ବିଜେପୁର,୧୧।୧୧(ଡି.ଏନ୍.ଏ.): ବରଗଡ଼ ଜିଲା ବିଜେପୁର ବ୍ଲକ ପରିସରରେ ପ୍ରଶାସନ ପକ୍ଷରୁ ଅନ୍ତର୍ଜାତୀୟ ବରିଷ୍ଠ ନାଗରିକ ଦିବସ ପାଳିତ ହୋଇଯାଇଛି। ଏହି ପରିପ୍ରେକ୍ଷୀରେ ଗ୍ରାମ ଉନ୍ନୟନ ଓ ଶ୍ରମ ମନ୍ତ୍ରୀ ସୁଶାନ୍ତ ସିଂ ଯୋଗଦେଇ ଭୂମିହୀନଙ୍କୁ ଜମି ପଟ୍ଟା ସହ ଭତ୍ତା ଏବଂ ଶ୍ରମିକ କାର୍ଡ଼ ବଣ୍ଟନ କରିଥିଲେ। ତହସିଲଦାର ପଦ୍ମନାଭ ସାମନ୍ତରାୟ ଏଥିରେ ଅଧ୍ୟକ୍ଷତା କରିଥିଲେ। ଅନ୍ୟମାନଙ୍କ ମଧ୍ୟରେ ବିଧାୟିକା ରୀତା ସାହୁ, ବ୍ଲକ ଅଧ୍ୟକ୍ଷା ମାନିନୀ ଭୋଇ, ଅତିରିକ୍ତ ତହସିଲଦାର ନାରାୟଣ ସାହୁ, ସିଡିପିଓ ଚନ୍ଦ୍ରା ସାହୁ ପ୍ରମୁଖ ମଞ୍ଚାସୀନ ଥିଲେ। ମଧୁବାବୁ ପେନ୍ସନ ଯୋଜନାରେ ୧୪୬୫, ଇନ୍ଦିରାଗାନ୍ଧୀ ଯୋଜନାରେ ୧୯୦, ବିଜେପୁର ଏନ୍ଏସିରେ ୫୨ଜଣଙ୍କୁ ନୂତନ ଭାବରେ ଗୋଟିଏ ମାସର ଭତ୍ତା ଟଙ୍କା ପ୍ରଦାନ କରାଯାଇଥିଲା। ସେହିପରି ୭୦୦ଜଣଙ୍କୁ ଶ୍ରମିକ କାର୍ଡ଼ ଓ ୧୭ଜଣ ଭୂମିହୀନଙ୍କୁ ଜମିପଟ୍ଟା ଦିଆଯାଇଥିଲା। ଟୁହିଲାମାଲର କୃଷ୍ଣଚନ୍ଦ୍ର ହରିପାଲଙ୍କୁ ମନ୍ତ୍ରୀ ସିଂ ଟ୍ରାଇସାଇକେଲ ପ୍ରଦାନ କରିଥିଲେ। ଭାରପ୍ରାପ୍ତ ଏସ୍ଇଓ ପାଣ୍ଡବ ନନ୍ଦ ଧନ୍ୟବାଦ ଅର୍ପଣ କରିଥିଲେ।
