ବାଲିଗୁଡା,୨୭ା୨(ଡି.ଏନ୍.ଏ.) – ବାଲିଗୁଡା ଏନ୍ଏସି ଅଧ୍ୟକ୍ଷା ମମତା ବେହେରା ଅନାସ୍ଥାରେ ପଦ ହରାଇଛନ୍ତି। ବୁଧବାର ପୂର୍ବାହ୍ନ ୧୧ଟାରେ ଏନ୍ଏସି କାର୍ଯ୍ୟାଳୟ ପରିସରରେ ଅନାସ୍ଥା ପ୍ରସ୍ତାବକୁ ନେଇ ଭୋଟ ହୋଇଥିଲା। ବାଲିଗୁଡା ଉପଜିଲାପାଳ ଦେବେନ୍ଦ୍ର ନନ୍ଦ ନିର୍ବାଚନ ଅଧିକାରୀ ଭାବେ ଦାୟିତ୍ୱ ତୁଲାଇଥିଲେ। ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଜୟଦେବ ଷଡଙ୍ଗୀ, ଅତିରିକ୍ତ ଜିଲାପାଳ ହଳଧର ନାୟକ ଓ ବରିଷ୍ଠ କିରାଣି ଅରୁଣ କୁମାର ରାଉତ ପ୍ରମୁଖ ଉପସ୍ଥିତ ଥିଲେ। ଏନ୍ଏସିର ୧୩ କାଉନ୍ସିଲରଙ୍କ ମଧ୍ୟରୁ ୧୧ ଜଣ ଉପସ୍ଥିତ ରହି ଭୋଟଦାନରେ ଭାଗ ନେଇଥିଲେ। ଭୋଟ ବାକ୍ସ ଖୋଲିବା ପରେ ମୋଟ ୧୧ଟି ଭୋଟ ଅଧ୍ୟକ୍ଷା ମମତା ବେହେରାଙ୍କ ବିପକ୍ଷରେ ପଡିଥିବା ଜଣାପଡିଥିଲା। ୧୩ ଜଣ କାଉନ୍ସିଲରଙ୍କ ମଧ୍ୟରୁ ୧୨ନଂ. ଓ୍ବାର୍ଡ କାଉନ୍ସିଲର ଶିରିଶ ପ୍ରଧାନ ଓ ଅଧ୍ୟକ୍ଷା ମମତା ବେହେରା ଅନୁପସ୍ଥିତ ରହିଥିଲେ। ୧୧ ଜଣ କାଉନ୍ସିଲରଙ୍କ ମଧ୍ୟରେ ବିଜେଡି, କଂଗ୍ରେସ ଓ ଭାଜପାର କାଉନ୍ସିଲରମାନେ ଥିଲେ। ସମସ୍ତେ ଏକାଠିହୋଇ ଅଧ୍ୟକ୍ଷା ହଟାଓ ଅଭିଯାନ ଚଳାଇଥିବାବେଳେ ଏଥିରେ ସଫଳ ହୋଇଛନ୍ତି। ଯାହା ଏବେ ଚର୍ଚ୍ଚାର ବିଷୟ ପାଲଟିଛି।
ସୂଚନାଯୋଗ୍ୟ ଯେ, ପୂର୍ବରୁ ବିଜେଡିର ୭ଜଣ କାଉନ୍ସିଲର ଅଧ୍ୟକ୍ଷା ଓ ଉପାଧ୍ୟକ୍ଷଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିଥିଲେ। ମାତ୍ର ଭୋଟ ସମୟରେ ମମତା ହାଇକୋର୍ଟରୁ ରହିତାଦେଶ ଆଣି ପଦ ବଞ୍ଚାଇବାରେ ସକ୍ଷମ ହୋଇଥିଲେ।
