁ ଖୋଲିଲେ ତାହା ଭିତରେ ଏକ ସୁନ୍ଦର ଡାଇମଣ୍ଡ ଉକ୍ତ ମୁଦି ସହ ଜଏଣ୍ଟ ହୋଇ ରହିଥିବା ଦେଖିବାକୁ ମିଳିଥାଏ।
ଟି-ପାର୍ଟି ରିଂ: ଚା’କୁ କପ୍ରେ ଢାଳିକି ପିଇବାର ଷ୍ଟାଇଲ୍କୁ ନେଇ ଏହି ମୁଦିଟି ତିଆରି ହୋଇଛି। ଚା’ ପିଇବାକୁ ପସନ୍ଦ କରୁଥିବା ମହିଳାଙ୍କୁ ଦେବା ପାଇଁ ଏହା ଏକ ସୁନ୍ଦର ଗିଫ୍ଟର କାମ କରିଥାଏ।
ସୁଇଟ୍ସ ଫର୍ ମାଇଁ ସୁଇଟ୍: ଏହି ରିଂ ବା ମୁଦି ଟିକେ ଭିନ୍ନ ଧରଣର ହୋଇଥାଏ। ଖାସ୍ କରି ବିଭିନ୍ନ ପ୍ରକାରର ଚକୋଲେଟ୍ କିମ୍ବା ସୁଇଟ୍ସର ଥିମ୍ରେ ତିଆରି ହୋଇଥାଏ ଏହି ରିଂ। ଯାହା ମିଠା ପ୍ରିୟ ଗର୍ଲଫ୍ରେଣ୍ଡ କିମ୍ବା ପତ୍ନୀକୁ ଦେବା ପାଇଁ ଏକ ଇନୋଭେଟିଭ୍ ଗିଫ୍ଟର କାମ କରିଥାଏ।
ଚଢେଇ ବସା ରିଂ: ଚଢେଇବସାରେ ଚଢେଇର ଅଣ୍ଡା ଥୁଆ ହୋଇଥିଲେ ଯେମିତି ଦେଖାଯାଏ ଠିକ୍ ସେହି ଥିମ୍ରେ ଏହି ମୁଦିକୁ ତିଆରି କରାଯାଇଥାଏ।
ବଟଲ୍ର କ୍ୟାପ୍ ଖୋଲୁଥିବା ରିଂ: ଏହି ମୁଦି ଟୁ-ଇନ୍-ଓ୍ବାନ୍ର କାମ କରିଥାଏ। ଏହାକୁ ଆଙ୍ଗୁଠିରେ ପିନ୍ଧି ହାତକୁ ନିଆରା ଲୁକ୍ ଦେବା ସହିତ ବଟଲ୍ର କ୍ୟାପ୍ ଖୋଲିବାରେ ବି ବ୍ୟବହାର କରିହୁଏ।