ବଲିଉଡ୍ର ଆଗଧାଡିର ଅନ୍ୟତମ ଅଭିନେତ୍ରୀ କ୍ୟାଟ୍ରିନା କୈଫ। ଚଳିତବର୍ଷ ଇଦ୍ ଅବସରରେ ତାଙ୍କ ଅଭିନୀତ ‘ଭାରତ’ ରିଲିଜ ହୋଇଛି। ଗୋଟିଏ ଜିନିଷକୁ ନେଇ ତାଙ୍କ ମନରେ ଭୟ ରହିଛି। ସେ କାହାକୁ ବେଶି ଭୟ କରନ୍ତି ଜାଣନ୍ତି ? ଅନ୍ଧାରକୁ। ତାଙ୍କ ବ୍ୟକ୍ତିଗତ ହେଉ ଅବା ଅଭିନୟ ଜୀବନରେ ଅନେକ ରୋଚକ କଥା ରହିଛି। କ୍ୟାଟ୍ରିନାଙ୍କୁ ଯେତେବେଳେ ମାତ୍ର ୧୪ବର୍ଷ ସେତେବେଳେ ସେ ମଡେଲିଂ ଆରମ୍ଭ କରିଥିଲେ। ନିକଟରେ ସେ ତାଙ୍କର ୩୫ତମ ଜନ୍ମଦିନ ପାଳନ କରିଛନ୍ତି। ହଂକଂରେ ଜନ୍ମିତା ଏହି ଅଭିନେତ୍ରୀଙ୍କର ପ୍ରକୃତ ନାମ ହେଲା କ୍ୟାଟ୍ରିନା ଟୋରକୁଟ୍ଟେ। ‘ବୁମ୍’ ସିନେମାର ପ୍ରଯୋଜିକା ଅୟେଶା ଶ୍ରଫ ତାଙ୍କ ନାମକୁ ପରିବର୍ତ୍ତନ କରି କ୍ୟାଟ୍ରିନା କୈଫ ରଖିଥିଲେ। ବମ୍ବେ ଆସି ବଲିଉଡ୍ରେ କ୍ୟାରିୟର ଆରମ୍ଭ କରିବା ପୂର୍ବରୁ ସେ କିଛି ବର୍ଷ ଲଣ୍ଡନରେ ରହିଥିଲେ। ୨୦୦୪ରେ ସେ ‘ମାଲେଶ୍ୱରୀ’ ଟାଇଟଲବିଶିଷ୍ଟ ଏକ ତେଲୁଗୁ ଫିଲ୍ମରେ ଅଭିନୟ କରି ପାରିଶ୍ରମିକ ଭାବରେ ୭.୫ ମିଲିୟନ ପାଇଥିଲେ। ସେ ସମୟରେ ଜଣେ ଦକ୍ଷିଣ ଭାରତୀୟ ଅଭିନେତ୍ରୀଙ୍କର ଏହା ଥିଲା ସର୍ବାଧିକ ପାରିଶ୍ରମିକ। ସେ ସ୍ପଷ୍ଟ ଭାବରେ ହିନ୍ଦୀ କହିପାରନ୍ତି ନାହିଁ। ଫଳରେ ତାଙ୍କର ପ୍ରାୟ ଅଧିକାଂଶ ଫିଲ୍ମରେ ଭଏସ ଡବିଂ କରାଯାଇଥାଏ। ସେ ନାଚିଥିବା ସୁପରହିଟ୍ ଗୀତ ‘ଚିକନି ଚମେଲି’ର ଶୁଟିଂ ଦଶ ଦିନ ପର୍ଯ୍ୟନ୍ତ ଚାଲିଥିଲା। ଚିତ୍ର ଆଙ୍କିବାକୁ କ୍ୟାଟ୍ରିନା ଭଲ ପାଆନ୍ତି। ଜଣେ ପରିଚିତା ଚେସ୍ ଖେଳାଳି ଭାବରେ ତାଙ୍କର ସୁଖ୍ୟାତି ରହିଛି। ଜଣେ ବ୍ୟକ୍ତିଙ୍କର ମାନସିକତାକୁ ସେ ସାଙ୍ଗେ ସାଙ୍ଗେ ଅନୁଧ୍ୟାନ କରି ଜାଣିପାରନ୍ତି। ସଲମାନ ଖଁାଙ୍କ ସହ ତାଙ୍କର ପ୍ରେମ ସମ୍ପର୍କକୁ ନେଇ ବେଶ୍ କିଛି ବର୍ଷ ହେଲା ଚର୍ଚ୍ଚାରେ ଅଛନ୍ତି କ୍ୟାଟ୍ରିନା। ଏହାପୂର୍ବରୁ ତାଙ୍କ ନାମ ସହ ରଣବୀର କପୁରଙ୍କ ନାମକୁ ଯୋଡା ଯାଇଥିଲା। ହେଲେ ଏହି ପ୍ରେମରେ କେବେଠାରୁ ବ୍ରେକଅପ ହୋଇସାରିଛି। ବାନ୍ଦ୍ରାରେ କ୍ୟାଟ୍ରିନା ଏକ ଭଡ଼ା ଘରେ ରହୁଛନ୍ତି।