??
କେନ୍ଦୁଝର, ୩୧ା୫(ଡି.ଏନ୍.ଏ.)-ଭିତ୍ତିପ୍ରସ୍ତର ସ୍ଥାପନକୁ ଅଢେଇବର୍ଷ ହୋଇଗଲାଣି। କିନ୍ତୁ ଜାମୁଡିହା-ବିସ୍ତାପାଳ ରାସ୍ତାର ଅରଡେଇ ନଦୀ ଉପରେ ପୋଲ କାମ ଅଧା ବି ହୋଇନାହିଁ। ତେଣୁ ଧାର୍ଯ୍ୟ ସମୟ ମଧ୍ୟରେ ପୋଲ କାର୍ଯ୍ୟ ସମ୍ପୂର୍ଣ୍ଣ ହେବା ନେଇ ଆଶଙ୍କା ସୃଷ୍ଟି ହୋଇଛି। ପୂର୍ବରୁ ଏଠାରେ ଏକ ନିଚା ପୋଲ ଥିଲା। ଫଳରେ ଜାମୁଡିହା-ବିସ୍ତାପାଳ ରାସ୍ତାରେ ବର୍ଷାଦିନେ ଯାତାୟତ କରିବା ଲୋକଙ୍କ ପାଇଁ କାଠିକର ପାଠ ହେଉଥିଲା। ଲୋକଙ୍କ ଗମନାଗମନ ସମସ୍ୟାକୁ ଆଖି ଆଗରେ ରଖି ଗ୍ରାମ୍ୟ ଉନ୍ନୟନ ବିଭାଗ ତରଫରୁ ଏଠାରେ ଉଚ୍ଚ ତଳ ସେତୁ ନିର୍ମାଣ ପାଇଁ ବ୍ୟୟବରାଦ କରାଗଲା।
ଏହି କାମର ଟେଣ୍ଡର କରାଯାଇ ୨/୧୧/୨୦୧୬ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା। ଭିତ୍ତିପ୍ରସ୍ତର ସ୍ଥାପନ ସମୟରେ ଏମ୍ପି ଶକୁନ୍ତଳା ଲାଗୁରୀ ଏବଂ ବିଧାୟକ ଅଭିରାମ ନାଏକଙ୍କ ସଦୟ ଉପସ୍ଥିତି ରହିଥିଲା। ବର୍ତ୍ତମାନ ସେତୁ କାମର ପ୍ରାୟ ୧୦ଭାଗ କାର୍ଯ୍ୟ ହୋଇଥିବାବେଳେ ଧାର୍ଯ୍ୟ ସମୟରେ ଏହାର ସମ୍ପୂର୍ଣ୍ଣୀକରଣ ନେଇ ଆଶଙ୍କା ବ୍ୟକ୍ତ କରାଯାଉଛି। ଅନେକ ସ୍ଥାନରେ ଠିକା କମ୍ପାନୀମାନେ ପୋଲ କାମ ପାଇଁ ଟେଣ୍ଡର ପକାଇ କାମ ହାତେଇବା ପରେ ବିଳମ୍ବରେ କାମ ଆରମ୍ଭ କରିବା ଯୋଗୁଁ ଧାର୍ଯ୍ୟ ସମୟ ମଧ୍ୟରେ କାମ ସରିପାରୁନାହିଁ। ସେହିପରି ଜାମୁଡିହା-ବିସ୍ତାପାଳ ରାସ୍ତାର ଅରଡେଇ ନଦୀ ଉପରେ ପୋଲ କାମ ଧାର୍ଯ୍ୟ ସମୟରେ ସରିପାରିବ ନାହିଁ ବୋଲି କୁହାଯାଉଛି। ଗ୍ରୀଷ୍ମଋତୁରେ ମଧ୍ୟ ପୋଲ କାମ ଯେତିକି ତ୍ୱରାନ୍ବିତ ହେବା କଥା ସେତିକି ହୋଇପାରୁନାହିଁ। ତେଣୁ ଲୋକେ ଏଠାରେ ଗମନାଗମନ ପାଇଁ ଆଉ କେତେବର୍ଷ ଅସୁବିଧାର ସମ୍ମୁଖୀନ ହେବେ ତାହା ବୁଝାପଡୁନାହିଁ। ଠିକା କମ୍ପାନୀ ଗୋଟିଏ ପିଲର କାମ ଆରମ୍ଭ କରି ମାଟି ଉପର ପର୍ଯ୍ୟନ୍ତ ଆସିଥିବାବେଳେ ଆଉ ଗୋଟିଏ ପିଲର କାମ ମାଟିରୁ ଉଠିନାହିଁ। ଅନ୍ୟ ପିଲାର କାମ ପାଇଁ କୌଣସି କାମ ହୋଇନାହିଁ। ତେଣୁ ଏହି ପୋଲ କାମ କେବେ ସରିବ ଏବଂ ଏହି ରାସ୍ତା ଉପରେ ନିର୍ଭର କରୁଥିବା ଲୋକେ କେବେ ଏହାର ସୁବିଧା ପାଇବେ ତାହା କହି ହେଉନାହିଁ। ଗ୍ରାମ୍ୟ ଉନ୍ନୟନ ବିଭାଗ ଏଥିପ୍ରତି ଧ୍ୟାନ ଦେଇ କାର୍ଯ୍ୟକୁ ତ୍ୱରାନ୍ବିତ ନ କଲେ ସ୍ଥାନୀୟ ଜନସାଧାରଣଙ୍କ ଆକ୍ରୋଶର କାରଣ ସାଜିବ ବୋଲି କୁହାଯାଉଛି। ଏସମ୍ପର୍କରେ ଗ୍ରାମ୍ୟ ଉନ୍ନୟନ ବିଭାଗର କନିଷ୍ଠ ଯନ୍ତ୍ରୀ ରମାକାନ୍ତ ଦୁବେଙ୍କୁ ବିଳମ୍ବର କାରଣ ପଚାରିବାରୁ ଜଣେ କଣ୍ଟ୍ରାକ୍ଟର ହଠାତ କାମ ଛାଡ଼ି ପଳାଇବାରୁ ନୂଆ ଟେଣ୍ଡର କରାଯାଇ ଏହି ପୋଲ କାମ ତ୍ୱରାନ୍ବିତ କରାଯିବ ବୋଲି ସେ କହିଛନ୍ତି।
ଫଟୋ