ଶ୍ରୀନଗର,୬।୧୦: ଜମ୍ମୁ-କଶ୍ମୀର ଭାରତ-ପାକିସ୍ତାନ ନିୟନ୍ତ୍ରଣ ରେଖାରେ ଏକ ଅନୁପ୍ରବେଶ ଉଦ୍ୟମ ପଣ୍ଡ ହୋଇଛି। କିଛି ଆତଙ୍କବାଦୀ କୁପଓ୍ବାରା ଜିଲାର ନୌଗାମ୍ ସେକ୍ଟରରେ ରବିବାର ଅନୁପ୍ରବେଶ କରୁଥିବାବେଳେ ବିଏସ୍ଏଫ୍ ଯବାନଙ୍କ ପାଲଟା ଜବାବରେ ପାକିସ୍ତାନ ଅଧିକୃତ କଶ୍ମୀରକୁ ଫେରି ପଳାଇଛନ୍ତି। ପାକିସ୍ତାନ ଲଞ୍ଚ୍ ପ୍ୟାଡ୍ରେ ଶହେରୁ ଅଧିକ ଆତଙ୍କବାଦୀ ଅନୁପ୍ରବେଶ ପାଇଁ ପ୍ରସ୍ତୁତ ହୋଇ ରହିଥିବା ଗୋଇନ୍ଦା ବିଭାଗ ପକ୍ଷରୁ ଏକ ରିପୋର୍ଟ ପ୍ରକାଶ ପାଇଛି। ମାଛଲି ସେକ୍ଟରର ତେଜିୟାଂରେ ଲଶ୍କର-ଇ-ତୋଏବାର ୪-୫ ଦଳ ଆତଙ୍କବାଦୀ ଭାରତରେ ଅନୁପ୍ରବେଶ ପାଇଁ ସୁଯୋଗକୁ ଅପେକ୍ଷା କରିଥିବାବେଳେ କୃଷ୍ଣା ଘାଟି ସେକ୍ଟରର ବଟାଲି ମୋହାଲିଠାରେ ୨ ଆତଙ୍କବାଦୀ ଦଳ, କେଜି ସେକ୍ଟରର ନଟ୍ଟାରଠାରେ ୨ ଦଳ ଅନୁପ୍ରବେଶ ଲାଗି ଯୋଜନା କରୁଥିବା ରିପୋର୍ଟରେ ଦର୍ଶାଯାଇଛି। ସେହିପରି ବିଜି ସେକ୍ଟରର ନିକଟରେ ଥିବା ପାକିସ୍ତାନ ଅଧିକୃତ କଶ୍ମୀରର ସଲହୁନ୍ ଏବଂ ମାତରିଆଠାରେ ଜୈଶ୍-ଇ-ମହମ୍ମଦ୍ ୫୦ ଏବଂ ଲଶ୍କର-ଇ-ତୋଏବାର ୩୦ ଆତଙ୍କବାଦୀ ଅନୁପ୍ରବେଶ ପାଇଁ ପ୍ରସ୍ତୁତ ହୋଇ ରହିଛନ୍ତି। କେରନ୍ ସେକ୍ଟରରେ ଅଲ୍-ବଦର ଏବଂ ଲଶ୍କର ସଂଗଠନର ୯୦ ଆତଙ୍କବାଦୀ ଭାରତରେ ପ୍ରବେଶ କରିବାକୁ ସୁଯୋଗକୁ ଅପେକ୍ଷା କରିଥିବା ଏହି ରିପୋର୍ଟରେ କୁହାଯାଇଛି।
