ବାରାଣାସୀ,୧୯।୯: ଜଣେ ୭୫ ବର୍ଷ ବୟସ୍କା ବୃଦ୍ଧାଙ୍କ ମୃତ୍ୟୁ ପରେ ଅନ୍ତିମ ସଂସ୍କାରରେ ପରିବାରର ବୋହୂ ଓ ଝିଅ ମାନେ ମିଳିମିଶି ମୃତଦେହକୁ କାନ୍ଧରେ ଶ୍ମଶାନକୁ ବୋହି ନେଇଛନ୍ତି। ସେଠାରେ ଝିଅ ବୃଦ୍ଧାଙ୍କୁ ମୁଖାଗ୍ନି ଦେଇଛନ୍ତି। ଏପରି ଏକ ନିଆରା ଘଟଣା ବାରାଣାସୀ ଜିଲାରେ ଘଟିଛି। ସ୍ଥାନୀୟ ଚେରଇଗାଓ୍ବଁ ଅଞ୍ଚଳରେ ଥିବା ବରିୟାସନ୍ପୁରରେ ବୃଦ୍ଧା ରଜ୍ଜୀ ଦେବୀଙ୍କ ମୃତ୍ୟୁ ବୁଧବାର ଘଟିଥିଲା। ବୃଦ୍ଧାଙ୍କ ଝିଅ ହୀରାମଣୀ ଏବଂ ପ୍ରେମା ମା’ଙ୍କୁ ମୁଖାଗ୍ନି ଦେବାକୁ ନିଜର ଇଛା ପ୍ରକାଶ କରିଥିଲେ। ପରିବାରର ପୁରୁଷ ସଦସ୍ୟମାନେ ଏହାକୁ ସମ୍ମାନର ସହିତ ଗ୍ରହଣ କରିଥିଲେ। ଏହାପରେ ପରିବାରର ବୋହୂ, ଝିଅ ଓ ଅନ୍ୟ ମହିଳା ସଦସ୍ୟ ବୃଦ୍ଧାଙ୍କ ମୃତ ଦେହକୁ କୋକେଇରେ ଗଙ୍ଗା ତଟରେ ଥିବା ଶ୍ମଶାନକୁ କାନ୍ଧରେ ବୋହି ନେଇ ଥିଲେ। ଝିଅ ହୀରାମଣି ମୁଖାଗ୍ନି ଦେଇଥିଲେ। ଏହାର ଫଟୋ ଏବଂ ଭିଡ଼ିଓ ଏବେ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି।
