ନାଉଗାଁ,୧୯।୭(ସ୍ବ.ପ୍ର.): ଜଗତସିଂହପୁର ଜିଲା ନାଉଗାଁ ବ୍ଲକ ଅନ୍ତର୍ଗତ ତିରୁଣା ପଞ୍ଚାୟତର ଦହିପାଳ ହରିଜନ ସାହିରେ ସ୍ବଚ୍ଛ ଭାରତ ଅଭିଯାନରେ ନିର୍ମାଣ କରାଯାଇଛି ପାଇଖାନା। ମାତ୍ର ପାଇଖାନା ନିର୍ମାଣ କରିଥିବା ସ୍ବେଚ୍ଛାସେବୀ ବିଲ୍ କରି ନେଇଥିବାବେଳେ ଏହା ଅଧାପନ୍ତରିଆ ହୋଇପଡ଼ିଛି। ସ୍ବଚ୍ଛ ଭାରତ ଅଭିଯାନରେ ପାଇଖାନାଗୁଡ଼ିକୁ ଯଥାଶୀଘ୍ର କରିବା ପାଇଁ ଜିଲା ପ୍ରଶାସନ ପକ୍ଷରୁ କେତେକ ସ୍ବେଚ୍ଛାସେବୀଙ୍କୁ ଦାୟିତ୍ୱ ପ୍ରଦାନ କରାଯାଇଥିଲା। ଉକ୍ତ ସ୍ବେଚ୍ଛାସେବୀ ହରିଜନ ସାହିରେ ୧୨ଟି ପାଇଖାନା ୨୦୧୮ ମସିହାରେ ନିର୍ମାଣ କରିଥିବାବେଳେ ପାଇଖାନା ସମ୍ପୂର୍ଣ୍ଣ କରିଥିବା ଦର୍ଶାଇ ପ୍ରତ୍ୟେକ ପାଇଖାନା ପାଇଁ ୧୨ ହଜାର ଟଙ୍କା ଲେଖାଏ ବିଲ୍ କରିଛନ୍ତି। ମାତ୍ର ପାଇଖାନାରେ କେଉଁଠି କବାଟ ନାହିଁ ତ ଆଉ କେଉଁଠି ଟାଙ୍କି ଓ ପ୍ୟାନ୍ ନ ଥିବା ହିତାଧିକାରୀମାନେ ଅଭିଯୋଗ କରିଛନ୍ତି। ଫଳରେ ସେମାନେ ପାଇଖାନା ବ୍ୟବହାରରୁ ବଞ୍ଚିତ ହେଉଥିବା ହରିଜନ ସାହିର ଟାଙ୍ଗୁରୀ ଭୋଇ, ପ୍ରଦୀପ ଭୋଇ, ରମେଶ ଭୋଇ ଏବଂ ନେଳି ବଓ୍ବୋ ଅଭିଯୋଗ କରିଛନ୍ତି।