ଛତ୍ରପୁର,୧୭।୭: ମଧ୍ୟପ୍ରଦେଶରେ ଏକ ଆଶ୍ଚର୍ଯ୍ୟଜନକ ଘଟଣା ଦେଖିବାକୁ ମିଳିଛି। ଜଣେ ରୋଗୀଙ୍କ ପେଟରୁ ଡାକ୍ତର ୩୩ ପ୍ରକାରର ଜିନିଷ ବାହାର କରିଥିବା ଜଣାପଡ଼ିଛି। ସୂଚନାଯୋଗ୍ୟ, ଛତ୍ରପୁର ଇଶାନଗରରେ ରହୁଥିବା ଯୋଗେଶ ଠାକୁର(୩୦)ଶିକ୍ଷକତା କରନ୍ତି। ତେବେ ହଠାତ୍ ଯୋଗେଶଙ୍କୁ ପେଟରେ ଯନ୍ତ୍ରଣା ଅନୁଭବ ହେବାରୁ ଚିକିତ୍ସା ପାଇଁ ପରିବାର ଲୋକେ ତାଙ୍କୁ ଏକ ଘରୋଇ ହସ୍ପିଟାଲକୁ ନେଇଥିଲେ। ସେଠାରେ ଡାକ୍ତର ଯୋଗେଶଙ୍କ ଏକ୍ସରେ କରିଥିଲେ। ସେହି ସମୟରେ ତାଙ୍କ ପେଟରେ କିଛି ଧାତବ ପଦାର୍ଥ ରହିଥିବା ଜଣାପଡ଼ିଥିଲା। ଏହାପରେ ଡାକ୍ତର ଯୋଗେଶଙ୍କ ଅପରେଶନ କରିଥିଲେ। ୬ ଘଣ୍ଟା ଧରି ଚାଲିଥିବା ଏହି ଅପରେଶନ ସମୟରେ ତାଙ୍କ ପେଟରୁ ପେନସିଲ୍, ପ୍ଲାଷ୍ଟିକ ବୋତଲ, ପେନ୍, ଛୁଞ୍ଚି, ଡାମ୍ଫଣ, କରତ, ବ୍ଲେଡ ଓ ଚମଡା ବେଲ୍ଟ ଖଣ୍ଡ ସମେତ ୩୩ ପ୍ରକାର ଜିନିଷ ବାହାରିଥିଲା। ଏହାକୁ ଦେଖି ଡାକ୍ତରମାନେ ଚକିତ ହୋଇପଡ଼ିଥିଲେ। ଯୁବକଙ୍କ ପେଟକୁ ଏସବୁ ଜିନିଷ କିଭଳି ଆସିଲା ଏବଂ ଅନ୍ତଃନଳୀ କିମ୍ବା କୌଣସି ଅଙ୍ଗରେ କିପରି କିଛି କ୍ଷୟକ୍ଷତି ହୋଇନାହିଁ ସେନେଇ ଆଶ୍ଚର୍ଯ୍ୟ ହୋଇପଡ଼ିଛନ୍ତି ଡାକ୍ତର। ତେବେ ପରିବାର ଲୋକଙ୍କ କହିବା ଅନୁସାରେ ନିଶାସକ୍ତ ଅବସ୍ଥାରେ ସେ ଏହି ଜିନିଷଗୁଡିକୁ ୬ମାସ ପୂର୍ବରୁ ଖାଉଥିଲେ। ଏନେଇ ପରିବାର ଲୋକଙ୍କୁ ଯୁବକ ଜଣଙ୍କ ଜଣାଇଥିବା ବେଳେ ତାଙ୍କ କଥାକୁ କେହି ବିଶ୍ୱାସ କରି ନ ଥିଲେ।