ଅନୁଗୋଳ ଅଫିସ, ୨୪ା୧୦: ଅନୁଗୋଳ ସହରରେ ଅନୁଷ୍ଠିତ ଲକ୍ଷ୍ମୀପୂଜା ମଙ୍ଗଳବାର ଶେଷ ହୋଇଥିବା ବେଳେ ବୁଧବାର ଭସାଣି ପର୍ବ ଅନୁଷ୍ଠିତ ହୋଇଯାଇଛି। ଅପରାହ୍ନରେ ମେଲଣ ଉତ୍ସବକୁ ସେଣ୍ଟ୍ରାଲ ପୂଜା କମିଟି ସଦସ୍ୟ ଓ ଏସ୍ଡିପିଓ ଅଶ୍ୱିନୀ ସାହୁ ପତାକା ଦେଖାଇ ଶୁଭାରମ୍ଭ କରିଥିଲେ। ଥାନା ଛକକୁ ବିଭିନ୍ନ ମଣ୍ଡପରୁ ମେଢ଼ ଶୋଭାଯାତ୍ରାରେ ଆସି ମେଲଣରେ ସାମିଲ ହୋଇଥିଲେ। ପରେ ଧୁମ୍ଧାମରେ ଭସାଣି ଶୋଭାଯାତ୍ରା ଆରମ୍ଭ ହୋଇଥିଲା। ବିଭିନ୍ନ ଅଞ୍ଚଳରୁ ଆସିଥିବା ନୃତ୍ୟଦଳ, ବ୍ରାସପାର୍ଟି ଶବ୍ଦରେ ସହର ଦୁଲୁକି ଉଠିଥିଲା। ସେହିପରି ହୁଲୁରିସିଂହା ଓ ବସ୍ଷ୍ଟାଣ୍ଡ ପୂଜା କମିଟି ମଧ୍ୟରେ ଆତସବାଜି ପ୍ରଦର୍ଶନ ବେଳେ ରଙ୍ଗବେରଙ୍ଗର ଆଲୋକରେ ଆକାଶ ଆଲୋକିତ ହୋଇଉଠିଥିଲା।
ଭସାଣି ପାଇଁ ପୂଜା କମିଟି କର୍ମକର୍ତ୍ତାଙ୍କ ମଧ୍ୟରେ ପ୍ରବଳ ଉତ୍ସାହ ପରିଲକ୍ଷିତ ହୋଇଥିଲା। ଘଣ୍ଟ, ଘଣ୍ଟା ସାଙ୍ଗକୁ ପାରମ୍ପରିକ ବାଦ୍ୟ ଯନ୍ତ୍ର, ରାଜ୍ୟ ବାହାରୁ ଆସିଥିବା ବାଦ୍ୟ ସହ ବ୍ରାସ୍ ପାର୍ଟିର ତାଳେ ତାଳେ ସେମାନେ ନୃତ୍ୟ କରୁଥିବା ବେଳେ ବର୍ଷାକୁ ମଧ୍ୟ ଖାତିର କରି ନ ଥିଲେ। ଚଳିତବର୍ଷ ଏହି ଭସାଣି ଉତ୍ସବରେ ଆଦିବାସୀ ନୃତ୍ୟ ସାଙ୍ଗକୁ ବିଭିନ୍ନ ପାରମ୍ପରିକ ନୃତ୍ୟ ଓ ବାଦ୍ୟଯନ୍ତ୍ର ସାମିଲ ହୋଇଥିଲା। ଛତିଶଗଡ଼ରୁ ଆସିଥିବା ଧୁମାଲ ବାଜା ଲୋକଙ୍କୁ ବେଶ୍ ପ୍ରଭାବିତ କରିଥିଲା। ସେହିପରି ବ୍ରାସପାର୍ଟିର ଗୋଟିଏ ପରେ ଗୋଟିଏ ସୁପରହିଟ୍ ଗୀତ ସମସ୍ତଙ୍କୁ ମତୁଆଲା କରୁଥିଲା। ହଜାର ହଜାର ଲୋକ ମା’ଙ୍କ ଭସାଣି ଶୋଭାଯାତ୍ରା ଦେଖିବାକୁ ମଧ୍ୟାହ୍ନରୁ ଭିଡ଼ ଜମାଇଥିଲେ। ସକାଳ ବର୍ଷା ପରେ କିଛି ସମୟ ପାଇଁ ପାଗ ଶୁଖିଲା ରହିବାରୁ ଭିଡ଼ ବେଶ୍ ବଢ଼ିଯାଇଥିଲା। ତେବେ ସନ୍ଧ୍ୟାରେ ରାସ୍ତା ପାର୍ଶ୍ୱରେ ହଜାର ହଜାର ଦର୍ଶକ ଉପସ୍ଥିତ ରହି ଶୋଭାଯାତ୍ରା ଉପଭୋଗ କରିବା ସହ ମା’ଙ୍କୁ ମେଲାଣି ଜଣାଇଥିଲେ। ପ୍ରଥମେ ହୁଲୁରୁସିଂହା ଲକ୍ଷ୍ମୀ ପୂଜା କମିଟି ମେଢ଼ ଥିବାବେଳେ ଦ୍ୱିତୀୟରେ ବସ୍ଷ୍ଟାଣ୍ଡ ଲକ୍ଷ୍ମୀ ପୂଜା କମିଟି, ତୃତୀୟରେ ଲକ୍ଷ୍ମୀ ବଜାର, ଆନନ୍ଦ ବଜାର, ବଜାର ଛକ, ଭଣ୍ଡୁବର, ନିୟୁ ଡେଲି ମାର୍କେଟ, କଲେଜ ଛକ, ପଞ୍ଚାୟତ ଇଣ୍ଡଷ୍ଟ୍ରିଜ ଛକ, କାଞ୍ଚନଟକିଜ ଛକ, ଆଶ୍ରମ ଛକ ମେଢ଼ ରହିଥିଲେ। ସବୁମେଢ଼ ମେଲଣ ପଡ଼ିଆରେ ପହଞ୍ଚିବା ପରେ ସେଠାରେ ଆତସବାଜି ପ୍ରତିଯୋଗିତା ଆରମ୍ଭ ହୋଇଥିଲା। ସେହିପରି ଭସାଣିରେ ସାମିଲ ହୋଇ ନ ଥିବା ମେଢ଼ ଗୁଡ଼ିକ ଅଲଗା ରାସ୍ତାରେ ଶୋଭାଯାତ୍ରାରେ ଯାଇଥିଲେ।