ହାଟଡିହୀ,୩୦। ୧୧(ଡି.ଏନ୍.ଏ.)- କେନ୍ଦୁଝର ଜିଲାର ବଣପାହାଡ ଘେରା ହାଟଡିହୀ ବ୍ଲକର ଏକ ଅବହେଳିତ ଆଦିବାସୀ ଅଧ୍ୟୁଷିତ ଗାଁ ହଦଗଡ଼ । ଏହିଗାଁରେ ଅନେକ ଲୋକ ଦାରିଦ୍ର୍ୟ ସୀମାରେଖା ତଳେ ଜୀବନ ବିତାଉଛନ୍ତି। ସରକାର ଗରିବ ଲୋକଙ୍କ ଲାଗି କାର୍ଯ୍ୟକାରୀ କରୁଥିବା ବିଭିନ୍ନ ଯୋଜନା ଏଠି ବାଟବଣା ହୋଇପଡିଛି। ଉକ୍ତ ଗ୍ରାମର ଘାଟ ସାହିରେ ରହୁଥିବା ଦୁଇ ଅସହାୟ ମହିଳା ସମ୍ବାରୀ ଡାକୁଆ(୪୩) ଏବଂ ତାଙ୍କ ମା’ ପ୍ରମିଳା ଡାକୁଆ ଏବେ ରୋଗଗ୍ରସ୍ତ ହୋଇ ଅନାହାରରେ ଦିନ ବିତାଉଛନ୍ତି। ଘର ନ ଥିବାରୁ ଭଙ୍ଗା କୁଡିଆରେ ସେମାନେ ପଡି ରହିଛନ୍ତି। ସରକାରଙ୍କ ବିଭିନ୍ନ ଯୋଜନାରେ ହିତାଧିକାରୀ ଚୟନରେ ତ୍ରୁଟି ଯୋଗୁ ସମ୍ବାରୀ ଓ ପ୍ରମିଳାଙ୍କୁ ଘର ମିଳିପାରି ନାହିଁ ା କେବଳ ରାଶନ କାର୍ଡରେ ମିଳୁଥିବା ୫ କେଜି ଚାଉଳ ଓ ଗତ ମାସ ଠାରୁ ମିଳୁଥିବା ଭତ୍ତା ସେମାନଙ୍କ ସାହାରା ପାଲଟିଛି।
ସମ୍ବାରୀଙ୍କ ମା’ ପ୍ରମିଳା ବାର୍ଦ୍ଧକ୍ୟ ଜନିତ ଅସୁସ୍ଥତା ଯୋଗୁ ଏବେ ଶଯ୍ୟାଶାୟୀ ହୋଇପଡିଛନ୍ତି। ବହୁ କଷ୍ଟରେ ସେ ତାଙ୍କ ଝିଅ ସମ୍ବାରୀଙ୍କୁ ବିବାହ କରାଇ ଦେଇଥିଲେ। ବିବାହର ଅଳ୍ପ କିଛି ଦିନ ପରେ ତାଙ୍କ ସ୍ବାମୀ ତାଙ୍କୁ ଛାଡି ଅନ୍ୟତ୍ର ପଳାଇଗଲେ। ପରେ ଶ୍ୱଶୁର ଘରର ନିର୍ଯାତନା ସହି ନ ପାରି ସେ ବାପଘରକୁ ପଳାଇ ଆସି ଅଦ୍ୟାବଧି ଜୀବନ କାଟୁଛନ୍ତି। ପରିବାରରେ ଅନ୍ୟ କେହି ନ ଥିବାରୁ ଏହି ମା’ ଓ ଝିଅ ଅନିଶ୍ଚିତ ଭବିଷ୍ୟତକୁ ନେଇ ପଡି ରହିଛନ୍ତି। ଗତ କିଛିଦିନ ହେବ ସମ୍ବାରୀ ଏକ ଅଜଣା ରୋଗରେ ଆକ୍ରାନ୍ତ ହୋଇ ଏବେ ଯନ୍ତ୍ରଣାରେ ଛଟପଟ ହେଉଥିବା କହିଛନ୍ତି। ତାଙ୍କ ବାମ ହାତରେ ଏକ ମାଂସ ପିଣ୍ଡୁଳା ଧୀରେ ଧୀରେ ବଢୁଛି। ଅର୍ଥାଭାବରୁ ଚିକିତ୍ସା ହୋଇପାରୁନି। ଝୁମ୍ପୁଡି ଭଙ୍ଗାଦଦରା ଘର ଖଣ୍ଡିକ ବ୍ୟତୀତ ଅନ୍ୟ କିଛି