ନୂଆଦିଲ୍ଲୀ,୧୫।୧: ଜମ୍ମୁ-କଶ୍ମୀରରୁ ଅନୁଚ୍ଛେଦ ୩୭୦ର ଉଚ୍ଛେଦ ପରେ ଭାରତରେ ଆତଙ୍କବାଦୀ ଆକ୍ରମଣ ପାଇଁ ପାକିସ୍ତାନର ପକ୍ଷରୁ ହୋଇଥିବା ଷଡ଼ଯନ୍ତ୍ର ବିଫଳ ହୋଇଛି। ୭୨ତମ ସେନା ଦିବସ ପାଳନ ଅବସରରେ ସେନାଧ୍ୟକ୍ଷ ଜେନେରାଲ ମନୋଜ ମୁକୁନ୍ଦ ନରାଓ୍ବଣେ ଏହା କହିଛନ୍ତି। ଭାରତୀୟ ସେନା ଯେ କୌଣସି ଆହ୍ବାନର ମୁକାବିଲା ପାଇଁ ପ୍ରସ୍ତୁତ। ଜମ୍ମୁ-କଶ୍ମୀରରେ ସେନା ପକ୍ଷରୁ ଜିରୋ ଟଲୋରାନ୍ସ୍ ଯୋଜନା ଗ୍ରହଣ କରାଯାଇଛି। ଫଳରେ ଆତଙ୍କବାଦୀ ଅନୁପ୍ରବେଶ ଘଟଣା କମିବାରେ ଲାଗିଛି ବୋଲି ନରାଓ୍ବଣେ କହିଛନ୍ତି। ଏହି ଅବସରରେ ସେ ଯବାନଙ୍କୁ ସମ୍ମାନୀତ କରିଛନ୍ତି। ପ୍ରଥମଥର ପାଇଁ ସେନା ଦିବସ ପରେଡରେ ପୁରୁଷଙ୍କ କଣ୍ଟିଜେଣ୍ଟ୍ର ନେତୃତ୍ୱ ଆର୍ମି କ୍ୟାପଟେନ୍ ତାନିଆ ଶେରଗିଲ୍ ନେଇଛନ୍ତି। ଏପରି କରି ସେ ପ୍ରଥମ ମହିଳା କ୍ୟାପଟେନ୍ ପାଲଟିଛନ୍ତି।