ଅନୁଗୋଳ ଅଫିସ,୮।୮ – ଅନୁଗୋଳ ପୌରପାଳିକା ପକ୍ଷରୁ ବୁଧବାର ଏକ ବଡ଼ ପଦକ୍ଷେପ ନିଆଯାଇଛି। ସହରରେ ବୁଲି ଠେଲାରେ ଫଳ ବ୍ୟବସାୟ କରୁଥିବା ବ୍ୟବସାୟୀଙ୍କୁ ଡେଲି ମାର୍କେଟରେ ବ୍ୟବସାୟ ପାଇଁ କୁହାଯାଇଛି। ଏପରି କି ସହରର ବିଭିନ୍ନ ସ୍ଥାନରେ ବସୁଥିବା ପରିବା ବ୍ୟବସାୟୀଙ୍କୁ ମଧ୍ୟ ଡେଲି ମାର୍କେଟ ପଠାଯାଇଛି। ପ୍ରଥମ ପର୍ଯ୍ୟାୟରେ ବିଭିନ୍ନ ସ୍ଥାନରୁ ୨୦ ଜଣ ବ୍ୟବସାୟୀ ଡେଲି ମାର୍କେଟରେ ବ୍ୟବସାୟ କରିଥିବା ପୌର ନିର୍ବାହୀ ଅଧିକାରୀ ଶୁଭେନ୍ଦୁ ଜେନା ସୂଚନା ଦେଇଛନ୍ତି।
ଅନୁଗୋଳ ସହରର ଏପରି କି ବସ୍ଷ୍ଟାଣ୍ଡ, ଷ୍ଟେଟବ୍ୟାଙ୍କ ଛକ ଓ ବ୍ଲକ ଛକରେ ପସରା ମେଲାଉଥିବା ପରିବା ଓ ଠେଲା ବ୍ୟବସାୟୀ ଏବେ ପୌରପାଳିକାର ଡେଲି ମାର୍କେଟରେ ବ୍ୟବସାୟ କରିବେ। ଏ ନେଇ ଠେଲା ଦୋକାନୀ ଓ ପରିବା ବ୍ୟବସାୟ କରୁଥିବା ଚାଷୀଙ୍କ ସହ ବ୍ୟବସାୟୀଙ୍କୁ ଡାକି ପୌର ପ୍ରଶାସନ ଏଭଳି ନିଷ୍ପତ୍ତି ନେଇଛି। ସହରର ଗୋଟିଏ ସ୍ଥାନରେ ସବୁ ଫଳ ଓ ପରିବା ଲୋକଙ୍କ ପାଇଁ ଉପଲବ୍ଧ ହେବ। ପ୍ରଥମ ଦିନରେ ୨୦ ଜଣ ବ୍ୟବସାୟୀ ଯାଇଥିବାବେଳେ ଅନ୍ୟମାନେ ଖୁବ୍ ଶୀଘ୍ର ଡେଲି ମାର୍କେଟରେ ପହଞ୍ଚିବେ ବୋଲି ପୌରପାଳିକା ପକ୍ଷରୁ କୁହାଯାଇଛି। ସହରର ବିଭିନ୍ନ ସ୍ଥାନରେ ପରିବା ବ୍ୟବସାୟୀ ବସି ବେପାର କରୁଥିବାରୁ ଟ୍ରାଫିକ ସମସ୍ୟା ଉପୁଜୁଥିଲା। ଏପରି କି ଫଳ ବ୍ୟବସାୟୀମାନେ ନିଜର ଠେଲା ବସ୍ଷ୍ଟାଣ୍ଡ ଓ ବ୍ଲକ ଛକରେ ପକାଉଥିବାରୁ ଯାତ୍ରୀଙ୍କ ଯିବା ଆସିବାରେ ବାଧା ଉପୁଜୁଥିଲା। ଏହାକୁ ଦୃଷ୍ଟିରେ ରଖି ପୌରପାଳିକା ପକ୍ଷରୁ ଏଭଳି ପଦକ୍ଷେପ ଗ୍ରହଣ କରାଯାଇଛି। ଡେଲି ମାର୍କେଟକୁ ଯାଇଥିବା ଫଳ ବ୍ୟବସାୟୀ ଓ ପରିବା ବ୍ୟବସାୟୀଙ୍କ ପାଇଁ ଭବିଷ୍ୟତରେ ଭେଣ୍ଡିଂ ଜୋନ କରାଯିବାର ବ୍ୟବସ୍ଥା ମଧ୍ୟ ରହିଛି। ଏ ନେଇ ପ୍ରକ୍ରିୟା ମଧ୍ୟ ଆରମ୍ଭ ହୋଇଛି। ଏହା ହେବା ପରେ ସମ୍ପୃକ୍ତ ବ୍ୟବସାୟୀମାନେ ଭେଣ୍ଡିଂ ଜୋନ୍ରେ ବ୍ୟବସାୟ କରିବେ। ସେହିପରି ଲୋକଙ୍କୁ ବିଭିନ୍ନ ସ୍ଥାନକୁ ଯାଇ ପରିବା ଓ ଫଳ କିଣିବାକୁ ପଡ଼ିବ ନାହିଁ। ଫଳରେ ସହର ସୁନ୍ଦର ଦେଖାଯିବା ସହ ଗୋଟିଏ ସ୍ଥାନରେ ଲୋକମାନେ ଫଳ ଓ ପରିବା ପାଇପାରିବେ ବୋଲି ପୌରନିର୍ବାହୀ ଅଧିକାରୀ ଜେନା କହିଛନ୍ତି।