ପୁରୀ ଅଫିସ,୨୭।୧୧: ୮ ମାସର ବକେୟା ଦରମା ପ୍ରଦାନ ଦାବିରେ ମେଡିକାଲ ଠିକା କର୍ମଚାରୀ ସଂଘ ପକ୍ଷରୁ ବୁଧବାର ମେଡିକାଲ ପରିସରରେ ଥିବା ଗୋପବନ୍ଧୁଙ୍କ ପ୍ରତିମୂର୍ତ୍ତି ତଳେ ଅନିଦ୍ଧିଷ୍ଟ କାଳ ପାଇଁ ଧାରଣା ଦିଆଯାଇଛି। ଦାବି ପୂରଣ ନ ହେବା ପର୍ଯ୍ୟନ୍ତ ଏହି ଧାରଣା ଜାରି ରହିବ ବୋଲି ସଂଘ ସଭାପତି ଶରତ ରାୟଗୁରୁ କହିଛନ୍ତି।
ସଂଘ ସମ୍ପାଦକ ଅନିଲ ମୁଦୁଲିଙ୍କ କହିବାନୁଯାୟୀ, ମେଡିକାଲ ଜେଡ୍ଏସ୍ଏସ୍ ଏବଂ ଆଉଟ୍ ସୋରସିଂ ଅଧୀନରେ ୧୧୦ଜଣ ଠିକା କର୍ମଚାରୀ କାମ କରୁଛନ୍ତି। ଦରମା ପ୍ରଦାନ ଦାବିରେ ସିଡିଏମ୍ଓଙ୍କଠାରୁ ଜିଲା ପ୍ରଶାସନ ଓ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରାଯାଇଛି। ପ୍ରତିଶ୍ରୁତି ବ୍ୟତିତ କୌଣସି ପଦକ୍ଷେପ ଗ୍ରହଣ କରାଯାଇନାହିଁ। ନିକଟରେ ଏନ୍ଏଚ୍ଏମ୍ ନିର୍ଦ୍ଦେଶିକା ଶାଲିନୀ ପଣ୍ଡିତଙ୍କୁ ସିଡିଏମ୍ଓଙ୍କ କାର୍ଯ୍ୟାଳୟରେ ତାଲା ପକାଇ ଧାରଣା ଦିଆଯାଇଥିଲା। ସେହିଭଳି ସିଡିଏମ୍ଓ ନୀଳକଣ୍ଠ ମିଶ୍ର କୁହନ୍ତି, ଏନେଇ ସ୍ବାସ୍ଥ୍ୟ ବିଭାଗକୁ ଅବଗତ କରାଯାଇଛି। ଅପରପକ୍ଷେ ଠିକା କର୍ମଚାରୀଙ୍କ ଧାରଣା ଯୋଗୁ ମେଡିକାଲରେ ଅଚଳାବସ୍ଥା ଜାରି ରହିଛି।