ଅନୁଗୋଳ ଅଫିସ, ୧୮।୧୨- ଚୋରା କୋଇଲା କାରବାର କରୁଥିବା ଏକ ଗ୍ୟାଙ୍ଗର ୪ଜଣଙ୍କୁ ଅନୁଗୋଳ ପୋଲିସ କାବୁ କରିଛି। ଏଥିସହ ସମ୍ପୃକ୍ତ ମାଫିଆଙ୍କ ନିକଟରୁ ବିପୁଳ ପରିମାଣର ଚୋରା କୋଇଲା ସହ ଏକ ଗାଡ଼ି ଜବତ କରାଯାଇଛି। ଏହି ଘଟଣାରେ ଅନ୍ୟ ଦୁଇ ଜଣ ଫେରାର ଥିବା ବେଳେ ଆମ୍ବପାଳ ଜଙ୍ଗଲରେ ୬୧.୬୭୦ ମେଟ୍ରିକ ଟନ୍ ଚୋରା କୋଇଲା ଗଚ୍ଛିତ ହୋଇଥିବା ଡିପୋ ଓ ନତଡ଼ା ଗୀତା ଆଶ୍ରମ ନିକଟରେ ଗଚ୍ଛିତ ଥିବା ୧୫.୨୬୦ ମେଟ୍ରିକ ଟନ୍ କୋଇଲା ଜବତ କରାଯାଇଥିବା ଅନୁଗୋଳ ପୋଲିସ ପକ୍ଷରୁ ଏକ ପ୍ରେସ୍ ବିଜ୍ଞପ୍ତି ମାଧ୍ୟମରେ ଅବଗତ କରାଯାଇଛି। ତାଳଚେରର କୋଇଲା ଖଣିରୁ ଚୋରାରେ କୋଇଲା ଆଣି କଟକ ଜିଲାର ନରସିଂହପୁର ଅଞ୍ଚଳକୁ ଏମାନେ ଚାଲାଣ କରୁଥିବା ପଚରା ଉଚରା ସମୟରେ ଅଭିଯୁକ୍ତମାନେ ସୂଚନା ଦେଇଥିବା ପୋଲିସ କହିଛି। ଏ ସଂକ୍ରାନ୍ତରେ ଅନୁଗୋଳ ପୋଲିସ ନଂ. ୧୦୬୫/୧୯ରେ ଏକ ମାମଲା ରୁଜୁ କରିଛି।