ନୂଆଦିଲ୍ଲୀ, ୨୪ା୬: ଅନ୍ତର୍ଜାତୀୟ ଅଲିମ୍ପିକ ଦିବସ ପାଳନ ଅବସରରେ ନାଭାଲ ଟାଟା ହକି ଏକାଡେମୀ ସହଯୋଗରେ ଓଡ଼ିଶା କ୍ରୀଡ଼ା ଓ ଯୁବ ସେବା ବିଭାଗ ପକ୍ଷରୁ କ୍ରୀଡ଼ା କିମ୍ବଦନ୍ତୀ ଏବଂ ପ୍ରଶାସକମାନଙ୍କୁ ନେଇ ଏକ ଓ୍ବେବିନାର ଅନୁଷ୍ଠିତ ହୋଇଯାଇଛି। ଏଥିରେ ଆଲୋଚନାର ବିଷୟବସ୍ତୁ ଥିଲା ‘ ମୋମେଣ୍ଟମ ଟୁଓ୍ବାଡର୍ସ ପୋଷ୍ଟ କୋଭିଡ୍-୧୯ ଅଲିମ୍ପିକ୍ସ’। ଏଥିରେ ଲିଆଣ୍ଡର ପେସ୍, ଅଭିନବ ବିନ୍ଦ୍ରା, ଅଞ୍ଜୁ ବବି ଜର୍ଜ ଓ ନେଦରଲାଣ୍ଡର ପୂର୍ବତନ ଡ୍ରାଗ୍ ଫ୍ଲିକ୍ ସ୍ପେଶାଲିଷ୍ଟ ଫ୍ଲୋରିସ ବୋଭେଲାଣ୍ଡର ଆଦି କ୍ରୀଡ଼ା କିମ୍ବଦନ୍ତୀଙ୍କ ସହ ଭାରତୀୟ ଅଲିମ୍ପିକ ଆସୋସିଏଶନ ସଭାପତି ଡ. ନରିନ୍ଦର ଧ୍ରୁବ ବାତ୍ରା, ଓଡ଼ିଶା ଖଣି ନିଗମ ପରିଚାଳନା ନିର୍ଦ୍ଦେଶକ ଓ ଯୁବକ୍ରୀଡ଼ା ବିଭାଗ ନିର୍ଦ୍ଦେଶକ ଭିନିଲ୍ ଆର୍. କ୍ରିଷ୍ଣା, ଟାଟାଷ୍ଟିଲ କର୍ପୋରେଟ୍ ସର୍ଭିସେସ୍ର ଉପସଭାପତ ତଥା ହକି ଏସ୍ ଫାଉଣ୍ଡେଶନର ଚେୟାରମ୍ୟାନ ଚାଣକ୍ୟ ଚୌଧାରୀ ଓ ହକି ଇଣ୍ଡିଆ ସିଇଓ ଏଲିନା ନର୍ମାନ ପ୍ରମୁଖ ଅଂଶଗ୍ରଣ କରିଥିଲେ। ଅଲିମ୍ପିକ ଗେମ୍ସରେ ସଫଳତା ହାସଲ କରିବାକୁ ହେଲେ ମିଳିମିଶି କାର୍ଯ୍ୟକରିବା ଗୁରୁତ୍ୱପୂର୍ଣ୍ଣ ବୋଲି ମତ ପ୍ରକାଶ ପାଇଥିଲା। ଓ୍ବେବିନାରର ପରିଚାଳନା କରିଥିଲେ ପୂର୍ବତନ କ୍ରିକେଟର ଦୀପ୍ ଦାସଗୁପ୍ତା। ଏହି ଅବସରରେ ଭାରତୀୟ ଅଲିମ୍ପିକ ଆସୋସିଏଶନ (ଆଇଓଏ) ସଭାପତି ବାତ୍ରା କହିଥିଲେ ଆସନ୍ତା ବର୍ଷଆମପାଇଁ ଗୁରୁତ୍ୱପୂର୍ଣ୍ଣ। ଅଲିମ୍ପିକ୍ସ ପାଇଁ ଆମ ଦେଶରୁ ଇତିମଧ୍ୟରେ ୭୮ଜଣ ଯୋଗ୍ୟତା ହାସଲ କରିସାରିଛନ୍ତି। କରୋନାଭାଇରସ୍ର ପ୍ରଭାବ ଥମିଯିବା ପରେ ଅନ୍ତର୍ଜାତୀୟ ପ୍ରତିଯୋଗିତା ଏବଂ କ୍ୱାଲିଫାଇଂ ମିଟ୍ ଆରମ୍ଭ ହୋଇଗଲେ ଭାରତ ଟୋକିଓ ଗେମ୍ସକୁ ରେକର୍ଡ ସଂଖ୍ୟକ ୧୨୫ ଆଥଲେଟ ପଠାଇବ ବୋଲି ସେ ଦୃଢ ଆଶାବାଦୀ।