କୋରୁକୋଣ୍ଡା,୧୭।୧୦: ମାଲକାନଗିରି ଜିଲା ବାଲିମେଳା ବିଜ୍ଞାନ ଓ ବୈଷୟିକ ମହାବିଦ୍ୟାଳୟର ଛାତ୍ରୀଛାତ୍ର ଗୁରୁବାର ଧାରଣାରେ ବସିଥିଲେ। କଲେଜରେ ଅଧ୍ୟାପକ ପଦବୀ ଖାଲି ପଡ଼ିଥିବା ହେତୁ ପାଠପଢ଼ାରେ ବାଧା ସୃଷ୍ଟି ହେଉଛି। ଏନେଇ ବାରମ୍ବାର ମହାବିଦ୍ୟାଳୟ ଅଧ୍ୟକ୍ଷ ଏମ୍ ବୈରାଗୀ ସୁବୁଦ୍ଧିଙ୍କ ଦୃଷ୍ଟି ଆକର୍ଷଣ କରାଯାଇଥିଲେ ସୁଦ୍ଧା କୌଣସି ପଦକ୍ଷେପ ନିଆଯାଉନାହିଁ ବୋଲି ଛାତ୍ରୀଛାତ୍ର ଅଭିଯୋଗ କରିଛନ୍ତି। ମହାବିଦ୍ୟାଳୟରେ ପାନୀୟ ଜଳର ଅସୁବିଧା, ଶ୍ରେଣୀ ଗୃହର ଅଭାବ, ଯାତାୟାତ ନିମନ୍ତେ ଗାଡ଼ିର ସୁବିଧା ନ ଥିବାରୁ ବାଧ୍ୟ ହୋଇ ଆଜି ମହାବିଦ୍ୟାଳୟର ସଭାପତି ଶିବବ୍ରତ ବେହେରାଙ୍କ ଅଧ୍ୟକ୍ଷତାରେ ଏହି ଧାରଣା ଦିଆଯାଇଥିଲା। ଖବର ପାଇ ଓରକେଲ ଥାନାଧିକାରୀ ଜଗଦୀଶ ବାରା ଓ ଏସଡିପିଓ ମାନସ ରଞ୍ଜନ ବାରିକ ଆନ୍ଦୋଳନସ୍ଥଳରେ ପହଞ୍ଚି ବୁଝାସୁଝା କରିବା ପରେ ମଧ୍ୟ ଛାତ୍ରୀଛାତ୍ର ତାଙ୍କ ଜିଦ୍ରେ ଅଟଳ ଥିଲେ। ପରେ ଅଧ୍ୟକ୍ଷ ମହୋଦୟ ୨୫ ତାରିଖ ସୁଦ୍ଧା ଖାଲି ପଡ଼ିଥିବା ଅଧ୍ୟାପକ ପଦବୀ ପୂରଣ କରିବା ପାଇଁ ପ୍ରତିଶ୍ରୁତି ଦେବାରୁ ଧାରଣାରୁ ଛାତ୍ରୀଛାତ୍ର ଓହରିଛନ୍ତି।