କୋରାପୁଟ,୨୩।୬(ଅମିତାଭ ବେହେରା): କୋରାପୁଟ ଶାବର ଶ୍ରୀକ୍ଷେତ୍ରରେ ଅସୁସ୍ଥ ତିନିଠାକୁର ଏବେ ଅଣସର ଘରେ ଅଛନ୍ତି। ଶବର ତଥା ଆଦିବାସୀ ବଇଦଙ୍କ ପାରମ୍ପରିକ ପଦ୍ଧତିରେ ଚାଲିଛି ଠାକୁରଙ୍କ ଚିକିତ୍ସା। ହେଲେ ଭକ୍ତ ଶ୍ରୀମନ୍ଦିର ମୁଖ୍ୟ ଫାଟକଠାରେ ଠାକୁରଙ୍କ ପଟ୍ଟଚିତ୍ରକୁ ଦର୍ଶନ କରି ପୂଜାର୍ଚ୍ଚନା କରୁଛନ୍ତି।
ଶନିବାର ଦେବସ୍ନାନ ପୁର୍ଣ୍ଣିମାରେ ତିନିଠାକୁର ୧୦୮ ଗରା ପାଣିରେ ଗାଧୋଇ ଅସୁସ୍ଥ ହୋଇ ଅଣସର ଘରେ ଚିକିତ୍ସିତ ହେଉଥିବା ବେଳେ ରବିବାର ତିନି ଠାକୁରଙ୍କ ପଟ୍ଟଚିତ୍ରକୁ ପୂଜା କରାଯାଉଛି । ପରମ୍ପରା ଅନୁଯାୟୀ ଆଦିବାସୀ ସେବକ ତଥା ଅପରକଣ୍ଡାପଲ୍ଲିର ରାମଚନ୍ଦ୍ର ଗେମେଲ ବଣ ଜଙ୍ଗଲର ଫୁଲ ଫଳ, ଚେରମୁଳି ସମେତ ବିଭିନ୍ନ ଜଡିବୁଟି ଲେପଦେଇ ଠାକୁରଙ୍କୁ ସୁସ୍ଥ କରିବାରେ ଲାଗିଛନ୍ତି।
ଅନ୍ୟପକ୍ଷେ ଭକ୍ତ ମନ୍ଦିରର ମୁଖ୍ୟ ଫାଟକରେ ମହାପ୍ରଭୁଙ୍କ ପଟ୍ଟଚିତ୍ରକୁ ଦର୍ଶନ କରିବା ସହିତ ସେଠାରେ ପୂଜାର୍ଚ୍ଚନା କରୁଛନ୍ତି। ଶାବର ଶ୍ରୀକ୍ଷେତ୍ରର ଶ୍ରୀ ମନ୍ଦିର ସମ୍ମୁଖରେ ବର୍ତ୍ତମାନ ଶ୍ରୀ ଜଗନ୍ନାଥଙ୍କ ପାଇଁ ଅନନ୍ତ ନାରାୟଣ, ବଳଭଦ୍ରଙ୍କ ପାଇଁ ଶ୍ରୀ ଅନନ୍ତ ବାସୁଦେବ ଓ ମା’ ସୁଭଦ୍ରାଙ୍କ ପାଇଁ ଶ୍ରୀଭୁବେନେଶ୍ୱରୀଙ୍କ ପଟ୍ଟଚିତ୍ରକୁ ପୁଜା କରାଯାଉଛି।
ତିନିଠାକୁରଙ୍କ ଅଣସର ଘରେ ସେବା ସରିବା ପର୍ଯ୍ୟନ୍ତ ପୂଜା ପାଇବେ ବୋଲି ମନ୍ଦିର ପରିଚାଳନା କମିଟି ପକ୍ଷରୁ କୁହାଯାଇଛି। ଆସନ୍ତା ଜୁଲାଇ ୭ତାରିଖରେ ତିନିଠାକୁର ସମ୍ପୂର୍ଣ୍ଣ ଭାବେ ସୁସ୍ଥ ହେବା ପରେ ଠାକୁରଙ୍କ ନେତ୍ରୋତ୍ସବ କରାଯିବ ବୋଲି ମନ୍ଦିର ପରିଚାଳନା କମିଟି ସମ୍ପାଦକ ଡଃ ଜଗବନ୍ଧୁ ସାମଲ ସୂଚନା ଦେଇଛନ୍ତି। ଏପରିକି ଜୁଲାଇ ୭ରେ ରଥଯାତ୍ରା ପାଇଁ ମଧ୍ୟ ୩ ରଥରେ ରଙ୍ଗ କାର୍ଯ୍ୟ ଚାଲିଥିବା ବେଳେ ଅନ୍ୟ କାର୍ଯ୍ୟଗୁଡିକ ଯୁଦ୍ଧକାଳିନ ଭିତିରେ ଚାଲିଥିବା ସମ୍ପାଦକ ସାମଲ ପ୍ରକାଶ କରିଛନ୍ତି।