ତାଳଚେର,୨୧ା୧୨(ନି.ପ୍ର.) – ତାଳଚେରସ୍ଥିତ ବାଣିଜ୍ୟକର ଅଧିକାରୀଙ୍କ କାର୍ଯ୍ୟାଳୟରେ ଦୀର୍ଘଦିନ ହେଲା ଅଚଳାବସ୍ଥା ଲାଗି ରହିଛି। ୧୮ ମାସ ହେଲା ଏଠାରେ କୌଣସି ଅଧିକାରୀ ନାହାନ୍ତି କି ଅଫିସ କାର୍ଯ୍ୟ ମଧ୍ୟ ହେଉନାହିଁ। ଅଫିସର ସମସ୍ତ କାଗଜପତ୍ର ବନ୍ଧା ହୋଇ ଉପଜିଲାପାଳଙ୍କ କାର୍ଯ୍ୟାଳୟରେ ରଖାଯାଇଥିବା ବେଳେ କେବଳ ୨ଜଣ ୪ର୍ଥ ଶ୍ରେଣୀ କର୍ମଚାରୀ ଦେଉଳବେଡାଠାରେ ନୂତନଭାବେ ଖୋଲାଯାଇଥିବା ଅଫିସ ଗୃହକୁ ଜଗି ରହିଛନ୍ତି। ଅଧିକ ରାଜସ୍ବ ଆଦାୟ କରୁଥିବା ଅଫିସକୁ ବର୍ଷାଧିକ ହେଲା କାହିଁକି ପଙ୍ଗୁ କରି ରଖାଯାଇଛି ତାହା ସାଧାରଣରେ ବୁଝାପଡ଼ୁ ନାହିଁ।
ପ୍ରକାଶ ଯେ, ବହୁ ଦାବି ଓ ଆନ୍ଦୋଳନ ପରେ ୨୦୦୮ରେ ତାଳଚେର ବାଇପାସ୍ସ୍ଥିତ ଏକ ଭଡ଼ାଘରେ ବାଣିଜ୍ୟକର ଅଧିକାରୀଙ୍କ କାର୍ଯ୍ୟାଳୟ ଖୋଲା ଯାଇଥିଲା। ୨୦୧୮ ମେ ୧୨ରେ ଅନୁଗୋଳର ଜଏଣ୍ଟ କମିଶନର ଏହି ଅଫିସକୁ ଅନୁଗୋଳକୁ ସ୍ଥାନାନ୍ତର କରିନେବାକୁ ବିଭାଗୀୟ ଅଧିକାରୀଙ୍କୁ ଚିଠି ଲେଖିଥିଲେ। କିନ୍ତୁ ତାଳଚେର ବିଧାୟକଙ୍କ ଚାପରେ ଏହା ବନ୍ଦ ରହିଥିଲା। ମେ ୧୩ରେ ଅନୁଗୋଳର ଜଏଣ୍ଟ କମିଶନର ଅଫିସ ସ୍ଥାନାନ୍ତର ବନ୍ଦ ରହିଲା ବୋଲି ପୁନର୍ବାର କହିଥିଲେ। ତେବେ ହଠାତ ଜୁନ୍ ୨୨ରେ ତୁରନ୍ତ ଅଫିସ ଅନୁଗୋଳକୁ ଉଠାଇ ନେବାକୁ ନିର୍ଦ୍ଦେଶ ଦେଇଥିଲେ। ଫଳରେ ତାଳଚେର ସିଟିଓ ଏଥିପାଇଁ ପ୍ରସ୍ତୁତି ଚଳାଇଥିଲେ। ୨୦୧୮ ଜୁନ ୨୪ରେ ତାଳଚେର ସିଟିଓ ବାଣିଜ୍ୟକର ଅଫିସ କାଗଜପତ୍ର ଓ ଅନ୍ୟାନ୍ୟ ଆସବାବପତ୍ର ଅନୁଗୋଳ ନେବା ପାଇଁ ପ୍ରସ୍ତୁତ କରୁଥିବା ବେଳେ ସ୍ଥାନୀୟ ଅଧିବାସୀ ଓ ବ୍ୟବସାୟୀ ଏହାକୁ ବିରୋଧ କରିଥିଲେ। ସେବେଠାରୁ ଅଫିସର କାଗଜପତ୍ର, ଆସବାବପତ୍ର ଉପଜିଲାପାଳଙ୍କ କାର୍ଯ୍ୟାଳୟ ପରିସରରେ ଥିବା ଏମ୍ସିଏଲ୍ ଓ ଏନ୍ଟିପିସିର ଭୂଅର୍ଜନ ଅଧିକାରୀଙ୍କ କାର୍ଯ୍ୟାଳୟରେ ଗଦା ହୋଇଛି। ଏହାକୁ ଜଣେ ପିଅନ ଜଗି ରହିଛନ୍ତି। ଗତ ନଭେମ୍ବର ମାସରେ ଦେଉଳବେଡା କଲୋନୀସ୍ଥିତ ଏମ୍ସିଏଲ୍ର ଏକ ଘରେ ନୂତନ ଭାବେ ବାଣିଜ୍ୟକର ଅଧିକାରୀଙ୍କ ଅଫିସ ଖୋଲାଯାଇଛି। କିନ୍ତୁ ଏଠାରେ କୌଣସି ଅଧିକାରୀ ନାହାନ୍ତି କି ଉପଜିଲାପାଳଙ୍କ କାର୍ଯ୍ୟାଳୟରେ ଥିବା କାଗଜପତ୍ର ଓ ଆସବାବପତ୍ର ଏଠାକୁ ଅଣାଯାଇନାହିଁ। କେବଳ ନାମକୁ ମାତ୍ର ଅଫିସ ଖୋଲାଯାଇଛି। ୨ଜଣ ୪ର୍ଥ ଶ୍ରେଣୀ କର୍ମଚାରୀ ଏଠାରେ ଅଛନ୍ତି। ଗତ ୧୮ ମାସ ହେଲା ଏଭଳି ଅଚଳାବସ୍ଥା ଲାଗି ରହିଥିଲେ ହେଁ ଏହାର କୌଣସି ସ୍ଥାୟୀ ସମାଧାନ କରାଯାଉନାହିଁ। ପଳରେ ଏଠିକାର ବ୍ୟବସାୟୀମାନେ ବିଭିନ୍ନ କାର୍ଯ୍ୟରେ ଅନୁଗୋଳ ଜିଲା କାର୍ଯ୍ୟାଳୟକୁ ଦୌଡି ଦୌଡି ନୟାନ୍ତ ହେଉଛନ୍ତି। ତାଳଚେରକୁ ଶ୍ରୀହୀନ କରିବାକୁ କେତେକ ଅଧିକାରୀ ଏପରି ଚକ୍ରାନ୍ତ କରିଥିବା ଆଲୋଚନା ହେଉଛି। ତୁରନ୍ତ ବାଣିଜ୍ୟକର ଅଧିକାରୀଙ୍କ କାର୍ଯ୍ୟାଳୟକୁ ପୁନଃ କାର୍ଯ୍ୟକ୍ଷମ କରିବାକୁ ସ୍ଥାନୀୟ ଅଧିବାସୀଙ୍କ ପକ୍ଷରୁ ଦାବି ହେଉଛି। ଏ ସମ୍ପର୍କରେ ଅନୁଗୋଳର ଜଏଣ୍ଟ କମିଶନରଙ୍କ ସହ ଯୋଗାଯୋଗ ସମ୍ଭବ ହୋଇପାରି ନ ଥିବାରୁ ମତାମତ ମିଳିପାରି ନାହିଁ।