ସମ୍ବଳ ନ ଥିବାରୁ ସେମାନେ ବହୁ ସମୟରେ ଅନ୍ୟ ପାଖରେ ହାତ ପତାଇ ପେଟ ପୋଷୁଥିଲେ। ଏବେ ରୋଗ ଯନ୍ତ୍ରଣା ଅଧିକ ଦାଉ ସାଧିବା ଆରମ୍ଭ କରିଛି। ଏଥିଲାଗି ଏହି ଦୁଇ ପ୍ରାଣୀ ଅଧିକାଂଶ ଦିନ ଭୋକ ଉପାସରେ ରହୁଛନ୍ତି। ୩୪ ନଂ ଜୋନର ଜିଲା ପରିଷଦ ସଦସ୍ୟା ଟିକି କିସ୍କୁ ଓ ସମାଜସେବିକା ସୁରେଶ୍ୱରୀ ସାଗରିକା ଜେନା ଏହି ପରିବାରର ଦୟନୀୟ ସ୍ଥିତି ସମ୍ପର୍କରେ ପ୍ରଶାସନର ଦୃଷ୍ଟି ଆକର୍ଷଣ କରିଛନ୍ତି। ପ୍ରଶାସନ ତୁରନ୍ତ ପଦକ୍ଷେପ ନେବାକୁ ସେମାନେ ଦାବି କରିଛନ୍ତି। ଏ ସମ୍ପର୍କରେ ପଞ୍ଚାୟତର କାର୍ଯ୍ୟନିର୍ବାହୀ ଅଧିକାରୀ ଜିତେନ୍ଦ୍ର ଜେନାଙ୍କୁ ପଚାରିବାରୁ ଖୁବ ଶୀଘ୍ର ଏହି ଅସହାୟ ମା’ ଝିଅଙ୍କୁ ସରକାରୀ ଆବାସ ଯୋଜନାରେ ଗୃହ ଯୋଗାଇ ଦେବାକୁ ପଦକ୍ଷେପ ନିଆଯିବ ବୋଲି କହିଛନ୍ତି। ଉଲ୍ଳେଖନୀୟ ଯେ, ଏହି ପଞ୍ଚାୟତରେ ଅଧିକାଂଶ ପରିବାର ଆଦିବାସୀ ଶ୍ରେଣୀର । ସେମାନଙ୍କର ଆଧାର କାର୍ଡ ନ ଥିବାରୁ ପ୍ରାୟ ୪ ଶହ ଲୋକଙ୍କ ରାଶନ କାର୍ଡ଼ କଟିଯାଇଛି। ପଳରେ ସେମାନେ ଖାଦ୍ୟ ସୁରକ୍ଷା ଯୋଜନାରୁ ବାଦ୍ ପଡିଛନ୍ତି। ଅନ୍ୟପକ୍ଷେ ପ୍ରଶାସନର ଅବହେଳା ଓ ଦୂରଦୃଷ୍ଟି ଅଭାବରୁ ବିଭିନ୍ନ ସରକାରୀ ଯୋଜନାରେ ହିତାଧିକାରୀ ଚୟନରେ ଅନିୟମିତତା ହେଉଥିବାରୁ ଅନେକ ଗରିବ ଲୋକ ଦୁର୍ଦ୍ଦଶାରେ ସମ୍ମୁଖୀନ ହେଉଥିବା ସୋସୋ ପଞ୍ଚାୟତର ପୂର୍ବତନ ସରପଞ୍ଚ ବୈଲୋଚନ ନାୟକ କହିଛନ୍ତି। ଏହି ପଞ୍ଚାୟତରେ ବହୁ ଗରିବ ଲୋକ ଭତ୍ତା, ସରକାରୀ ଆବାସ, ଖାଦ୍ୟ ସୁରକ୍ଷା ପ୍ରଭୃତି ବିଭିନ୍ନ ଯୋଜନାରୁ ବାଦ୍ ପଡିଥିବାରୁ ଜିଲାପାଳ ଏଥିପ୍ରତି ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବା ସକାଶେ ପୂର୍ବତନ ସମିତି ସଭ୍ୟ ବୀରେନ୍ଦ୍ର ବିଶ୍ୱାଳ ଓ ଆନନ୍ଦପୁର ସିଭିଲ ସୋସାଇଟି ସମ୍ପାଦକ ଭଗବାନ ମଲ୍ଲିକ ଦାବି କରିଛନ୍ତି।