![](https://www.dharitri.com/wp-content/uploads/2019/10/currupt.gif)
ଭୁବନେଶ୍ୱର, ୬।୧୦(ବ୍ୟୁରୋ): ରାଜ୍ୟ ସରକାର ଦୁର୍ନୀତି ଅଭିଯୋଗରେ ଶୁକ୍ରବାର ୪ ସରକାରୀ ଅଧିକାରୀଙ୍କୁ ବାଧ୍ୟତାମୂଳକ ଅବସର ଦେଇ ଜଣଙ୍କୁ ବରଖାସ୍ତ କରିଥିଲେ। ନିକଟରେ ସରକାର ଅନେକ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିସାରିଛନ୍ତି। ରାଜ୍ୟ ପ୍ରଶାସନରେ ସ୍ବଚ୍ଛତା ଆଣିବା ପାଇଁ ଏହି ପ୍ରୟାସ କରାଯାଉଥିବା କୁହାଯାଇଛି। ହେଲେ ବିରୋଧୀ ଏପରି ପଦକ୍ଷେପକୁ ‘ଧର୍ମକୁ ଆଖିଠାର’ ବୋଲି କହିଛନ୍ତି। ତୃଣମୂଳସ୍ତରୀୟ ପ୍ରଶାସନିକ ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ହେଉଛି, କିନ୍ତୁ ବଡ଼ ଦୁର୍ନୀତିଗ୍ରସ୍ତ ଅଫିସରଙ୍କୁ ଛାଡ଼ି ଦିଆଯାଉଥିବା ବିରୋଧୀ ଅଭିଯୋଗ କରିଛନ୍ତି। ଅପରପକ୍ଷରେ ଏପରି ଅଭିଯୋଗକୁ ଶାସକ ଦଳ ପକ୍ଷରୁ ଖଣ୍ଡନ କରାଯାଇଛି। ଭାଜପା ନେତା ପୃଥ୍ବୀରାଜ ହରିଚନ୍ଦନ କହିଛନ୍ତି ଯେ, ସରକାର ବଡ଼ମାଛଙ୍କୁ ଧରୁନାହାନ୍ତି। ସେମାନଙ୍କୁ ପ୍ରଶ୍ରୟ ଦେଉଛନ୍ତି, ଲୋକଦେଖାଣିଆ ଭାବେ କେତେଜଣ ତଳିଆ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଉଛନ୍ତି। ତେଣୁ ସରକାର ଦୁର୍ନୀତିଗ୍ରସ୍ତ ବଡ଼ବାବୁମାନଙ୍କୁ ଧରନ୍ତୁ ବୋଲି ପୃଥ୍ବୀରାଜ କହିଛନ୍ତି। କଂଗ୍ରେସ ମଧ୍ୟ ସରକାରଙ୍କ ଏପରି କାର୍ଯ୍ୟାନୁଷ୍ଠାନକୁ ସମାଲୋଚନା କରିଛି। ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି ଯେ, ରାଜ୍ୟ ସରକାର ଦୁର୍ନୀତିରେ ବୁଡ଼ି ରହିଛନ୍ତି। ଉପରକୁ ନିଜର ସ୍ବଚ୍ଛ ଚେହେରା ଦେଖାଇବା ପାଇଁ ଏପରି କାର୍ଯ୍ୟ କରୁଛନ୍ତି। ତଳିଆ କର୍ମଚାରୀଙ୍କ ଭଳି ଅସାଧୁ ବଡ଼ ଅଧିକାରୀଙ୍କ ବିରୋଧରେ କେବେ କାର୍ଯ୍ୟାନୁଷ୍ଠାନ ହେବ ବୋଲି ଜୟଦେବ ପ୍ରଶ୍ନ କରିଛନ୍ତି। ଅପରପକ୍ଷରେ ବିଜେଡି ଗଣମାଧ୍ୟମ ସଂଯୋଜକ ସସ୍ମିତ ପାତ୍ର ଏହି ଅଭିଯୋଗକୁ ଖଣ୍ଡନ କରିଛନ୍ତି। ସସ୍ମିତ କହିଛନ୍ତି ଯେ, ଆଗକୁ ବିଜେପୁର ଉପନିର୍ବାଚନ ରହିଛି। ଲଗାତର ବିକାଶମୂଳକ କାର୍ଯ୍ୟ ସହ ଦୁର୍ନୀତିଖୋରଙ୍କ ବିରୋଧରେ କାର୍ଯ୍ୟାନୁଷ୍ଠାନ ସରକାରଙ୍କୁ ଅଧିକ ଲୋକପ୍ରିୟ କରିଛି। ତେଣୁ ଉପନିର୍ବାଚନରେ ନିଶ୍ଚିତ ପରାଜୟ ଜାଣି ଭାଜପା ଏପରି ସବୁ ମନ୍ତବ୍ୟ ଦେଉଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ୫-ଟି ମନ୍ତ୍ର କାର୍ଯ୍ୟକାରିତା ପ୍ରଶାସନକୁ ଆହୁରି ସୁଦୃଢ଼ କରିବ।