ଅନୁଗୋଳ ଅଫିସ, ୩୦ା୧୦-ରାଜ୍ୟ ସରକାରଙ୍କ ‘ମୋ ସରକାର’ କାର୍ଯ୍ୟକ୍ରମ ଆରମ୍ଭ ପରେ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ରୋଗୀଙ୍କୁ କିପରି ସ୍ବାସ୍ଥ୍ୟସେବା ଯୋଗାଇ ଦିଆଯାଉଛି ମଙ୍ଗଳବାର ତାହାର ଅନୁଧ୍ୟାନ କରିଛନ୍ତି ୫-ଟି ସଚିବ ଭି. କାର୍ତ୍ତିକେୟନ ପାଣ୍ଡିଆନ। ପୂର୍ବାହ୍ନ ୧୧ଟା ୫୦ରେ ସଚିବ ମେଡିକାଲରେ ପହଞ୍ଚି ପ୍ରଥମେ ଯକ୍ଷ୍ମା ଓ୍ବାର୍ଡକୁ ଯାଇଥିଲେ। ଏଥିସହ ବିଭିନ୍ନ ୱାର୍ଡରେ ଚିକିତ୍ସିତ ହେଉଥିବା ୧୫ ଜଣ ରୋଗୀଙ୍କ ସହ ଆଲୋଚନା କରି ସ୍ବାସ୍ଥ୍ୟସେବା ସମ୍ପର୍କରେ ବୁଝିଥିଲେ। ତେବେ ଜଣେ ରୋଗୀଙ୍କୁ ବାହାରୁ ମେଡିସିନ୍ ଆଣିବାକୁ କୁହାଯାଇଥିବାରୁ ୫-ଟି ସଚିବ ମେଡିକାଲ କର୍ତ୍ତୃପକ୍ଷଙ୍କ ଉପରେ ଖପ୍ପା ହୋଇଥିଲେ। କିନ୍ତୁ ମେଡିକାଲର ପରିମଳ ଓ ସୁବ୍ୟବସ୍ଥାକୁ ନେଇ ସଚିବ ସନ୍ତୋଷ ବ୍ୟକ୍ତ କରିବା ସହ ପରେ ଡାକ୍ତର ଓ ପଦାଧିକାରୀଙ୍କୁ ନେଇ ଏକ ବୈଠକ କରିଥିଲେ। ସଚିବଙ୍କ ସହ ଏନଏଚ୍ଏମ୍ ଡାଇରେକ୍ଟର ଶାଳିନ୍ ପଣ୍ଡିତ, ଅର୍ଥ ବିଭାଗ ପ୍ରମୁଖ ସଚିବ ଅଶୋକ କେ.କେ. ମୀନା, ଡିଆଇଜି ନରସିଂହ ଭୋଳ, ଜିଲାପାଳ ମନୋଜ କୁମାର ମହାନ୍ତି, ଉପଜିଲାପାଳ ବାସୁଦେବ ଶତପଥୀ, ସିଡିଏମ୍ଓ ଡା. ଅମରେନ୍ଦ୍ର ନାଥ ମହାନ୍ତି ପ୍ରମୁଖ ଉପସ୍ଥିତ ଥିଲେ।
ଯକ୍ଷ୍ମା ଓ୍ବାର୍ଡ ବୁଲିବା ପରେ ସଚିବ ପୁରୁଷ ମେଡିସିନ୍ ୱାର୍ଡ, ୬ ମହଲାରେ ଥିବା ସ୍ତ୍ରୀ ଓ ପ୍ରସୂତି ବିଭାଗ, ଶିଶୁ ରୋଗ ଚିକିତ୍ସା ବିଭାଗ ଆଦି ପରିଦର୍ଶନ କରିଥିଲେ। ବାରଣ୍ଡାରେ ରୋଗୀ ଚିକିତ୍ସିତ ହେଉଥିବା ବେଳେ ମେଡିସିନ୍ ଓ ପେଡିଆଟିକ୍ସ ୱାର୍ଡରେ ଶଯ୍ୟା ସଂଖ୍ୟା କମ୍ ଥିବାରୁ ତାହାକୁ ବୃଦ୍ଧି