ପୁରୀ ଅଫିସ,୧୯ା୬: ଚଳିତବର୍ଷ ରଥଯାତ୍ରା ବନ୍ଦ ରହିବ ବୋଲି ସୁପ୍ରିମ୍କୋର୍ଟ ରାୟ ଶୁଣାଇଛନ୍ତି। ହେଲେ ଏହି ରାୟ ପରେ ବିଭିନ୍ନ ମହଲରେ କ୍ଷୋଭ ସୃଷ୍ଟି ହୋଇଛି । ବଡ଼ଦାଣ୍ଡରେ ଗଡ଼ିବନି ମହାପ୍ରଭୁଙ୍କ ରଥ ଏହାକୁ କେହି ଗ୍ରହଣ କରିପାରୁ ନାହାନ୍ତି । ତଥାପି ଏଭଳି ନିଷ୍ପତ୍ତି ପରେ ବି ରଥଖଳାରେ ଅଟକି ଯାଇ ନ ଥିଲା ରଥ କାମ। ଅଳ୍ପକିଛି ଯାହା କାମ ବାକି ରହିଥିଲା ତାହାକୁ ରଥ ନିର୍ମାଣ ସମ୍ପୃକ୍ତ ସେବକ ଜାରି ରଖିଥିବା ଦେଖିବାକୁ ମିଳିଥିଲା । ଶୁକ୍ରବାର ତିନିରଥର ପ୍ରଭା ଉଠିଥିବା ବେଳେ ପ୍ରତି ରଥର ଘୋଡାଗୁଡ଼ିଙ୍କୁ ରଙ୍ଗ ଦିଆଯାଇଥିଲା। ସେହିଭଳି ଶନିବାର ତିନି ରଥର ଦୁଆରବେଢ଼ାରେ କପଡ଼ା ପକାଯାଉଛି।
ଅପରପକ୍ଷେ ରଥଯାତ୍ରା ବନ୍ଦ ନିଷ୍ପତ୍ତିକୁ ନେଇ କୋହ ସମ୍ଭାଳି ପାରି ନ ଥିଲେ ମହାରଣା ସେବକ । ତାଳଧ୍ୱଜ ରଥର ମୁଖ୍ୟ ମହାରଣା ସେବକ ନରସିଂହ ମହାପାତ୍ର କାନ୍ଦି ପକାଉଥିବା ଦେଖିବାକୁ ମିଳିଥିଲା। ତେବେ କୌଣସି ଅଘଟଣ ଆଶଙ୍କା କରି ଶୁକ୍ରବାର ଶ୍ରୀମନ୍ଦିର ପୋଲିସ କାର୍ଯ୍ୟାଳୟକୁ ଜଗି ରହିଥିଲା। ଅଶ୍ୱକୁ ରଙ୍ଗ ଦେଉଥିବା ଚିତ୍ରକର ସେବକ ଚନ୍ଦ୍ରଶେଖର ମହାରଣା କହିଥିଲେ, ସଂସାର ରଥକୁ ମହାପ୍ରଭୁ ଆଗକୁ ବଢାଉଛନ୍ତି । କେତେବେଳ କଣ ହୋଇଯିବ ଆମେ ଜାଣିପାରିବା ନାହିଁ । ମହାପ୍ରଭୁ ଚାହିଁଲେ ସବୁ କିଛି ଓଲଟପାଲଟ ହୋଇଯିବ । ସେମିତି ବିଶ୍ୱାସ ବି ରହିଛି ।
