ଅନୁଗୋଳ ଅଫିସ, ୧୮।୫ – ରାଜ୍ୟ ସମବାୟ ବ୍ୟାଙ୍କ ଅନୁରୋଧ କ୍ରମେ ଅନୁଗୋଳ ସଂଯୁକ୍ତ କେନ୍ଦ୍ର ସମବାୟ ବ୍ୟାଙ୍କ ପକ୍ଷରୁ ୨ଟି ଭ୍ରାମ୍ୟମାଣ ଏଟିଏମ୍ ଗାଡ଼ି ପୁରୀ ଜିଲାର ବିଭିନ୍ନ ଅଞ୍ଚଳ ବୁଲି ଫନୀ ବିପନ୍ନଙ୍କୁ ଏଟିଏମ୍ ସୁବିଧା ପ୍ରଦାନ କରୁଛି। ଗତ ୯ ତାରିଖ ଠାରୁ ଉକ୍ତ ୨ଟି ଗାଡ଼ି ନିରବଚ୍ଛିନ୍ନ ଭାବେ କାର୍ଯ୍ୟ କରୁଥିବା ବେଳେ ଓଡ଼ିଶା ରାଜ୍ୟ ସମବାୟ ବ୍ୟାଙ୍କ ପକ୍ଷରୁ ମନିଟରିଂ କରଯାଉଛି। ଫଳରେ ଯେ କୌଣସି ବ୍ୟାଙ୍କର ଏଟିଏମ୍ କାର୍ଡ ଦ୍ୱାରା ବିପନ୍ନମାନେ ଏହି ଭ୍ରାମ୍ୟମାଣ ଏଟିଏମ୍ରୁ ଟଙ୍କା ଉଠାଣର ସୁବିଧା ପାଇବାରେ ସକ୍ଷମ ହୋଇପାରିଛନ୍ତି। ଏଥିପାଇଁ ପୁରୀ ଜିଲାବାସୀଙ୍କ ସହିତ ଜିଲା ପ୍ରଶାସନ ଅନୁଗୋଳ ସଂଯୁକ୍ତ କେନ୍ଦ୍ର ସମବାୟ ବ୍ୟାଙ୍କକୁ ଧନ୍ୟବାଦ ଜଣାଇଛନ୍ତି। ଉଲ୍ଲେଖଯୋଗ୍ୟ ଯେ, ଗତ ୯ ତାରିଖ ଠାରୁ ଅଦ୍ୟାବଧି ମୋଟ୍ ୭୧୯ ଜଣ ସେମାନଙ୍କ ପାଖରେ ଥିବା ବିଭିନ୍ନ ବ୍ୟାଙ୍କର ଏଟିଏମ୍ କାର୍ଡ ଜରିଆରେ ମୋଟ୍ ୨୬.୪୫ ଲକ୍ଷ ଟଙ୍କା ଉଠାଣ କରିଛନ୍ତି। ସମସ୍ତ ବ୍ୟାଙ୍କର ଏଟିଏମ୍ କାର୍ଯ୍ୟକ୍ଷମ ନ ହେବା ପର୍ଯ୍ୟନ୍ତ ଏହି ଭ୍ରାମ୍ୟମାଣ ଏଟିଏମ୍ ଗାଡ଼ି ପୁରୀରେ କାର୍ଯ୍ୟରତ ରହିବ ବୋଲି ବ୍ୟାଙ୍କର ସଭାପତି ଅକ୍ଷୟ କୁମାର ମହାନ୍ତି ଓ ସମ୍ପାଦକ ଭକ୍ତେଶ୍ୱର ମଲିକ ପ୍ରକାଶ କରିଛନ୍ତି।
