ରସୁଲପୁର,୧୭।୧୨(ଡିଏନଏ)- ରସୁଲପୁର ବ୍ଲକ ବରୀ ନିର୍ବାଚନମଣ୍ଡଳୀରେ ସାମିଲ ହୋଇଥିବା ୧୦ଟି ପଞ୍ଚାୟତ ମଧ୍ୟରୁ ଶ୍ରେଷ୍ଠ ପୁରସ୍କାରପ୍ରାପ୍ତ ଅତଲାପୁର ପଞ୍ଚାୟତରେ ଦୁର୍ନୀତିର ଗନ୍ଧ ବାରିଛନ୍ତି ଜନସାଧାରଣ। ସରକାରଙ୍କ ଜନ୍ମଠାରୁ ମୃତ୍ୟୁ ପର୍ଯ୍ୟନ୍ତ ସମସ୍ତ ଜନ ମଙ୍ଗଳକାରୀ ଯୋଜନାକୁ ତୃଣମୂଳସ୍ତରରେ ପ୍ରଣୟନ କରିବାରେ ବ୍ୟାପକ ଅନିୟମିତତା ହୋଇଛି। ଏଥିପାଇଁ ପଞ୍ଚାୟତବାସୀ ସ୍ଥାନୀୟ ସରପଞ୍ଚ ପ୍ରଫୁଲ କୁମାର ସାହୁଙ୍କୁ ଦାୟୀ କରିଛନ୍ତି। ସରପଞ୍ଚ ସାହୁ ହିତାଧିକାରୀଙ୍କଠାରୁ ଉତ୍କୋଚ ନେଇ ବହୁ ତ୍ରୁଟିପୂର୍ଣ୍ଣ କାର୍ଯ୍ୟ କରିଛନ୍ତି ବୋଲି ଅଭିଯୋଗରେ ଦର୍ଶାଯାଇଛି।
ପ୍ରକାଶ ଯେ, ଏହି ପଞ୍ଚାୟତର ଅତଲାପୁର, ସାଦକପୁର, ଗଣେଶ ପାଟଣା ଆଦି ଗ୍ରାମର ଗ୍ରାମବାସୀ ସୋମବାର ପୂର୍ବାହ୍ନରେ ରସୁଲପୁର ବିଡିଓ ଉମାକାନ୍ତ ପରିଡାଙ୍କୁ ଏକ ଅଭିଯୋଗପତ୍ର ପ୍ରଦାନ କରିଛନ୍ତି। ଉକ୍ତ ପତ୍ରରେ ସରପଞ୍ଚଙ୍କ ବିରୋଧରେ ଏକ ଲମ୍ବା ଅଭିଯୋଗ ହୋଇଛି। ପଞ୍ଚାୟତ ଠିକ୍ଭାବେ ଚାଲୁ ନ ଥିବା କଥାରୁ ଅଭିଯୋଗ ଆରମ୍ଭ ହୋଇଛି। ପଞ୍ଚାୟତ ବୈଠକ ନିୟମିତ ବସୁ ନାହିଁ, ବିଭିନ୍ନ କାର୍ଯ୍ୟକୁ ନେଇ ପଲ୍ଲୀସଭା ଓ ଗ୍ରାମସଭା ଠିକ୍ ଢଙ୍ଗରେ ପରିଚାଳନା କରାଯାଉ ନାହିଁ, ହିତାଧିକାରୀ ଚୟନ ତାଲିକା ରୁଦ୍ଧ କୋଠରୀ ମଧ୍ୟରେ ପ୍ରସ୍ତୁତ ହେଉଛି, ପଞ୍ଚାୟତର ଆଲୋକୀକରଣ ବ୍ୟବସ୍ଥାରେ ବ୍ୟାପକ ଦୁର୍ନୀତି ହୋଇଛି, ଅତଲାପୁର ଗ୍ରାମରେ ଘେରିବନ୍ଧ ପର୍ଯ୍ୟନ୍ତ କଂକ୍ରିଟ ରାସ୍ତା ନିର୍ମାଣ ହୋଇଛି ବୋଲି ଦର୍ଶାଇ ଏ ବାବଦରେ ୪.୧୩ଲକ୍ଷ ଟଙ୍କା ଫଲ୍ସ ବିଲ୍ କରାଯାଇଛି ଆଦି ଅନେକ ଅଭିଯୋଗ ତାଙ୍କ ନାମରେ ହୋଇଛି। ନାନା ଅନିୟମତିତା ସତ୍ତ୍ୱେ ଉକ୍ତ ସରପଞ୍ଚଙ୍କୁ ବ୍ଲକର ପ୍ରଥମ ପୁରସ୍କାର କିଭଳି ପ୍ରଦାନ କରାଯାଇଛି ତାହା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ବୋଲି ବିଡିଓ ପରିଡାଙ୍କ ନିକଟରେ ଅଭିଯୋଗକାରୀ ପ୍ରକାଶ କରିଛନ୍ତି। ଏ ସମ୍ପର୍କରେ ସରପଞ୍ଚ ପ୍ରଫୁଲ କୁମାର ସାହୁଙ୍କୁ ପଚାରିବାରୁ, ତାଙ୍କ ପଞ୍ଚାୟତରେ ଏଭଳି କିଛି ଦୁର୍ନୀତି ହୋଇନାହିଁ ବୋଲି କହିବା ସହ ବିରୋଧୀ ତାଙ୍କୁ ବଦନାମ କରିବା ପାଇଁ ଏଭଳି ଚକ୍ରାନ୍ତ ଚଳାଇଛନ୍ତି ବୋଲି ପ୍ରକାଶ କରିଛନ୍ତି। ଏ ସମ୍ପର୍କରେ ରସୁଲପୁର ବିଡିଓ ପରିଡାଙ୍କୁ ପଚାରିବାରୁ, ଏ ନେଇ ଏବିଡିଓଙ୍କ ନେତୃତ୍ୱରେ ଏକ ୪ଜଣିଆ ଦଳ ଗଠନ କରାଯାଇଛି। ତଦନ୍ତ ରିପୋର୍ଟ ଆସିବା ପରେ ଯାହା କିଛି ପଦକ୍ଷେପ ନିଆଯିବ ବୋଲି ସୂଚନା ମିଳିଛି।