ବାଲେଶ୍ୱର ଅଫିସ, ୧୫।୧୧-ଅତ୍ୟାବଶ୍ୟକ ସାମଗ୍ରୀର ଅହେତୁକ ଦର ବୃଦ୍ଧି ପ୍ରତିବାଦରେ ଶୁକ୍ରବାର ପୂର୍ବାହ୍ନରେ ବାଲେଶ୍ୱର ଜିଲା ସିପିଆଇ ପକ୍ଷରୁ ଶତାଧିକ କର୍ମୀ ଏକ ଶୋଭାଯାତ୍ରାରେ ବାହାରିଥିଲେ। ରେଳଷ୍ଟେଶନଠାରୁ ଶୋଭାଯାତ୍ରା ବାହାରି ଜିଲାପାଳଙ୍କ କାର୍ଯ୍ୟାଳୟ ଫାଟକ ନିକଟରେ ପହଞ୍ଚତ୍ଥିଲା। ସେଠାରେ କର୍ମୀମାନେ ବିକ୍ଷୋଭ ପ୍ରଦର୍ଶନ କରିଥିଲେ।
ଗତ ୩ରୁ ୪ ମାସ ଧରି ଲଗାତାର ଭାବରେ ପିଆଜ, ଆଳୁ, ରସୁଣ, ଅଦା, ପରିବା, ଡାଲି, ତେଲ, ପେଟ୍ରୋଲ ଓ ଡିଜେଲର ଦର ବୃଦ୍ଧି ପାଇ ଆସୁଛି। ଉଭୟ କେନ୍ଦ୍ର ଓ ରାଜ୍ୟ ସରକାର ନୀରବଦ୍ରଷ୍ଟା ସାଜିଛନ୍ତି। ଜିଲାରେ ବିଳମ୍ବରେ ମୌସୁମୀ ବର୍ଷା ଯୋଗୁ ବହୁ ଜମି ପଡ଼ିଆ ପଡ଼ିଥିବା ବେଳେ ଯେଉଁ ଜମିରେ ଚାଷ ହୋଇଥିଲା ‘ବୁଲ୍ବୁଲ୍’ ବାତ୍ୟାଜନିତ ପ୍ରବଳ ବର୍ଷାରେ ନାହିଁ ନ ଥିବା ଫସଲର କ୍ଷତି ହୋଇଛି। ସରକାର ଦର ବୃଦ୍ଧି ଉପରେ ଅଙ୍କୁଶ ଲଗାଇବାକୁ ପଦକ୍ଷେପ ନେବା ସହ ଚାଷୀମାନଙ୍କୁ ତୁରନ୍ତ କ୍ଷତିପୂରଣ ଓ ରବିଚାଷ ପାଇଁ ବିହନ, ସାର ଓ ଔଷଧ କିଟ୍ ଯୋଗାଇ ଦେବାକୁ ସିପିଆଇ ନେତାମାନେ ଦାବି କରିଛନ୍ତି। ବିକ୍ଷୋଭ ସଭାରେ ବରିଷ୍ଠ କମ୍ୟୁନିଷ୍ଟ ନେତା କୈଳାସ ପଣ୍ଡା ଅଧ୍ୟକ୍ଷତା କରିଥିଲେ। ଜିଲା ସମ୍ପାଦକ ନିରଞ୍ଜନ ବାରିକ, ସହସମ୍ପାଦକ ଭାଗବତ ପ୍ରତିହାରୀଙ୍କ ସମେତ ଗୌରାଙ୍ଗ ପାଣିଗ୍ରାହୀ, ମାୟାଧର ନାୟକ, ବିଜୟ ଶ, ନାରୀନେତ୍ରୀ ବନ୍ଦନା ବିଶ୍ୱାସ, ଭଗବାନ ପଣ୍ଡା ଓ ପୂର୍ଣ୍ଣ ପଣ୍ଡା ପ୍ରମୁଖ ବକ୍ତବ୍ୟ ରଖିଥିଲେ। ଶ୍ୟାମସୁନ୍ଦର ଜେନା, ଶଶିକାନ୍ତ ବେହେରା, ଦେବେନ୍ଦ୍ର ଜେନା, ଯତୀନ ପାତ୍ର, ବେଣୁଧର ବାରିକ, ପୂର୍ଣ୍ଣ ପାତ୍ର, ଅହଲ୍ୟା ବେହେରା ଓ ପ୍ରଶାନ୍ତ ଦାସ, କୁସୁମ ବେହେରା ପ୍ରମୁଖ ଶୋଭାଯାତ୍ରାର ନେତୃତ୍ୱ ନେଇଥିଲେ। ଶେଷରେ ୪ଦଫା ସମ୍ବଳିତ ଏକ ଦାବିପତ୍ର ବାଲେଶ୍ୱର ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କ ଜରିଆରେ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ପ୍ରଦାନ କରାଯାଇଥିଲା।