କରିବାକୁ ସଚିବ ପ୍ରସ୍ତାବ ଦେଇଥିଲେ। ପୁରୁଷ ମେଡିସିନ୍ ୱାର୍ଡରେ ବାହାରୁ ମେଡିସିନ୍ କିଣା ହେବା ନେଇ ସିଡିଏମ୍ଓଙ୍କୁ ତାଗିଦ୍ କରିଥିଲେ। ତୁରନ୍ତ ସମ୍ପୃକ୍ତ ରୋଗୀଙ୍କୁ ଟଙ୍କା ଫେରସ୍ତ କରିବାକୁ ନିର୍ଦ୍ଦେଶ ଦେଇଥିଲେ। ଏହାପରେ ସମ୍ମିଳନୀ କକ୍ଷରେ ମେଡିକାଲ କର୍ତ୍ତୃପକ୍ଷ, ଡାକ୍ତର, ମେଡିକାଲ ମ୍ୟାନେଜର, ଆରଆଣ୍ଡବି ନିର୍ବାହୀ ଯନ୍ତ୍ରୀ, ଜିଲା ପ୍ରଶାସନ ସହ ୫-ଟି ସଚିବ ବୈଠକ କରିଥିଲେ। ମେଡିକାଲର ଭିତ୍ତିଭୂମି ବିକାଶ ସହ ଶଯ୍ୟା ସଂଖ୍ୟା ୨ଶହ ବୃଦ୍ଧି କରିବାକୁ ପରାମର୍ଶ ଦେଇଥିଲେ। ତଳ ମହଲାକୁ ଓପିଡି, ପ୍ରଥମ ମହଲାକୁ ନ୍ୟୁରୋ ଆଇସିୟୁ ସହିତ ଟ୍ରମା କେୟାର, ଦ୍ୱିତୀୟ ଓ ତୃତୀୟ ମହଲାକୁ ୨ଶହ ଶଯ୍ୟା ବିଶିଷ୍ଟ ୱାର୍ଡ କରିବାକୁ ବୈଠକରେ ଆଲୋଚନା କରିଥିଲେ। ଏହି ଅବସରରେ ଡାକ୍ତରଙ୍କ ସହ ଆଲୋଚନା କରି ବିଭିନ୍ନ ପରାମର୍ଶ ଦେଇଥିଲେ। କମ୍ପ୍ୟୁଟର ଟିକେଟ ପଞ୍ଜୀକରଣ ବ୍ୟବସ୍ଥା ନଭେମ୍ବର ୧ରୁ ଆରମ୍ଭ କରିବା, ବନ୍ଦ ପଡ଼ିଥିବା ଡିଜିଟାଲ ଏକ୍ସ-ରେ ତୁରନ୍ତ କାର୍ଯ୍ୟକ୍ଷମ କରିବାକୁ ନିର୍ଦ୍ଦେଶ ଦେଇଥିଲେ। ଏଥିସହ ଜାତୀୟସ୍ତର ଅଧିସ୍ବୀକୃତି(ଆର୍କିଡେସନ୍) ପ୍ରମାଣପତ୍ର କିପରି ହସ୍ପିଟାଲକୁ ମିଳିପାରିବ ସେ ନେଇ ସିଡିଏମ୍ଓଙ୍କୁ ପରାମର୍ଶ ଦେବା ସହ ପ୍ରତି ମାସରେ ସମୀକ୍ଷା କରିବାକୁ ଜିଲାପାଳଙ୍କୁ ନିର୍ଦ୍ଦେଶ ଦେଇଥିଲେ। ଅନୁଗୋଳ ଜିଲାରୁ ସର୍ବାଧିକ ରାଜସ୍ବ ମିଳୁଥିବାରୁ ମେଡିକାଲରେ ଟଙ୍କା ଖର୍ଚ୍ଚ କରିବାକୁ ସରକାର କୁଣ୍ଠାବୋଧ କରିବେ ନାହିଁ ବୋଲି ସଚିବ କହିଥିଲେ। ତେବେ ୫-ଟି ସଚିବ ଫେରିବା ସମୟରେ ଦୁଇ ଜଣ ବୟସ୍କା ମହିଳା ଏକ ଦାବିପତ୍ର ପ୍ରଦାନ କରିଥିଲେ।