ହିଞ୍ଜିଳିକାଟୁ,୧୪ା୫(ଡି.ଏନ୍.ଏ.)- ହିଞ୍ଜିଳିକାଟୁ ପୌରାଞ୍ଚଳର ବିଭିନ୍ନ କ୍ୱାରାଣ୍ଟାଇନ୍ କେନ୍ଦ୍ରରେ କୋଭିଡ଼-୧୯ ସମ୍ପର୍କରେ ବିଭିନ୍ନ ତଥ୍ୟ ସମ୍ପର୍କରେ ଅବଗତ ସହ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଇଛି। ଦୈନିକ ସକାଳେ ୨ ଘଣ୍ଟା ଓ ସନ୍ଧ୍ୟାରେ ୨ ଘଣ୍ଟା ଶାରିରୀକ ବ୍ୟାୟାମ, ଦକ୍ଷତା ବିକାଶ, ନୀତି ଶିକ୍ଷା ସହ ପୌରାଣିକ କଥାବସ୍ତୁ ସମ୍ପର୍କରେ ଅଭିଜ୍ଞ ବ୍ୟକ୍ତିମାନେ କହୁଛନ୍ତି। ଏହାଦ୍ୱାରା ଅନ୍ତେବାସୀ ରୋଗ ସମ୍ପର୍କରେ ଅବଗତ ହେବାସହ ମନୋରଞ୍ଜନ ହୋଇପାରୁଛି ବୋଲି ମ୍ୟୁନିସିପାଲିଟି କାର୍ଯ୍ୟ ନିର୍ବାହୀ ଅଧିକାରୀ ଡ. ମନୋରଞ୍ଜନ ସାହୁ କହିଛନ୍ତି। ଅନ୍ୟପକ୍ଷରେ ହିଞ୍ଜିଳିକାଟୁ ବ୍ଲକର ବୁରୁପୋଡ଼ା, ଶିକିରି ଓ ଅନ୍ୟାନ୍ୟ କ୍ୱାରାଣ୍ଟାଇନ କେନ୍ଦ୍ରରେ ଅନ୍ତେବାସୀଙ୍କ ଦ୍ୱାରା ବିଭିନ୍ନ ସମାଜିକ କାର୍ଯ୍ୟ, ପରିବେଶ ସ୍ବଚ୍ଛତା, ଯୋଗଭ୍ୟାସ ଇତ୍ୟାଦି ନେଇ ଅନ୍ତେବାସୀଙ୍କ ଭିଡ଼ିଓ ସୋସିଆଲ ମିଡ଼ିଆରେ ପ୍ରଚାର ହେବାପରେ ଅନ୍ୟ କେନ୍ଦ୍ରର ଅନ୍ତେବାସୀଙ୍କ ଉପରେ ଭଲ ପ୍ରଭାବ ପଡୁଛି। ସମସ୍ତ କେନ୍ଦ୍ରରେ ସିସିଟିଭି ଲଗାଯାଇ ଅନ୍ତେବାସୀଙ୍କ ଉପରେ ନଜର ମଧ୍ୟ ରଖାଯାଇଛି।