କରୋନା ମହାମାରୀ ଯୋଗୁ ବିଦ୍ୟାଳୟଗୁଡ଼ିକ ବର୍ତ୍ତମାନ ବନ୍ଦ ରହିଛି। ତେଣୁ ଶିକ୍ଷୟିତ୍ରୀ/ଶିକ୍ଷକମାନେ ପିଲାମାନଙ୍କୁ ଅନ୍ଲାଇନ୍ ଶିକ୍ଷା ଦେଉଛନ୍ତି। କେଉଁଠି ଇଣ୍ଟର୍ନେଟ୍ ଗତି କମ୍ ରହୁଛି ତ ଆଉ କେଉଁଠି ବ୍ଲାକବୋର୍ଡରେ ଗଣିତ, ବିଜ୍ଞାନ ଭଳି କଠିନ ବିଷୟ ପଢ଼ାଇବାରେ ଶିକ୍ଷୟିତ୍ରୀ ଶିକ୍ଷକ ବଦ୍ଧପରିକର। ଏଭଳି ପରିସ୍ଥିତିରେ ଜଣେ ଶିକ୍ଷୟିିତ୍ରୀ ହ୍ୟାଙ୍ଗର, ଚେୟାର, ଡ୍ରେସ୍ କ୍ଲିପିଂରୁ ଅନ୍ଲାଇନ୍ ଶ୍ରେଣୀ ପାଇଁ ଏକ ଟ୍ରାଇପଡ୍ ତିଆରି କରିଛନ୍ତି। ଯାହା ସୋସିଆଲ ମିଡିଆରେ ଏବେ ଭାଇରାଲ ହେବାରେ ଲାଗିଛି। ଶେୟାର ହୋଇଥିବା ଫଟୋକୁ ଲୋକେ ବେଶ୍ ପସନ୍ଦ କରିଛନ୍ତି।
ଟୁଇଟରରେ ଏକ ଫଟୋ ଶେୟାର କରି ଭାରତୀୟ ବନ ସେବା ଅଧିକାରୀ ସୁଦର୍ଶନ ରମଣ ଲେଖିଛନ୍ତି, ‘ଏହି ଫଟୋରେ ଅନେକ ସକାରାତ୍ମକତା ଏବଂ ଆଶା ଅଛି। ରସାୟନ ବିଜ୍ଞାନର ଏହି ଶିକ୍ଷୟିତ୍ରୀଙ୍କ ପ୍ରତିବଦ୍ଧତା ଦେଖନ୍ତୁ। ପ୍ରାୟ ଏକ ସପ୍ତାହ ପୂର୍ବରୁ ଶିକ୍ଷୟିତ୍ରୀ ମୌମିତା ବି ଏହି ଭିଡିଓକୁ ସୋସିଆଲ ମିଡିଆରେ ଶେୟାର କରିଥିଲେ। ସେ ଲେଖିଛନ୍ତି, ‘ମୋ’ ପାଖରେ ଟ୍ରାଇପଡ୍ ନ ଥିବାରୁ ମୁଁ ମୋ’ ଘରୁ ଅନ୍ଲାଇନ୍ କ୍ଲାସ ନେବାକୁ ଏକ ଅଭିନବ ପ୍ରୟାସ କରିଥିଲି।
ସେ ନିଜ ଫୋନ୍କୁ ଏକ ହ୍ୟାଙ୍ଗରରେ ବାନ୍ଧି ରଖିଥିଲେ। ଏହାକୁ ଦଉଡ଼ି ସାହାଯ୍ୟରେ ଏକ ପ୍ଲାଷ୍ଟିକ ଚେୟାର ଏବଂ ଛାତରେ ବାନ୍ଧି ଟ୍ରାଇପଡ୍ ପ୍ରସ୍ତୁତ କଲେ। ତାଙ୍କର ଏହି ଭିଡିଓ ଲିଙ୍କ୍ଦିନ୍ରେ ଭାଇରାଲ ହୋଇଛି। ଏହି ଭିଡିଓକୁ ବର୍ତ୍ତମାନ ସୁଦ୍ଧା ୨ ଲକ୍ଷରୁ ଅଧିକ ଲୋକ ଦେଖିସାରିଥିବା ବେଳେ ୬୦୦ରୁ ଅଧିକ ଲୋକ ଏହା ଉପରେ ମନ୍ତବ୍ୟ ଦେଇଛନ୍ତି।
ଜଣେ ୟୁଜର ଲେଖିଛନ୍ତି, ମାଡାମ୍, ଏହା ଦେଖି ଆମେ ବୁଝିଗଲୁ ଯେ, ସମ୍ବଳ ସବୁ ସମସ୍ୟାର ସମାଧାନ କରେ ନାହିଁ । ଯଦି ଆମର ଏହା କରିବାକୁ ପ୍ରେରଣା ଅଛି, ତେବେ ସମସ୍ୟା ନିଜେ ସମାଧାନ କରିପାରିବେ। ଶିକ୍ଷୟିତ୍ରୀ ମୌମିତା ଏଥିରେ ପ୍ରତିକ୍ରିୟା ଦେଇ କହିଛନ୍ତି, ଯେ ମୋର ଏକମାତ୍ର ଉଦ୍ଦେଶ୍ୟ ଥିଲା ଶ୍ରେଣୀଗୃହ ପରିବେଶ ସୃଷ୍ଟି କରିବା। ଯାହାଦ୍ୱାରା ବୋର୍ଡ ଛାତ୍ରୀଛାତ୍ରଙ୍କୁ ଭଲଭାବେ ଦେଖାଯିବ। ଫଳରେ ସେମାନେ ଉପକୃତ ହୋଇପାରିବେ।
ଟୁଇଟର୍ରେ ମଧ୍ୟ ଶିକ୍ଷୟିତ୍ରୀଙ୍କ ଏଭଳି ପ୍ରୟାସକୁ ଖୁବ୍ ପ୍ରଶଂସା କରାଯାଉଛି। ଜଣେ ୟୁଜର ଲେଖିଛନ୍ତି, ‘ମୁଁ ଜାଣେନା ଏହା କେଉଁଠାରେ ଘଟିଛି ଏବଂ କିଏ ଏହା କରିଛି। କିନ୍ତୁ ଏହି ଫଟୋ ମୋ’ ଆଖି ଖୋଲିଦେଇଛି। ଜଣେ ଶିକ୍ଷୟିତ୍ରୀ ଏପରି ଅନ୍ଲାଇନ୍ କ୍ଲାସ ନେବା ସ୍ବାଗତଯୋଗ୍ୟ। ସେହିପରି ବହୁ ୟୁଜର ଶିକ୍ଷୟିତ୍ରୀଙ୍କ ଏଭଳି ଶିକ୍ଷାଦାନକୁ ଢେର୍ ପ୍ରଂଶସା କରିଛନ୍ତି।