ବାରିପଦା ଅଫିସ, ୪ା୩- ୪ ବର୍ଷ ହୋଇଥିବା ବେଳେ ମା’ ବାପା ଛାଡ଼ି ଚାଲି ଗଲେ। ପରିବାର କ’ଣ ଜଣା ନ ଥିଲା। ବିଭିନ୍ନ ଆଡ଼େ ବୁଲାବୁଲି କରୁଥିବା ବେଳେ ପୋଲିସ ତାଙ୍କୁ ଉଦ୍ଧାର କରି ଜିଲା ଶିଶୁ ମଙ୍ଗଳ ସମିତିରେ ହାଜର କରିଥିଲା। ପରେ ଶିଶୁ ଯତ୍ନ ଅନୁଷ୍ଠାନ ପାଲଟି ଯାଇଥିଲା ତାଙ୍କ ପରିବାର। ସେହି ପରିବାର ମଙ୍ଗଳବାର ତାଙ୍କୁ ଝିଅ କରି କନ୍ୟାଦାନ କରିଛି। ଏ ହେଉଛି ୨୦୧୭ରେ ଉଦ୍ଧାର ହୋଇଥିବା ନାବାଳିକା ଗୁଡ଼ିଆଙ୍କ କାହାଣୀ। ଜିଲା ପ୍ରଶାସନ ପକ୍ଷରୁ ମଙ୍ଗଳବାର ତାଙ୍କର ବିବାହ ହିନ୍ଦୁ ରୀତିନୀତି ଅନୁସାରେ ବାରିପଦା ବଡ଼ବଜାରସ୍ଥିତ ରାଧାମୋହନ ମନ୍ଦିରରେ ସମ୍ପନ୍ନ ହୋଇଛି। ଏବେ ଅନାଥ ଗୁଡ଼ିଆ ପାଇଛନ୍ତି ଜୀବନସାଥୀ। କେବଳ ଯେ ଗୁଡ଼ିଆଙ୍କୁ ପ୍ରଶାସନ ବିବାହ ଦେଇଛି ତାହା ନୁହେଁ ଝିଅ ଚଳିବା ପାଇଁ ବିଭିନ୍ନ ଘରକରଣା ଜିନିଷ ମଧ୍ୟ ଉପହାର ଦେଇଛି। କିଛି ବଦାନ୍ୟ ବ୍ୟକ୍ତି ମଧ୍ୟ ଏହି ବିବାହରେ ସହଯୋଗ କରିଥିଲେ। ଶିଶୁ ଯତ୍ନ ଅନୁଷ୍ଠାନର ଅଧ୍ୟକ୍ଷା ପ୍ରଭାତୀ ମହାପାତ୍ର କନ୍ୟାଦାନ କରିଥିଲେ। ଜିଲା ପ୍ରଶାସନର ଏହି ବିବାହ କାର୍ଯ୍ୟକୁ ସାଧାରଣରେ ପ୍ରଶଂସା କରାଯାଇଛି।
ଉଲ୍ଲେଖଯୋଗ୍ୟ ଯେ, ୨୦୧୭ରେ ମୟୂରୟଭଞ୍ଜ ଜିଲା ବହଳଦା ପୋଲିସ ବହଳଦା ବଜାରରୁ ଜଣେ ନାବାଳିକାଙ୍କୁ ଉଦ୍ଧାର କରି ଶିଶୁ ମଙ୍ଗଳ ସମିତିରେ ହାଜର କରାଇଥିଲା। ପରେ ନାବାଳିକା ଜଣଙ୍କ ମହିଳା ମହାଲକ୍ଷ୍ମୀ ସଂଗଠନ ଦ୍ୱାରା ପରିଚାଳିତ ଶିଶୁ ଯତ୍ନ ଅନୁଷ୍ଠାନରେ ରହି ଆସୁଥିଲେ। ସେଠାରେ ତାଙ୍କ ନାମ ଓ ଠିକଣା ପଚରା ଯାଇଥିଲା ବେଳେ ତାଙ୍କର କିଛି ମନେ ନ ଥିବା ସେ କହିଥିଲେ। ସେ ଛୋଟ ହୋଇଥିବା ବେଳେ ବାପା ମା’ ତାଙ୍କୁ ଛାଡ଼ି ଚାଲି ଯାଇଥିବା ପ୍ରକାଶ କରିଥିଲେ। ଏହା ପରଠାରୁ ଉକ୍ତ ନାବାଳିକାଙ୍କୁ ଗୁଡ଼ିଆ ନାମରେ ପରିଚିତ କରାଯାଇଥିଲା। ଗୁଡ଼ିଆଙ୍କୁ ୧୯ ବର୍ଷ ହେଲା ପରେ ପ୍ରଶାସନ ପକ୍ଷରୁ ବିଭିନ୍ନ ସ୍ଥାନରେ ବର ଖୋଜା ଚାଲିଥିଲା। ଶେଷରେ କପ୍ତିପଦା ବ୍ଲକ ଅନ୍ତର୍ଗତ ଧୁମଖେତି ଗ୍ରାମର ବିରଞ୍ଚି ମହାନ୍ତିଙ୍କ ବଡ଼ପୁଅ ବେଣୁଧର ମହାନ୍ତି ସାଙ୍ଗରେ କିିଶୋର ନ୍ୟାୟ ଅନୁସାରେ ମଙ୍ଗଳବାର ତାଙ୍କର ବିବାହ କାର୍ଯ୍ୟ ସମ୍ପନ୍ନ ହୋଇଥିଲା। ବେଣୁଧର ଗ୍ରାମରେ ଦୋକାନ କରିଥିବା ବେଳେ ତାଙ୍କର ଏକ କୁକୁଡ଼ା ଫାର୍ମ ମଧ୍ୟ ରହିଛି। ପ୍ରଶାସନ ପକ୍ଷରୁ ବିଜୁ ଶିଶୁ ସୁରକ୍ଷା ଯୋଜନାରେ ୫୦ ହଜାର ଟଙ୍କା, ଘରକରଣା ପାଇଁ ବିଭିନ୍ନ ଆସବାବପତ୍ର, ମଙ୍ଗଳସୂତ୍ର, ମୁଦି ଆଦି ଉପହାର ଦିଆଯାଇଥିଲା। ଜିଲା ଶିଶୁ ସୁରକ୍ଷା ଅଧିକାରୀ ମମତାମୟୀ ବିଶ୍ୱାଳ, ସମ୍ପାଦିକା ଅନୀମା ମିଶ୍ର, ଜିଲା ଶିଶୁ ମଙ୍ଗଳ ସମିତି ଅଧ୍ୟକ୍ଷା କୃଷ୍ଣ କଳ୍ପନା ମହାନ୍ତିି, ସଦସ୍ୟ ଜୀବନ କୃଷ୍ଣ ବେହେରା, ସରୋଜ ସାହୁ, ଡା. କେ. କେ. ମହାପାତ୍ର, କଲ୍ୟାଣୀ ମହିଳା ସମିତିର ଅଧ୍ୟକ୍ଷା ଅର୍ଚ୍ଚନା ମହାପାତ୍ରଙ୍କ ସମେତ ଏକାଧିକ ସଦସ୍ୟା ଓ ବୁଦ୍ଧିଜୀବୀମାନେ ବିବାହରେ ଯୋଗ ଦେଇ ନବଦମ୍ପତିକୁ ଆଶୀର୍ବାଦ ପ୍ରଦାନ କରିଥିଲେ।