ଖଣ୍ଡପଡା,୨୬।୨(ସ୍ବ.ପ୍ର.)-ଖଣ୍ଡପଡା ବ୍ଲକ ଅନ୍ତର୍ଗତ ଶିଖରପୁର ପଞ୍ଚାୟତସ୍ଥିତ ସେବା ସମବାୟ ସମିତିରେ ସରକାରଙ୍କ ପକ୍ଷରୁ ଚଳିତ ବର୍ଷ ଧାନମଣ୍ଡି ଖୋଲାଯାଇଛି । ତେବେ ଧାନ ବିକ୍ରି କରିବା ପାଇଁ ବିଭିନ୍ନ ଅଞ୍ଚଳରୁ ଆସିଥିବା ଚାଷୀମାନେ ବାହାରେ ଧାନ ଗଦା ମାରି ରଖିବେଳେ ଅଦିନିଆ ବର୍ଷା ଯୋଗୁ ତାହା ଭିଜି ଯାଇଛି। ଫଳରେ ଚାଷୀମାନଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି।
ସମୟରେ ଧାନ ବିକ୍ରି କରା ନ ଯିବା ଓ ମଣ୍ଡିରେ ଧାନ ସୁରକ୍ଷିତ ରଖାଯିବା ପାଇଁ କୌଣସି ବ୍ୟବସ୍ଥା ନ ଥିବାରୁ ଶହଶହ ଧାନବସ୍ତା ବର୍ଷାରେ ଓଦା ହୋଇଥିବା ଚାଷୀମାନେ ଅଭିଯୋଗ କରିଛନ୍ତି। ଧାନମଣ୍ଡିରେ ଅବ୍ୟବସ୍ଥା ସହ କର୍ତ୍ତୃପକ୍ଷଙ୍କ ଖାମଖିଆଲ ନୀତିକୁ ନେଇ ଅସନ୍ତୋଷ ପ୍ରକାଶ ପାଇଛି।
ସ୍ଥାନୀୟ ଅଞ୍ଚଳର ଚାଷୀମାନେ ମଣ୍ଡିରେ ଧାନ ବିକ୍ରୟ କରିବା ନିମନ୍ତେ ସୋମବାର ଆସିଥିଲେ। ଧାନ ସବୁ ଶିଖରପୁର ଗ୍ରାମ୍ୟ ରାସ୍ତାର ଉଭୟପାର୍ଶ୍ୱରେ ଗଦା ମାରିଥିଲେ ହେଁ ମିଲର କର୍ତ୍ତୃପକ୍ଷ ଠିକ୍ ସମୟରେ ନ ଆସିବାରୁ ଚାଷୀମାନେ ଧାନ ବିକ୍ରି କରି ପାରି ନ ଥିଲେ। ମଙ୍ଗଳବାର ପାଗ ଖରାପ ରହିବା ଓ ଦିନ ତମାମ ଝିପିଝିପ ବର୍ଷା ଲାଗି ରହିବା ଯୋଗୁ ଚାଷୀମାନଙ୍କ ଧାନ ଓଦା ହୋଇଯାଇଛି। କେହି କେହି ଜରି ପାଲ ଘୋଡାଇ ରଖିଥିଲେ ହେଁ ତାହା ବର୍ଷାକୁ ସମ୍ଭାଳି ପାରିନି। ଏଭଳି ପରିସ୍ଥିତିକୁ ନେଇ ଚାଷୀମାନେ ମିଲର କର୍ତ୍ତୃପକ୍ଷଙ୍କୁ ଦାୟୀ କରିଥିବା ବେଳେ ଅଦିନିଆ ବର୍ଷାରେ ଧାନ ବିକ୍ରି କରି ନ ପାରି କ୍ଷତିଗ୍ରସ୍ତ ହୋଇଥିବା ଚାଷୀମାନଙ୍କୁ ଆର୍ଥତ୍କ ସହାୟତା ରାଶି ଯୋଗାଇଦେବା ନିମନ୍ତେ ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।