ଅନୁଗୋଳ ଅଫିସ, ୫।୪- କରୋନା ଆକ୍ରାନ୍ତଙ୍କ ଚିକିତ୍ସା ବେଳେ ଡାକ୍ତର, ନର୍ସ ଓ ଅନ୍ୟ ସହଯୋଗୀମାନେ ପର୍ସନାଲ ପ୍ରୋଟେକ୍ଶନ୍ ଇକ୍ୟୁପମେଣ୍ଟ(ପିପିଇ) ପିନ୍ଧିବା ଜରୁରୀ। ନଚେତ ସେମାନେ ମଧ୍ୟ ଏହି ମାରାତ୍ମକ ଭୂତାଣୁ ଦ୍ୱାରା ସଂକ୍ରମିତ ହେବାର ଭୟ ରହିଛି। କିନ୍ତୁ ଅନୁଗୋଳ ଜିଲାରେ ଏହି ପିପିଇ ଏବେ ପର୍ଯ୍ୟାପ୍ତ ପରିମାଣର ନାହିଁ। ଯଦିଓ ଏଯାଏ ଜିଲାର କୌଣସି ବ୍ୟକ୍ତି କରୋନାରେ ସଂକ୍ରମିତ ହୋଇନାହାନ୍ତି ତଥାପି ଦୈନିକ ସନ୍ଦିଗ୍ଧଙ୍କ ସଂଖ୍ୟା ମେଡିକାଲଗୁଡ଼ିକରେ ବଢ଼ୁଥିବାରୁ ଡାକ୍ତର ଓ ନର୍ସଙ୍କ ପାଇଁ ପିପିଇର ଅଧିକ ଆବଶ୍ୟକତା ରହିଛି। ହେଲେ ଆଗୁଆ ପ୍ରସ୍ତୁତି କରିବା ପରିବର୍ତ୍ତେ ଜିଲା ମୁଖ୍ୟ ଚିକିତ୍ସାଳୟ ପକ୍ଷରୁ ଏଥିପାଇଁ ଅର୍ଡର ଦିଆଯାଇଥିବା ସୂଚନା ମିଳିଛି।
ଅନୁଗୋଳ ଜିଲା ପ୍ରଶାସନ ପକ୍ଷରୁ କରୋନା ମୁକାବିଲା ନିମନ୍ତେ ବିଭିନ୍ନ ପଦକ୍ଷେପ ନିଆଯାଇଛି। ଜିଲାର ୨୨୫ଟି ପଞ୍ଚାୟତ ସହ ଦୁଇଟି ପୌରପାଳିକା ଓ ଗୋଟିଏ ଏନ୍ଏସିରେ ୨୩୫ଟି କ୍ବାରାଣ୍ଟାଇନ୍ ସେଣ୍ଟର ଖୋଲାଯାଇଛି। ପ୍ରତି ପଞ୍ଚାୟତରେ ମଧ୍ୟ ଗୋଟିଏ ଲେଖାଏ ଅସ୍ଥାୟୀ ମେଡିକାଲ କ୍ୟାମ୍ପ କରାଯାଇଛି। ଏସବୁ ସେଣ୍ଟରରେ ବହୁ ଲୋକଙ୍କୁ କ୍ୱାରାଣ୍ଟାଇନ୍ରେ ରଖାଯାଇଛି। ସେହିପରି ଜିଲା ମୁଖ୍ୟ ଚିକିତ୍ସାଳୟରେ କରୋନା ୱାର୍ଡ ଖୋଲାଯାଇଥିବା ବେଳେ ଦୈନିକ ସନ୍ଦିଗ୍ଧମାନେ ଏଠାକୁ ଚିକିତ୍ସା ଓ ରକ୍ତ ପରୀକ୍ଷା ପାଇଁ ଆସୁଛନ୍ତି। କିନ୍ତୁ ଏଯାଏ ଡାକ୍ତର ଓ ନର୍ସମାନଙ୍କୁ ପର୍ଯ୍ୟାପ୍ତ ପରିମାଣର ପିପିଇ ଯୋଗାଇ ଦିଆଯାଇ ନ ଥିବାରୁ ସେମାନଙ୍କ ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ନେଇ ଜିଲାପାଳ ମନୋଜ କୁମାର ମହାନ୍ତି କହିଛନ୍ତି, ବ୍ଲକରେ ଖୋଲାଯାଇଥିବା କ୍ବାରାଣ୍ଟାଇନ୍ ସେଣ୍ଟର ଓ ଅସ୍ଥାୟୀ ମେଡିକାଲ କ୍ୟାମ୍ପଗୁଡ଼ିକରେ ପିପିଇର ଆବଶ୍ୟକତା ନାହିଁ। କେବଳ କରୋନା ଆକ୍ରାନ୍ତଙ୍କ ଚିକିତ୍ସା କରୁଥିବା ଡାକ୍ତରମାନଙ୍କୁ ଏହା ଯୋଗାଇ ଦିଆଯିବ। ଏବେ ମେଡିକାଲରେ ଯେତିକି ପିପିଇ ରହିଛି, ସେଥିରେ କାମ କରାଯାଉଛି। ଆବଶ୍ୟକତା ଅନୁଯାୟୀ ଅଧିକ ପିପିଇ ଆଣିବାକୁ ଜିଲା ମୁଖ୍ୟ ଚିକିତ୍ସାଧାରୀଙ୍କୁ କୁହାଯାଇଥିବା ଜିଲାପାଳ ପ୍ରକାଶ କରିଛନ୍ତି।