ଅନୁଗୋଳ ଅଫିସ, ୧୧।୧ – ଅନୁଗୋଳ ପୌରପାଳିକାରେ ଶୁକ୍ରବାର ଠାରୁ ଏଫ୍ଏସ୍ଏମ୍ ନିୟମ ଲାଗୁ ହୋଇଛି। ଏଥିସହ ଅନୁଗୋଳ ଜିଲାରେ ଥିବା ତାଳଚେର ପୌରପାଳିକା ଓ ଆଠମଲ୍ଲିକ ଏନ୍ଏସିରେ ମଧ୍ୟ ଏହା ଲାଗୁ କରାଯାଇଛି। ଏ ନେଇ ଶୁକ୍ରବାର ଅନୁଗୋଳ ପୌରପାଳିକା କାଉନସିଲ ହଲ ଠାରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଭୁବନେଶ୍ୱରରୁ ଦୁଇ ଜଣ ଟିମ୍ ଲିଡର ଆସି ଏଫଏସ୍ଏମ୍ ସମ୍ପର୍କରେ ପ୍ରଶିକ୍ଷଣ ପ୍ରଦାନ କରିଥିଲେ।
ଏଣିକି ସହରରେ ପାଇଖାନା ସଫା କରୁଥିବା ଘରୋଇ ସଂସ୍ଥାଗୁଡ଼ିକ ପାଇଁ ନୂଆ ନିୟମ ଆସିଛି। ପୌରପାଳିକାରେ ପ୍ରଥମେ ଘରୋଇ ସଂସ୍ଥା ପଞ୍ଜୀକରଣ କରିବା ପରେ ପାଇଖାନା ସଫେଇ କରିପାରିବେ। ନଚେତ ପୌରପାଳିକା ନିକଟରେ ଜରିମାନା ଗଣିବାକୁ ପଡ଼ିବ। ଏହି ନିୟମ ଅନୁଗୋଳ ପୌରପାଳିକାରେ ଶୁକ୍ରବାରଠାରୁ ଲାଗୁ ହୋଇଥିବାବେଳେ ପରେ ଏହା ଅନ୍ୟ ପୌରପାଳିକା ଓ ଏନ୍ଏସିରେ ଲାଗୁ କରାଯିବ। ପାଇଖାନା ସଫା କରୁଥିବା ଗାଡ଼ିଗୁଡ଼ିକ ପୌରପାଳିକାର ପରିମଳ ବିଭାଗରେ ପଞ୍ଜୀକରଣ କରିସାରିବା ପରେ ଲୋକଙ୍କ ପାଇଖାନା ସଫା କରିପାରିବେ। ଏପରି କି ପାଇଖାନାରୁ ବାହାରୁଥିବା ମଳପଙ୍କକୁ ନେଇ ପଞ୍ଚମହଲା ଠାରେ ନିର୍ମାଣ ହୋଇଥିବା ଲିକ୍ୱିଇଡ ୱେଷ୍ଟ ମ୍ୟାନେଜମେଣ୍ଟ ପ୍ଲାଣ୍ଟରେ ପକାଇବେ। ଏଥିରେ ଖିଲାପ କଲେ ପୌରପାଳିକା ୫୦ ଟଙ୍କାରୁ ଆରମ୍ଭ କରି ୫ ହଜାର ଟଙ୍କା ପର୍ଯ୍ୟନ୍ତ ଜରିମାନା ଆଦାୟ କରିପାରିବ। ଏଥିସହ ଗାଡ଼ି ମଧ୍ୟ ସିଜ୍ କରିବା କ୍ଷମତା ନିର୍ବାହୀ ଅଧିକାରୀଙ୍କୁ ପ୍ରଦାନ କରାଯାଇଛି। ଏ ନେଇ ପୌରପାଳିକାର କାଉନସିଲ୍ ହଲଠାରେ ଏଫ୍ଏସ୍ଏମ୍ର ଟିମ୍ ଲିଡର ରିତିକ୍ ଜୈନ୍ ଓ ସିକିଲ୍ ମିଶ୍ର ଯୋଗଦେଇ କିପରି ଗାଡ଼ିଗୁଡ଼ିକର ପଞ୍ଜୀକରଣ କରାଯିବ ଓ ୱେଷ୍ଟ ମ୍ୟାନେଜମେଣ୍ଟ ପ୍ଲାଣ୍ଟ ବ୍ୟବହାର ହେବ ସେ ନେଇ ପ୍ରଶିକ୍ଷଣ ପ୍ରଦାନ କରିଛନ୍ତି। ଏହି ଶିବିରରେ ଅନୁଗୋଳ ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା, ଡୁଡ଼ା ଅନୁଗୋଳର ବଦ୍ରିନାରାୟଣ ଦାସ, ଆଠମଲ୍ଲିକ ବିଜ୍ଞାପିତ ପରିଷଦର ଅଧିକାରୀ, ତାଳଚେର ପୌରପାଳିକା ନିର୍ବାହୀ ଅଧିକାରୀଙ୍କ ପ୍ରତିନିଧି ପ୍ରମୁଖ ଉପସ୍ଥିତ ଥିଲେ।