ବରଗଡ଼ ଅଫିସ୍,୮।୫-ଗଞ୍ଜାମ ଜିଲା ଭଞ୍ଜନଗରରୁ ବରଗଡ଼କୁ ଫେରୁଥିବା ଶ୍ରମିକଙ୍କୁ ହଟହଟା ହେବାକୁ ପଡ଼ିଛି। ଏକ ସ୍ବତନ୍ତ୍ର ବସ୍ ଯୋଗେ ଗଞ୍ଜାମ ଜିଲା ପ୍ରଶାସନ ପକ୍ଷରୁ ୨୩ ଜଣ ଶ୍ରମିକଙ୍କୁ ବରଗଡ଼ ଜିଲା ପାଇକମାଲ ବ୍ଲକ କାଂସଡ଼ା ଅଞ୍ଚଳର ସେମାନଙ୍କ ଘରକୁ ପହଞ୍ଚାଇବା ପାଇଁ ବ୍ୟବସ୍ଥା କରାଯାଇଥିଲା। ମାତ୍ର ବସ୍ଟି ଗୁରୁବାର ବିଳମ୍ବିତ ରାତିରେ ଅଧାବାଟେ ଅର୍ଥାତ୍ ଶ୍ରମିକଙ୍କ ଘରଠାରୁ ପ୍ରାୟ ଦେଢ଼ଶହ କି.ମି ଦୂର ବରପାଲିରେ ଓହ୍ଲାଇ ଦେଇ ଚାଲି ଯାଇଥିଲା। ଏହାପରେ ଶ୍ରମିକମାନେ ଚାଲିଚାଲି ବିଜେପୁର ଦେଇ ସେମାନଙ୍କ ଘରକୁ ଫେରୁଥିବା ଅର୍ଜୁନ ସାହୁ ନାମକ ଜଣେ ଯୁବକ ଦେଖିବାକୁ ପାଇଥିଲେ। ପରେ ସେ ଶ୍ରମିକମାନଙ୍କୁ ବିସ୍କୁଟ ଆଦି ଖାଇବାକୁ ଦେବା ସହିତ ଘଟଣା ସମ୍ପର୍କରେ ବିଜେପୁର ବିଡିଓ ପଦ୍ମନାଭ ସାମନ୍ତରାୟଙ୍କୁ ସୂଚନା ଦେଇଥିଲେ। ଖବରପାଇ ବିଡିଓ ଘଟଣାସ୍ଥଳରେ ପହଞ୍ଚି ଏକ ସରକାରୀ ବସ୍ ଯୋଗେ ସେମାନଙ୍କୁ ନିଜ ନିଜ ଘରକୁ ପଠାଇବା ପାଇଁ ବ୍ୟବସ୍ଥା କରିଥିଲେ। ସାମାଜିକ କର୍ମୀ ଦିବସ କୁମାର ସାହୁ, କିରଟୀ ସାହୁ ପ୍ରମୁଖ ସହଯୋଗ କରିଥିଲେ।