ଶ୍ରୀନଗର,୧୯।୭: ଦକ୍ଷିଣ କଶ୍ମୀର ଅନନ୍ତନାଗ ଜିଲାର ବିଜବେହରା ଅଞ୍ଚଳରେ ଶୁକ୍ରବାର ସଜ୍ଜାଦ ମୁଫତିଙ୍କ ପିଏସ୍ଓଙ୍କୁ ଗୁଳି କରି ହତ୍ୟା କରାଯାଇଛି। ପିପୁଲ୍ସ୍ ଡେମୋକ୍ରେଟିକ୍ ପାର୍ଟି (ପିଡିପି)ର ନେତା ଓ ଜମ୍ମୁ କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ମେହବୁବା ମୁଫତିଙ୍କ ସମ୍ପର୍କୀୟ ଭାଇ ସଜ୍ଜାଦ ମୁଫତିଙ୍କ ପିଏସ୍ଓ ଫାରୁକ୍ ଅହମ୍ମଦଙ୍କୁ କେହି ଦୁର୍ବୃତ୍ତ ଗୁଳି କରି ହତ୍ୟା କରିଥିବା ଅଭିଯୋଗ ହୋଇଛି। ସୂଚନାଯୋଗ୍ୟ, ବିଜବେହରାର ବାବା ମୋହଲ୍ଲା ଅଞ୍ଚଳରେ ଥିବା ସଜ୍ଜାଦ ମସ୍ଜିଦରେ ନମାଜ ପଢ଼ୁଥିବା ବେଳେ ଫାରୁକ୍ ବାହାରେ ଠିଆ ହୋଇଥିଲେ। ଠିକ୍ ଏତିକି ବେଳେ ତାଙ୍କୁ କେହି ଗୁଳି କରି ସେଠାରୁ ଚାଲିଯାଇଥିଲେ। ଏହାପରେ ଫାରୁକଙ୍କୁ ଗୁରୁତର ଅବସ୍ଥାରେ ହସ୍ପିଟାଲ ନିଆଯାଇଥିବା ବେଳେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
