କାମାକ୍ଷାନଗର, ୧୩।୧(ଡି.ଏନ.ଏ.)-ଢେଙ୍କାନାଳ ଜିଲା କାମାକ୍ଷାନଗର ବ୍ଲକ କାଦୁଆ ସେବା ସମବାୟ ସମିତି ପକ୍ଷରୁ ଖୋଲାଯାଇଥିବା ମଣ୍ଡିରେ ମିଲରଙ୍କ ମନୋମୁଖୀ କାର୍ଯ୍ୟକୁ ନେଇ ସୋମବାର ଚାଷୀ ଅସନ୍ତୋଷ ଦେଖାଦେଇଛି। ଏ ନେଇ ଚାଷୀମାନେ କଙ୍କଡ଼ାହାଡ଼ରେ ଅନୁଷ୍ଠିତ ଜନଶୁଣାଣି ଶିବିରରେ ଜିଲାପାଳଙ୍କୁ ଭେଟି ଫେରାଦ ହୋଇଛନ୍ତି।
ଚାଷୀଙ୍କ ଅଭିଯୋଗ ଅନୁଯାୟୀ, ପଞ୍ଚସଖା ରାଇସ୍ମିଲ ପକ୍ଷରୁ ଉକ୍ତ ମଣ୍ଡିରେ ଧାନ କିଣାଯାଉଛି। ହେଲେ ମାନ ଖରାପ କହି ମିଲରମାନେ ମନଇଚ୍ଛା ଧାନ କାଟୁଛନ୍ତି। ଚାଷୀମାନେ ଶୀତ କାକରରେ ପଡ଼ିଥିବାବେଳେ ମିଲର ଚାଷୀଙ୍କ ଜୀବନ ଜୀବିକା ନେଇ ଖେଳ ଖେଳୁଛନ୍ତି। ଏହାର ସମାଧାନ ପାଇଁ ଚାଷୀ ଚନ୍ଦ୍ରଶେଖର ବ୍ରହ୍ମ, ରୁଦ୍ର ଷେଣ୍ଢ, ହେମନ୍ତ ବ୍ରହ୍ମ, ରାସବିହାରୀ ସାମଲ, ସୁନୀଲ ଷେଣ୍ଢ, ଦିଲୀପ ବିଶ୍ୱାଳ, ଦିବା ସାହୁ, ବ୍ରହ୍ମାନନ୍ଦ ସାହୁ, ସୁଧାକର ରାଉଳ, ନିଗମାନନ୍ଦ ମହାକୁଡ ପ୍ରମୁଖ ଜିଲାପାଳଙ୍କ ଭେଟି ଗୁହାରି କରିଥିଲେ। ଜିଲାପାଳଙ୍କ ନିର୍ଦ୍ଦେଶରେ ଉପଖଣ୍ଡ ଯୋଗାଣ ଅଧିକାରୀ ସଞ୍ଜୟ କୁମାର ସାହୁ ବୁଝାଶୁଝା କରିବା ପରେ ଧାନ ଉଠାଣ ହୋଇଥିଲା।