ନୂଆଦିଲ୍ଲୀ,୪ା୧୨(ପି.ଟି.): ପ୍ରଶ୍ନୋତ୍ତର କାଳରେ ଯେଉଁ ଏମ୍ପିମାନେ ପ୍ରଶ୍ନ ପଚାରିବାକୁ ନାଁ ଦେଉଛନ୍ତି, ସେମାନେ ଅନୁପସ୍ଥିତ ରହିଲେ ଅଧିବେଶନର ଅବଶିଷ୍ଟ ସମୟରେ ପ୍ରଶ୍ନ ପଚାରିବାକୁ ସେମାନଙ୍କୁ ସୁଯୋଗ ମିଳିବ ନାହିଁ ବୋଲି ଲୋକ ସଭା ବାଚସ୍ପତି ଓମ୍ ବିର୍ଲା ମଙ୍ଗଳବାର ଘୋଷଣା କରିଛନ୍ତି। ଶିବସେନା ଏମ୍ପି ପ୍ରତାପରାଓ ଗଣପତରାଓ ଯାଦବ ରସାୟନ ଓ ସାର ମନ୍ତ୍ରଣାଳୟ ସମ୍ପର୍କରେ ପ୍ରଶ୍ନ ପଚାରିବାକୁ ନାଁ ଦେଇ ଅନୁପସ୍ଥିତ ରହିବାରୁ ବାଚସ୍ପତି ଏଭଳି ରୁଲିଂ ଜାରି କରିଥିଲେ। ଭାଜପା ଏମ୍ପିମାନେ ଅନୁପସ୍ଥିତ ରହୁଥିବା ପ୍ରସଙ୍ଗ ମଙ୍ଗଳବାର ସଂସଦୀୟ ଦଳ ବୈଠକରେ ଉଠିଥିଲା। ଏନେଇ ପ୍ରଧାନମନ୍ତ୍ରୀଙ୍କ ଅସନ୍ତୋଷ ସମ୍ପର୍କରେ ବରିଷ୍ଠ ନେତା ରାଜନାଥ ସିଂ ଜଣାଇଥିଲେ। ନାଗରିକତା (ସଂଶୋଧନ) ବିଲ୍ ସମେତ କେତେକ ଗୁରୁତ୍ୱପୂର୍ଣ୍ଣ ବିଲ୍ ଆଗତ ହେବାକୁ ଥିବାରୁ ବହୁସଂଖ୍ୟାରେ ଉପସ୍ଥିତ ରହିବାକୁ ରାଜନାଥ ଦଳୀୟ ସଦସ୍ୟମାନଙ୍କୁ କହିଥିଲେ।
ପ୍ରୋସିଡିଂ ପ୍ରତି ଧ୍ୟାନ ଦେଇ ନ ଥିବା କେନ୍ଦ୍ରମନ୍ତ୍ରୀ ରାଓସାହେବ ପାଟିଲ୍ ଡାନ୍ଭେଙ୍କ ଉପରେ ବାଚସ୍ପତି ବିରକ୍ତି ପ୍ରକାଶ କରିଥିଲେ। ଶିବସେନା ସଦସ୍ୟ ହେମନ୍ତ ତୁକାରାମ ଗଡସେଙ୍କ ପ୍ରଶ୍ନକୁ ଶୁଣି ନ ଥିବା ଖାଉଟି ବ୍ୟାପାର ମନ୍ତ୍ରୀ ଡାନ୍ଭେ ତାଙ୍କୁ ପୁଣି ଥରେ ପ୍ରଶ୍ନ ପଚାରିବାକୁ କହିବାରୁ ବାଚସ୍ପତି ଧ୍ୟାନର ସହ ପ୍ରଶ୍ନ ଶୁଣିବାକୁ କହିଥିଲେ। ଗଡସେଙ୍କୁ ଦ୍ୱିତୀୟ ଥର ସମାନ ପ୍ରଶ୍ନ ନ ପଢ଼ିବାକୁ ମଧ୍ୟ ବାଚସ୍ପତି କହିଥିଲେ।
