ଅନୁଗୋଳ ଅଫିସ, ୨୬।୨ – ବର୍ଷା ପାଗ ସତ୍ତ୍ୱେ ମଙ୍ଗଳବାର ଅନୁଗୋଳ ପୋଲିସ ପକ୍ଷରୁ ସହରରେ ଜୋରଦାର ଚେକିଂ କରାଯାଇଛି। ସହର ଉପକଣ୍ଠରେ ନାକାବନ୍ଦୀ କରାଯାଇ ସମସ୍ତ ଗାଡ଼ି ଅଟକାଯାଇ ଯାଞ୍ଚ କରାଯାଇଥିଲା। ସକାଳୁ ଆରମ୍ଭ ହୋଇଥିବା ଏହି ତନଖି ଅପରାହ୍ନରେ ମଧ୍ୟ ଜାରି ରହିଥିଲା। ତେବେ ପାଗ ଏତେ ଖରାପ ସତ୍ତ୍ୱେ ହଠାତ୍ ଅନୁଗୋଳ ପୋଲିସ କାହିଁକି ଏପରି ଯାଞ୍ଚ କରିବାକୁ ମନ ବଳାଇଲା ତାହାକୁ ନେଇ ସାଧାରଣରେ ନାନା ଆଲୋଚନା ହେଉଛି। କାଳେ ପାଗର ଫାଇଦା ଉଠାଇ ଲୁଟେରାମାନେ କିଛି ବଡ଼ଧରଣର ଲୁଟ୍ପାଟ କରିଦେବେ ସେହି ଆଶଙ୍କାରେ ପୋଲିସ ଏପରି ଚେଇଁ ଉଠିଥିବା ଚର୍ଚ୍ଚା ହେଉଛି।
ସହରବାସୀଙ୍କ କହିବା ଅନୁଯାୟୀ, ଅନେକ ସମୟରେ ଦୁର୍ବୃତ୍ତମାନେ ଅନୁଗୋଳ ପୋଲିସକୁ ଚକ୍ମା ଦେବାର ନଜିର ରହିଛି। ଏପରି କି ସ୍ପଷ୍ଟ ଦିବାଲୋକରେ ମଧ୍ୟ ସେମାନେ ରାସ୍ତାରେ ଲୁଟପାଟ କରିବା ସହ ଘରେ ପଶି କଳାକନା ବୁଲାଇ ଦେଉଛନ୍ତି। ତେଣୁ ପାଗ କୋହଲା ଥିବାରୁ କାଳେ ଲୁଟେରାମାନେ ପୋଲିସକୁ ଚ୍ୟାଲେଞ୍ଜ ଦେବେ ସେହି ଆଶଙ୍କାରେ ସହରରେ ଏପରି ଯାଞ୍ଚ କରାଯାଇଥିଲା। ସହର ଉପକଣ୍ଠ ପଞ୍ଚମହଲା ଓ କୁରୁଡ଼ୁଲରେ ନାକାବନ୍ଦୀ କରି ପୋଲିସ ଗାଡ଼ିଗୁଡ଼ିକ ଯାଞ୍ଚ କରିଥିଲା। କାଗଜପତ୍ର ସହ ଡିକି ଓ ପରିଚୟପତ୍ର ଦେଖିଥିଲା। ଯେଉଁ ବ୍ୟକ୍ତିଙ୍କ ଉପରେ ସନ୍ଦେହ ହେଉଥିଲା ସେମାନଙ୍କୁ ଅଧିକ ପଚରା ଉଚରା କରୁଥିଲା। ଅପରାହ୍ନରେ ସହରର ଶୀତଲ ପ୍ଲାଜା ସମ୍ମୁଖରେ ଦୁଇଟି ଗାଡ଼ିରେ ଆସୁଥିବା ରାଜସ୍ଥାନୀ ତାୱା ବ୍ୟବସାୟୀଙ୍କୁ ତଢ଼ିବା ସହ ଥାନାକୁ ନେଇ ପଚରା ଉଚରା କରିଥିଲା। ଏ ସମ୍ପର୍କରେ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ କହିଛନ୍ତି, ଏହା ପୋଲିସର ନିୟମିତ ଚେକିଂ। ଯେଉଁମାନଙ୍କ ଉପରେ ସନ୍ଦେହ ସୃଷ୍ଟି ହେଉଛି ସେମାନଙ୍କୁ ପଚରା ଉଚରା କରାଯାଇ ଛାଡ଼ି ଦିଆଯାଉଛି। ଅନ୍ୟପକ୍ଷରେ ରାଜସ୍ଥାନୀ ତାୱା ବ୍ୟବସାୟୀ କହିଛନ୍ତି, ଭୁବନେଶ୍ୱରରେ ବ୍ୟବସାୟ ସାରି ଦୁଇଟି ଗାଡ଼ିରେ ୯ ଜଣ ଫେରୁଥିଲୁ। ବାଟରେ ବର୍ଷା ପାଇଁ ସୋମବାର ରାତିରେ ଅନୁଗୋଳରେ ରହିଯାଇଥିଲୁ। ରାସ୍ତା ଖର୍ଚ୍ଚ ଉଠିଯିବ ଭାବି ମଙ୍ଗଳବାର ଅପରାହ୍ନ ଯାଏ ରହି ବ୍ୟବସାୟ କରୁଥିଲୁ। କିନ୍ତୁ ଘରକୁ ବାହାରିବା ବେଳକୁ ପୋଲିସ ଥାନାରେ ଆଣି ବସାଇ ଦେଇଥିବା କଥା ବ୍ୟବସାୟୀମାନେ କହିଛନ୍ତି।