ମୁମ୍ବାଇ, ୧୫।୬: ବଲିଉଡ୍ ଅଭିନେତା ସୁଶାନ୍ତ ସିଂହ ରାଜପୁତଙ୍କ ସୋମବାର ମୁମ୍ବାଇ ସ୍ଥିତ ପବନ ହଂସ ଶ୍ମଶାନ ନିକଟ ଭିଲେ ପାର୍ଲେରେ ଅନ୍ତିମ ସଂସ୍କାର କରାଯିବ। ବିହାର ପାଟନାରୁ ଶୁଶାନ୍ତଙ୍କ ବାପା ମୁମ୍ବାଇ ପହଞ୍ଚିବା ପରେ ତାଙ୍କର ଶେଷକୃତ୍ୟ ସମ୍ପନ୍ନ କରାଯିବ ବୋଲି ସୂଚନା ରହିଛି। ତେବେ ଅନ୍ତିମ ସଂସ୍କାର ପୂର୍ବରୁ ତାଙ୍କର କରୋନା ଯାଞ୍ଚ କରାଯିବ ବୋଲି ଜଣାପଡ଼ିଛି। ପୋଷ୍ଟମର୍ଟମ ପୂର୍ବରୁ କରୋନା ଯାଞ୍ଚ ପାଇଁ ନମୂନା ସଂଗ୍ରହ ମଧ୍ୟ କରାଯାଇସାରିଛି। ସୂଚନାଯୋଗ୍ୟ, ଦେଶରେ ଦିନକୁ ଦିନ ଲଗାତର ଭାବେ ବଢ଼ୁଥିବା କରୋନା ସଂକ୍ରମଣ ମାମଲାକୁ ଦେଖି ଏଭଳି ନିଷ୍ପତ୍ତି ନିଆଯାଇଛି। ଯଦି ତାଙ୍କର ରିପୋର୍ଟ ପଜିଟିଭ୍ ଆସେ ତେବେ ଅନ୍ତିମ ସଂସ୍କାର ପାଇଁ ସରକାରଙ୍କ ପକ୍ଷରୁ ଜାରି କରାଯାଇଥିବା ପୃଥକ୍ ଗାଇଡ୍ଲାଇନ୍କୁ ଅନୁସରଣ କରିବାକୁ ପଡ଼ିବ।