ଭୁବନେଶ୍ୱର,୨୫ା୨(ବ୍ୟୁରେ।): ବହୁ ଚର୍ଚ୍ଚିତ କଳ୍ପନା ଦାଶ ଓ ଝିଅ ବବ୍ଲି ହତ୍ୟା ମାମଲାରେ ପୂର୍ବତନ ବିଧାୟକ ଅନୁପ ସାଏ ଓ ତାଙ୍କ ଡ୍ରାଇଭର ବର୍ଦ୍ଧନ ଟପ୍ପୋ ଗିରଫ ହୋଇଛନ୍ତି। ଛତିଶଗଡ଼ର ରାୟଗଡ଼ ଜିଲା ଚକ୍ରଧରନଗର ଥାନା ଅନ୍ତର୍ଗତ ହମିରପୁର ଜଙ୍ଗଲରେ ଘଟିଥିବା ଏହି ବୀଭତ୍ସ ହତ୍ୟା ମାମଲାରେ ଉଭୟ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବା ପାଇଁ ଛତିଶଗଡ଼ ପୋଲିସ ପ୍ରମାଣ ଯୋଗାଡ଼ରେ ଲାଗିପଡିଛି। ଅନୁପ ପୋଲିସକୁ ସହଯୋଗ କରୁ ନ ଥିବାରୁ ତାଙ୍କୁ ବାରମ୍ବାର ରିମାଣ୍ଡରେ ନେଇ ପଚରାଉଚରା କରୁଛି ପୋଲିସ। ଏପରି କି ଅନୁପଙ୍କ ପରିବାର ସଦସ୍ୟଙ୍କୁ ମଧ୍ୟ ଛତିଶଗଡ଼ ପୋଲିସ ହାଜର ହେବା ପାଇଁ ନୋଟିସ କରିଛି। ଏହି ନୋଟିସ ପାଇବା ପରେ ଅନୁପଙ୍କ ପରିବାର ମୁହଁ ଖୋଲିବା ସହ ରାଜ୍ୟ ମାନବିକ ଅଧିକାର କମିଶନ (ଓଏଚ୍ଆର୍ସି)ଙ୍କ ଦ୍ୱାରସ୍ଥ ହୋଇଛନ୍ତି। ପୂର୍ବରୁ ଛତିଶଗଡ଼ ପୋଲିସ ଜାଣିଶୁଣି ଏହି ହତ୍ୟା ମାମଲାରେ ଅନୁପଙ୍କୁ ଫସାଇଥିବା ପରିବାର ଲୋକେ ଅଭିଯୋଗ କରି ଜିଲାପାଳ ଅଫିସ ସମ୍ମୁଖରେ ଧାରଣାରେ ବସିଥିଲେ। ସୋମବାର ଅନୁପଙ୍କ ଝିଅ ଶୁଭସ୍ମିତା ବାପାଙ୍କ ଗିରଫଦାରିର ପ୍ରତିବାଦ କରିବା ସହ ଛତିଶଗଡ଼ ପୋଲିସ ବିରୋଧରେ ଓଏଚ୍ଆର୍ସିଙ୍କୁ ଅଭିଯୋଗ କରିଛନ୍ତି। ସେ ଅଭିଯୋଗରେ ଦର୍ଶାଇଛନ୍ତି ଯେ, ତାଙ୍କ ବାପାଙ୍କୁ ଛତିଶଗଡ଼ ପୋଲିସ ବେଆଇନଭାବେ ଗିରଫ କରିଥିବାରୁ ପରିବାରର ସମ୍ମାନ ହାନି ଘଟୁଛି। ସେ ଜନ୍ମରୁ ମୂକ ଓ ବଧିର ଥିବାରୁ ତାଙ୍କୁ ବିଭିନ୍ନ ସ୍ଥାନରୁ ଅପବାଦ ଶୁଣିବାକୁ ପଡୁଛି। ତାଙ୍କ ଭବିଷ୍ୟତ ପ୍ରଭାବିତ ହୋଇଛି। ପୂରା ପରିବାର ଭୟଭୀତ ଅବସ୍ଥାରେ ଅଛନ୍ତି। ତେଣୁ ଛତିଶଗଡ଼ ପୋଲିସ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ପରିବାର ଲୋକଙ୍କୁ ସୁରକ୍ଷା ଯୋଗାଇ ଦେବାକୁ ଶୁଭସ୍ମିତା ନିବେଦନ କରିଛନ୍ତି। ସେହିଭଳି ଛତିଶଗଡ଼ ପୋଲିସର ନୋଟିସ ବିରୋଧରେ ଅନୁପଙ୍କ ପୁଅ ଶୁଭମ୍ ସାଏ ରାୟଗଡ଼ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଛିତଶଗଡ଼ ପୋଲିସ ଉପରେ ଭରସା ନ ଥିବାରୁ ସୁରକ୍ଷା ଦୃଷ୍ଟିରୁ ଛତିଶଗଡ଼ ଯିବେ ନାହିଁ। ଯଦି ଛତିଶଗଡ଼ ପୋଲିସ ପଚରାଉଚରା କରିବାକୁ ଚାହୁଁଛି ଓଡ଼ିଶାକୁ ଆସୁ ବୋଲି ପୁଅ କୋର୍ଟରେ ଅପିଲ କରିଛନ୍ତି।
ଅନ୍ୟପକ୍ଷରେ ଛିତିଶଗଡ଼ ପୋଲିସ ରବିବାର କଳ୍ପନାଙ୍କ ଭାଇ ବରୁଣ ଦାଶ ଓ ଭଉଣୀ ରୀନା ଦାଶଙ୍କୁ ଡାକି ପଚରାଉଚରା କରିଛି। ଉଭୟଙ୍କୁ ପ୍ରାୟ ଏକ ଘଣ୍ଟାଧରି ବିଭିନ୍ନ ବିଷୟରେ ପଚରାଉଚରା କରିଛି। ବିଶେଷକରି ଅନୁପ ଓ କଳ୍ପନା କେବେଠାରୁ ଏକାଠି ରହୁଥିଲେ? କଳ୍ପନା ନିଖୋଜ ହେବା ପରେ କାହିଁକି ପରିବାର ପକ୍ଷରୁ ଥାନାରେ ଅଭିଯୋଗ କରାଯାଇ ନ ଥିଲା ବୋଲି ପୋଲିସ ଜାଣିବାକୁ ଚାହିଁଥିବା ବରୁଣ କହିଛନ୍ତି।
ଏ ସଂକ୍ରାନ୍ତରେ ରାୟଗଡ଼ ଏସ୍ପି ସନ୍ତୋଷ ସିଂ କହିଛନ୍ତି, ଆମ ପାଖରେ ଅନୁପଙ୍କ ବିରୋଧରେ ବଳିଷ୍ଠ ପ୍ରମାଣ ରହିଛି। ଅନୁପ ପୋଲିସକୁ ସହଯୋଗ କରୁ ନ ଥିବାରୁ ଆମ ପାଇଁ ସମସ୍ୟା ହେଉଛି। ତାଙ୍କୁ ପୁଣି ରିମାଣ୍ଡ ସହ ନାର୍କୋ ଟେଷ୍ଟ ପାଇଁ ଆବେଦନ କରାଯାଇଛି। ତାଙ୍କ ପରିବାର ଲୋକେ ପୋଲିସ ବିରୋଧରେ ଯେଉଁ ଅଭିଯୋଗ ଆଣୁଛନ୍ତି ତାହା ସମ୍ପୂର୍ଣ୍ଣ ମିଛ। ଅନୁପଙ୍କ ଅପରାଧକୁ ଘୋଡ଼ାଇବା ପାଇଁ ସେମାନେ ନାଟକ କରୁଛନ୍ତି। ପଚରାଉଚରା ପାଇଁ ଅନୁପଙ୍କ ପରିବାର ଲୋକଙ୍କୁ ନୋଟିସ କରାଯାଇଛି। ସେମାନଙ୍କୁ କୌଣସି ଧମକଚମକ ଦିଆଯାଉନାହିଁ ବୋଲି ସେ କହିଛନ୍ତି।