![](https://www.dharitri.com/wp-content/uploads/2019/12/BNDP-Kata-dhana-ku-amala-pain-chasi-besta.jpg)
ଭଣ୍ଡାରିପୋଖରୀ, ୨୮।୧୨(ଡି.ଏନ.ଏ.)-ଭଦ୍ରକ ଜିଲା ଭଣ୍ଡାରିପୋଖରୀ ଅଞ୍ଚଳରେ ଦୁଇଦିନ ଧରି ମେଘୁଆ ପାଗ ସାଙ୍ଗକୁ ଝିପିଝିପି ବର୍ଷା ଲାଗି ରହିଛି। ଧାନ ଅମଳ ସମୟରେ ଏଭଳି ଅଦିନିଆ ବର୍ଷାକୁ ନେଇ ଚାଷୀମାନେ ଚିନ୍ତାରେ ପଡ଼ିଯାଇଛନ୍ତି। ଚାଷୀମାନେ ଖରିଫ ଧାନ କାଟି ବିଲରେ ପକାଇଥିବାବେଳେ କେତେକ ସ୍ଥାନରେ ଧାନ କଟା ମଧ୍ୟ ହୋଇ ନାହିଁ। ଯେଉଁ ଧାନ କଟା ହୋଇଛି ତାକୁ ଆଣିବାକୁ ବନ୍ଧାବନ୍ଧି କାମ ସାରିଛନ୍ତି। କେତେଜଣ ଚାଷୀ ଧାନକୁ ଟ୍ରାକ୍ଟର ଓ ଭାର ଯୋଗେ ବୋହି ଆଣୁଥିବାବେଳେ କେତେକ ବିଲରେ କ୍ଷେତକୁ ପଞ୍ଜା ମାରି ରଖିଛନ୍ତି। ବିଲରେ କଟା ହୋଇପଡ଼ିଥିବା ଓ ମେଶିନ କାଟିଥିବା ଧାନକୁ ସୁରକ୍ଷିତ ରଖିବା ଲାଗି ଜରିପାଲ ଘୋଡ଼ାଇ ରଖିବା ସାର ହୋଇଛି। ଚଳିତବର୍ଷ ବିଳମ୍ବରେ ଖରିଫ ଧାନ ଚାଷ ହୋଇଥିବାବେଳେ ଥୋଡ଼ ବାହାରିବା ବେଳକୁ ବୁଲ୍ବୁଲ୍ ବାତ୍ୟା ଦାଉ ସାଧିଲା। ଏହା ପରେ ପରେ ଧାନରେ ରୋଗପୋକ ଲାଗିଲା। ଏବେ ପୁଣି ପାଚିଲା ଧାନ ବେଳକୁ ଅଦିନିଆ ବର୍ଷା ଚିନ୍ତାରେ ପକାଇଛି। କଟାଧାନକୁ ସାଇତି ରଖିବାରେ ଚାଷୀଙ୍କ ପରିବାର ଲାଗିପଡ଼ିଛନ୍ତି। ଏଭଳି ବର୍ଷା ଲାଗି ରହିଲେ ଓଦାଧାନକୁ ସମବାୟ ସମିତିରେ ବିକ୍ରି କରିବାରେ ସମସ୍ୟା ସୃଷ୍ଟି ହେବା ସହ ଧାନ ଗଜା ହୋଇପାରେ ବୋଲି ସ୍ଥାନୀୟ ଅଞ୍ଚଳର କେତେକ ଚାଷୀ ଆଶଙ୍କା ପ୍ରକାଶ କରିଛନ୍ତି।