ନୀଳଗିରି, ୬।୭(ଡି.ଏନ.ଏ.)-ବାଲେଶ୍ୱର ଜିଲା ନୀଳଗିରି ତୃତୀୟ ଶ୍ରୀକ୍ଷେତ୍ରରେ ଶୁକ୍ରବାର ଆୟୋଜିତ ରଥଯାତ୍ରାରେ ଶ୍ରୀଜୀଉ ଭକ୍ତଙ୍କ ଗହଣରେ ଆସି ଅଧା ବାଟ ପୋଷ୍ଟ ଅଫିସ ନିକଟରେ ଅଟକିଛନ୍ତି। ସେଠାରେ ଚର୍ତୁଦ୍ଧାମୂର୍ତ୍ତି ଭକ୍ତଙ୍କୁ ଦର୍ଶନ ଦେବା ସହ ରଥରେ ରାତ୍ରିଯାପନ କରିବେ। ଶନିବାର ଅପରାହ୍ନରେ ଶ୍ରୀଜୀଉ ରଥରେ ଆସି ମାଉସୀମା’ ମନ୍ଦିରରେ ବିଜେ କରିବେ ବୋଲି ସହକାରୀ ପୂଜକ ହରିବନ୍ଧୁ କର କହିଛନ୍ତି। ଆଦି ରାଜପରିବାରର ସେବକ ଜୟନ୍ତ ଚନ୍ଦ୍ର ମର୍ଦ୍ଦରାଜ ରଥରେ ରୀତିନୀତି ଅନୁଯାୟୀ ପୂଜାର୍ଚ୍ଚନା କରିବା ପରେ ରଥ ଟଣା ଆରମ୍ଭ ହୋଇଥିଲା।
ସ୍ଥାନୀୟ ତହସିଲଦାର ସୁଶ୍ରୀତା ଟୁଡୁ ମାଜିଷ୍ଟ୍ରେଟ୍ ଭାବେ ରଥ ପରିଚାଳନା ଦାୟିତ୍ୱରେ ରହିଥିଲେ। ଅପରାହ୍ନରେ ମାଜିଷ୍ଟ୍ରେଟ୍ ଆନୁଷ୍ଠାନିକ ଭାବେ ପତାକା ହଲାଇ ରଥ ଟାଣିବା ପାଇଁ ଭକ୍ତଙ୍କୁ ନିର୍ଦ୍ଦେଶ ଦେଇଥିଲେ। ହରିବୋଲ, ହୁଳହୁଳି, ଭଜନକୀର୍ତ୍ତନ, ଶଙ୍ଖଧ୍ୱନି ଭିତରେ ଭକ୍ତମାନେ ଆନନ୍ଦ ଉଲ୍ଲାସରେ ରଥ ଟାଣିଥିଲେ ା ମନ୍ଦିର ନିକଟରୁ ମାତ୍ର ୨ଶହ ଫୁଟ୍ ପର୍ଯ୍ୟନ୍ତ ରଥ ଆସି ବିଦ୍ୟୁତ୍ ଖୁଣ୍ଟରେ ପିଟି ହୋଇ ଅଟକି ରହିଥିଲା। ଫଳରେ ରଥ ଟଣାରେ ବିଳମ୍ବ ହୋଇଥିଲା। ରାସ୍ତା ସ୍ବାଭାବିକ ହେବା ପରେ ଶ୍ରୀଜୀଉଙ୍କ ରଥକୁ ଭକ୍ତମାନେ ଟାଣି ଆଣି ଅଧା ବାଟ ପୋଷ୍ଟଅଫିସ ନିକଟରେ ପହଞ୍ଚାଇଥିଲେ। ପାଗ ଅନୁକୂଳ ଥିବାରୁ ସ୍ଥାନୀୟ ଗଡ଼ଜାତ ସମେତ ଜିଲା ତଥା ପଡ଼ୋଶୀ ଜିଲାରୁ ୫୦ହଜାରରୁ ଊର୍ଦ୍ଧ୍ୱ ଶ୍ରଦ୍ଧାଳୁଙ୍କ ଭିଡ଼ ପରିଲକ୍ଷିତ ହୋଇଥିଲା। ଭକ୍ତଙ୍କ ଭିଡକୁ ଦୃଷ୍ଟିରେ ରଖି ପୋଲିସ ପକ୍ଷରୁ ଶାନ୍ତିଶୃଙ୍ଖଳା ରକ୍ଷା ଲାଗି ୫ ପ୍ଲାଟୁନ୍ ପୋଲିସ ଫୋର୍ସ ମୁତୟନ ହୋଇଥିଲେ। ସେହିପରି ସୂଚନା ଲୋକ ସମ୍ପର୍କ ବିଭାଗ ତରଫରୁ ଜନସୂଚନା ଚିକିତ୍ସାଳୟ ପକ୍ଷରୁ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର, ରଥ ଦାଣ୍ଡରେ ଅଗ୍ନିସେବା କର୍ମଚାରୀ ଼ଉଦ୍ଧାରକାରୀ ଦଳ ଭାବେ ନିୟୋଜନ କରାଯାଇଛି। ଜନସ୍ବାସ୍ଥ୍ୟ ବିଭାଗ ପକ୍ଷରୁ ଟ୍ୟାଙ୍କର ସାହାଯ୍ୟରେ ପାନୀୟ ଜଳ ଯୋଗାଇ ଦିଆଯାଇଥିଲା। ସନ୍ଧ୍ୟାରେ ନବଯୌବନ ଭଜନସନ୍ଧ୍ୟା କମିଟି ତରଫରୁ ସ୍ନାନ ମଣ୍ଡପରେ ସାଂସ୍କୃତିକ କାଯର୍ୟକ୍ରମ ଅନୁଷ୍ଠିତ ହେବ ବୋଲି କମିଟି ପକ୍ଷରୁ କୁହାଯାଇଛି। ପ୍ରଥମ ଦିନ ରଥଟଣା ଶାନ୍ତି ଶୃଙ୍ଖଳା ସହ ହୋଇଥିବାର ଠାକୁର ମାହଲ ପକ୍ଷରୁ କୁହାଯାଇଛି। ଏହି ଅବସରରେ ଜିଲା ଏସ୍ପି ବି. ଯୁଗଳ କିଶୋର କୁମାରଙ୍କ ସମେତ ସ୍ଥାନୀୟ ପୋଲିସ ଓ ପ୍ରଶାସନ ଅଧିକାରୀ ନିର୍ବାଚିତ ଜନପ୍ରତିନିଧି ରଥ ଟଣାରେ ସାମିଲ ଥିଲେ ା