ଅନୁଗୋଳ ଅଫିସ୍, ୮ା୬: କେହି ରହିବେନି ଖୋଲା ଆକାଶ ତଳେ। ବର୍ଷା, ଶୀତ କାକର ଭିଜା ରାତିରୁ ବାସହରାଙ୍କୁ ତ୍ରାହି ମିଳିବ। ଏପରି ମହତ୍ ଉଦ୍ଦେଶ୍ୟ ନେଇ ସରକାର ଆରମ୍ଭ କରିଥିଲେ ସେଲ୍ଟର ଫର ଅର୍ବାନ ହୋମଲେସ୍ (ଏସ୍ୟୁଏଚ୍) ଯୋଜନା। ଏଥିପାଇଁ ଟଙ୍କା ବରାଦ ହୋଇ ଆଶ୍ରୟସ୍ଥଳ ନିର୍ମାଣ ଶେଷ ହେବାକୁ ସମୟ ମଧ୍ୟ ଧାର୍ଯ୍ୟ କରାଗଲା। ହେଲେ ଧାର୍ଯ୍ୟ ସମୟକୁ ବର୍ଷେ ପୂରଣ ହୋଇସାରିଲେ ବି ଟଙ୍କା ଅଭାବରୁ ସାଧିତ ହୋଇପାରିନି ସରକାରଙ୍କ ଉଦ୍ଦେଶ୍ୟ। ଫଳରେ ଅନୁଗୋଳ ପୌରପାଳିକାରେ ଆଶ୍ରୟସ୍ଥଳ ନିର୍ମାଣ କାମ ପୂର୍ଣ୍ଣାଙ୍ଗ ରୂପ ନେଇପାରୁନି।
ସୂଚନାଯୋଗ୍ୟ, ୨୦୧୮ ଶେଷ ଆଡକୁ ସରକାର ଅନୁଗୋଳ ସହରରେ ଏସୟୁଏଚ୍ କାର୍ଯ୍ୟ ଆରମ୍ଭ ପାଇଁ ବ୍ୟବସ୍ଥା କରିଥିଲେ। ଏଥିପାଇଁ ବ୍ୟୟବରାଦ ହୋଇଥିଲା ୪୨ ଲକ୍ଷ ଟଙ୍କା। ୫୦ ବାସହରା ଲୋକଙ୍କ ରହିବା ଲକ୍ଷ୍ୟ ନେଇ ଗୃହ ନିର୍ମାଣ ଆରମ୍ଭ ହୋଇଥିଲା। ୨୦୧୯ ମେ ସୁଦ୍ଧା କୋଠା କାମ ସମ୍ପୂର୍ଣ୍ଣ କରିବାକୁ ସରକାର ନିର୍ଦ୍ଦେଶନାମା ଜାରି କରିଥିଲେ। ହେଲେ ଏହି ଅବଧି ପୂରିବାକୁ ବର୍ଷେ ବିତିଥିଲେ ବି ଆଶ୍ରୟସ୍ଥଳକୁ ପୂର୍ଣ୍ଣାଙ୍ଗ ରୂପ ଦିଆଯାଇପାରିନାହିଁ। ଏସୟୁଏଚ୍ ଗୃହ ନିର୍ମାଣ ସରିଛି, କିନ୍ତୁ ଶେଷ ସ୍ପର୍ଶ ଦେବାକୁ ପୌରପାଳିକା ପକ୍ଷରୁ ଟଙ୍କା ଯୋଗାଯାଉ ନ ଥିବା ଅଭିଯୋଗ ହୋଇଛି। ଅନ୍ୟପକ୍ଷରେ ଟଙ୍କା ଅନୁମୋଦନ ପାଇଁ ଏ ସଂକ୍ରାନ୍ତ ଫାଇଲ ଉପରିସ୍ଥ ଅଧିକାରୀଙ୍କ ନିକଟକୁ ପଠାଯାଇଥିବା ପୌରପାଳିକା ପକ୍ଷରୁ କୁହାଯାଇଛି। ସହରର ଖାଲୁଆ ଅଞ୍ଚଳରେ ଗୃହ ନିର୍ମାଣ ଓ ଏଥିପାଇଁ ଯୋଜନାରେ ପରିବର୍ତ୍ତନ ହେବା ଯୋଗୁ ଅନୁମୋଦିତ ଅର୍ଥ ଶେଷ ହୋଇଛି। ଏ ବାବଦରେ ଉପରିସ୍ଥ ଅଧିକାରୀ ରିଭାଇଜ କରି ବୈଷୟିକ ମଞ୍ଜୁରି ଦେବା ପରେ ସରକାର ଟଙ୍କା ଯୋଗାଇବେ। ଏହା ପରେ ନିର୍ମାଣ ହୋଇଥିବା ଗୃହକୁ ଶେଷ ସ୍ପର୍ଶ ଦିଆଯିବା ସହ ବିଜୁଳି, ପାଣି, ବେଡ୍ ଆଦିର ବ୍ୟବସ୍ଥା କରାଯିବ। ରକ୍ଷଣାବେକ୍ଷଣ ପାଇଁ ସ୍ବୟଂ ସହାୟକ ଗୋଷ୍ଠୀକୁ ଚୁକ୍ତି ଭିତ୍ତିରେ ଦାୟିତ୍ୱ ପ୍ରଦାନ କରାଯିବ ବୋଲି ପୌରପାଳିକା ପକ୍ଷରୁ ସୂଚନା ଦିଆଯାଇଛି।
ଏ ନେଇ ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା କହିଛନ୍ତି, ଏସୟୁଏଚ୍ ଗୃହ ନିର୍ମାଣକୁ ନେଇ ପ୍ରଥମେ ବିବାଦ ଉପୁଜିଥିଲା। ଫଳରେ ବିଳମ୍ବ ହୋଇଛି। ଏ ବାବଦରେ ଉପରିସ୍ଥ ଅଧିକାରୀଙ୍କୁ ଜଣାଯିବା ସହ ଅନୁମୋଦନ ମଗାଯାଇଛି। ସେଠାରୁ ଅନୁମୋଦନ ମିଳିବା ପରେ ତୁରନ୍ତ କାର୍ଯ୍ୟ ଶେଷ ହେବ। ଶୀତ ଦିନ ପୂର୍ବରୁ ନିର୍ମାଣ ସମ୍ପୂର୍ଣ୍ଣ କରାଯିବାକୁ ଲକ୍ଷ୍ୟ ରହିଛି। ୨ ମାସ ମଧ୍ୟରେ ଘର ପ୍ରସ୍ତୁତ କରାଯାଇ ଲୋକଙ୍କୁ ରଖାଯିବ ବୋଲି ସେ ପ୍ରକାଶ କରିଛନ୍ତି।