ତାଳଚେର,୧୩ା୫(ନି.ପ୍ର.) – ତାଳଚେରରେ ଶ୍ରୀଜଗନ୍ନାଥଙ୍କ ରଥଯାତ୍ରା ପାଇଁ ଏକ ପ୍ରସ୍ତୁତି ବୈଠକ ମଙ୍ଗଳବାର ଅନୁଷ୍ଠିତ ହୋଇଯାଇଛି। ତାଳଚେର ଉପଜିଲାପାଳ ରଜନୀକାନ୍ତ ସ୍ବାଇଁ ଏଥିରେ ଅଧ୍ୟକ୍ଷତା କରିଥିଲେ। ବିଧାୟକ ବ୍ରଜକିଶୋର ପ୍ରଧାନ, ପୌରନିର୍ବାହୀ ଅଧିକାରୀ ଅତସୀ ପରିଡା, ଦେବୋତ୍ତର ମ୍ୟାନେଜର ପଙ୍କଜ ଲୋଚନ ପତି ଓ ମୁଖ୍ୟ ମହାରଣା ପ୍ରମୁଖ ବୈଠକରେ ଯୋଗ ଦେଇଥିଲେ। ସରକାର ଯଦି ଅନୁମତି ପ୍ରଦାନ କରନ୍ତି ତାହେଲେ ତାଳଚେରରେ ରଥଯାତ୍ରା ଅନୁଷ୍ଠିତ ହେବ ବୋଲି ରଥଯାତ୍ରା କମିଟି ସଭାପତି ତଥା ଉପଜିଲାପାଳ ସ୍ବାଇଁ ସୂଚନା ଦେଇଥିଲେ। ବିଧାୟକ ପ୍ରଧାନ ବଡଯୋରଡା, କଂସମୁଣ୍ଡା ଓ ଜରଡା ଗ୍ରାମରେ ଥିବା ରଥ ମରାମତି କରି ଚଳିତ ବର୍ଷ ବ୍ୟବହାର କରିବାକୁ ପ୍ରସ୍ତାବ ଦେଇଥିଲେ। ସଦସ୍ୟମାନେ ଏହାର ସମୀକ୍ଷା କରି ୫ ଦିନ ମଧ୍ୟରେ ଜଣାଇବାକୁ ନିଷ୍ପତ୍ତି ନିଆଯାଇଥିଲା। ଯଦି ଏପରି କରାଯାଏ ତାହେଲେ ମୁଖ୍ୟ ମହାରଣା ରଥଗୁଡିକର ଯାଞ୍ଚ ଓ ପୂର୍ତ୍ତ ବିଭାଗ ଆବଶ୍ୟକ ପ୍ରମାଣପତ୍ର ପ୍ରଦାନ କଲା ପରେ ରଥ ଚାଲିବ ବୋଲି ବୈଠକରେ ସ୍ଥିର କରାଯାଇଥିଲା। ଜୟନ୍ତ କୁମାର ପରିଡା ଧନ୍ୟବାଦ ପ୍ରଦାନ କରିଥିଲେ।
