ଲଣ୍ଡନ ଲଡସ୍ରେ ଜୁଲାଇ ୧୪ରେ ହେବାକୁ ଥିବା ଓ୍ବାଲର୍ଡ କପ୍ର ଫାଇନାଲ ମ୍ୟାଚ୍ ଦେଖିବା ପାଇଁ ଗୋଟିଏ ପରିବାରର ୬ଜଣ ସଦସ୍ୟ ସଡ଼କ ପଥ ଦେଇ ସିଙ୍ଗାପୁରରୁ ଲଣ୍ଡନରେ ପହଞ୍ଚିଛନ୍ତି। ଟିମ୍ ଇଣ୍ଡିଆ ଫାଇନାଲକୁ ଯିବ ବୋଲି ଏହି ଭାରତୀୟ ପରିବାର ଆଶାପୋଷଣ କରିଛନ୍ତି। ତେଣୁ ଟିମ୍ ଇଣ୍ଡିଆକୁ ଉତ୍ସାହିତ କରିବା ପାଇଁ ଏହି ପରିବାର ୧୭ଟି ଦେଶର ସୀମାକୁ ଅତିକ୍ରମ କରି ଜୁଲାଇ ୫ରେ ଲଣ୍ଡନରେ ପହଞ୍ଚିଛନ୍ତି। ଫେବୃୟାରୀରେ ଓ୍ବାଲର୍ଡ କପ୍ ଘୋଷଣା ହେବା ପରେ ସିଙ୍ଗାପୁରରେ ରହୁଥିବା ଅନୁପମ ମାଥୁର ଓ ଅଦିତି ମାଥୁର ଲଣ୍ଡନରେ ଓ୍ବାଲର୍ଡ କପ୍ର ଫାଇନାଲ ମ୍ୟାଚ ଦେଖିବା ପାଇଁ ସ୍ଥିର କରିଥିଲେ। ହେଲେ କିଛି ରୋମାଞ୍ଚକର ଢଙ୍ଗରେ କରିବାକୁ ଇଚ୍ଛା ପ୍ରକାଶ କରିଥିଲେ। ସଡ଼କ ପଥରେ କାରରେ ଯିବା ପାଇଁ ଭିଜା, ଅନ୍ୟାନ୍ୟ କାଗଜପତ୍ର ଓ ସମସ୍ତ ଔପଚାରିକତା ପୂରଣ କରି ମେ ୧୭ରେ ଅନୁପମ ତାଙ୍କ ପତ୍ନୀ ଅଦିତି, ବାପା ଅଖିଳେଶ, ମା’ ଅଞ୍ଜନା, ପୁଅ ଅବିବ(୬) ଓ ଝିଅ(୩)ଙ୍କୁ ନେଇ ଲଣ୍ଡନ ଅଭିମୁଖେ ଯାତ୍ରା ଆରମ୍ଭ କରିଥିଲେ। ୧୭ଟି ଦେଶକୁ ଯାତ୍ରା କରିବା ପାଇଁ ତାଙ୍କୁ ପ୍ରାୟ ୨୨,୬୦୦ କିଲୋମିଟର ରାସ୍ତା ଅତିକ୍ରମ କରିବାକୁ ପଡ଼ିଥିଲା। ୬୦ ଦିନରେ ୨୫ହଜାର କିଲୋମିଟର ଯାତ୍ରା କରିବା ପାଇଁ ସେମାନେ ଲକ୍ଷ୍ୟ ରଖିଥିଲେ। ଯାତ୍ରା ସମୟରେ ସେମାନଙ୍କୁ ବହୁ ଅସୁବିଧାର ସମ୍ମୁଖୀନ ମଧ୍ୟ ହେବାକୁ ପଡିଥିଲା। ଏହି ରୋମାଞ୍ଚକର ଯାତ୍ରାରେ ଯେତିକି ଖୁସି ଲାଗୁଥିଲା ସେତିକି ଭୟ ମଧ୍ୟ ଲାଗୁଥିଲା ବୋଲି ଅଦିତି କହିଛନ୍ତି। ଯାତ୍ରା ସମୟରେ ମସ୍କୋରୁ ଲଣ୍ଡନ ଯିବା ପାଇଁ ୨ଟି ରାସ୍ତା ରହିଥିଲା। ପ୍ରଥମ ରାସ୍ତା ଲଣ୍ଡନକୁ ଯାଉଥିବା ବେଳେ ଅନ୍ୟ ଏକ ରାସ୍ତା ସ୍ବିଡେନର ସୁମେରୁ ରେଖା ଦେଇ ଯାଉଥିଲା। ଜୁନ ୨୧ରେ ଏହି ରେଖାରେ କେବେ ବି ରାତି ହୋଇ ନ ଥାଏ। ୨୪ଘଣ୍ଟା ଆକାଶରେ ସୂର୍ଯ୍ୟ ଦେଖାଯାନ୍ତି। ତେବେ ଜୁନ ୨୮ରେ ସ୍ବିଡେନର ଜୁକାସବରୀରେ ରାତିରେ ସେମାନେ ପହଞ୍ଚିଥିବା ବେଳେ ରାତି ୧୨ଟାରେ ବି ସେଠାରେ ସୂର୍ଯ୍ୟ ଦେଖାଯାଉଥିଲେ। ରାତି ୧୨ଟା ୧୫ରେ ସୂର୍ଯ୍ୟାସ୍ତ ହେବାର ଠିକ୍ ୧୫ ମିନିଟ୍ ପରେ ପୁଣି ସୂର୍ଯ୍ୟୋଦୟ ହୋଇଥିଲା। ଏହି ଅଦ୍ଭୁତ ଦୃଶ୍ୟକୁ ଦେଖି ପରିବାରଲୋକ ହତବାକ୍ ହୋଇପଡ଼ିଥିଲେ। ବୋଧହୁଏ ସାରା ବିଶ୍ୱରେ ଏଭଳି ଏକ ପରିବାର ନ ଥିବ, ଯାହାର ୩ ପିଢ଼ି ଏକାସାଙ୍ଗରେ ବିଷୁବ ରେଖା ଉପରେ ଥିବା ସିଙ୍ଗାପୁରରୁ ସୁମେରୁ ରେଖା ପର୍ଯ୍ୟନ୍ତ ଯାତ୍ରା କରିଥିବ ବୋଲି ଅନୁପମ କହିଛନ୍ତି। ଅପରପକ୍ଷରେ ଫାଇନାଲ ମ୍ୟାଚ୍ ଦେଖିସାରିବା ପରେ ଜୁଲାଇ ୧୫କୁ ସେମାନେ ସିଙ୍ଗାପୁର ଫେରିବେ। ଫେରିବା ସମୟରେ କାରକୁୁ ଜାହାଜରେ ପଠାଇ ନିଜେ ବିମାନରେ ସିଙ୍ଗାପୁର ଯିବେ। ଏହି ପରିବାରର ରୋମାଞ୍ଚକର ଯାତ୍ରା ସାରା ବିଶ୍ୱରେ ଏବେ ଚର୍ଚ୍ଚାର ବିଷୟ ପାଲଟିଛି।