ୟା ଭିତରେ ତିନିବର୍ଷ ବିତିଗଲାଣି। ହେଲେ ଗୋଟିଏ ଯୋଡ଼ିକୁ ବଡ଼ ପରଦାରେ ଦେଖିବାକୁ ମିଳି ନ ଥିଲା। କାରଣ କ’ଣ ?
ସଞ୍ଜୟ ନାୟକଙ୍କ ନିର୍ଦ୍ଦେଶନାରେ ‘ମୁଁ ସପନର ସୌଦାଗର’ରେ ଏହି ଯୋଡ଼ି ପ୍ରଥରଥର ପାଇଁ ସ୍କ୍ରିନ୍ ଶେୟାର କରିଥିଲେ। ୟା ଭିତରେ ସେମାନେ ଏକାଠି ୧୭ଟି ସିନେମାରେ ଅଭିନୟ କରିସାରିଲେଣି। ଏଥର ହୁଏତ ଅନେକେ ଜାଣିଯିବେଣି ଯେ, ଏଠାରେ କାହା କଥା ଉଲ୍ଲେଖ କରାଯାଉଛି। ହଁ, ସେହି ରୋମାଣ୍ଟିକ୍ ଯୋଡ଼ି ହେଲେ ସବ୍ୟସାଚୀ-ଅର୍ଚ୍ଚିତା। ତିନିବର୍ଷର ଗ୍ୟାପ୍ ପରେ ଏହି ଯୋଡ଼ି ପୁଣି ଥରେ ବଡ଼ ପରଦାରେ ମୁହଁ ଦେଖାଇବେ। ଚଳଚ୍ଚିତ୍ରଟି ହେଲା ‘ଅଭିମାନ’। ସୀତାରାମ ଅଗ୍ରଓ୍ବାଲଙ୍କ ପ୍ରଯୋଜିତ ଏହି ସିନେମାଟି ଚଳିତ ରଥଯାତ୍ରା ଅବସରରେ ପରଦା ଉପରକୁ ଆସିବାର ଯୋଜନା ରହିଛି। ଏହି ଯୋଡ଼ି ସମ୍ପର୍କରେ ସବ୍ୟସାଚୀ କହନ୍ତି, ‘ସବ୍ୟ-ଅର୍ଚ୍ଚିତା ଯୋଡ଼ି ଏପର୍ଯ୍ୟନ୍ତ ଅଭିନୟ କରିଥିବା ୧୭ ସିନେମାରୁ ୭-୮ଟି ଦର୍ଶକଙ୍କୁ ବେଶ୍ ପ୍ରଭାବିତ କରିଛି। ‘ଛାତି ତଳେ ଡିଂ ଡଙ୍ଗ୍’ ଏବଂ ‘ହେଲା ମତେ ପ୍ରେମ ଜ୍ୱର’ ପରେ ଅର୍ଚ୍ଚିତା ଏବଂ ମୁଁ ନିଷ୍ପତ୍ତି ନେଲୁ ଯେ ଏଣିକି ଭଲ କାହାଣୀକୁ ଆଧାର କରି ନିର୍ମିତ ହେଉଥିବା ସିନେମାରେ ହିଁ ଅଭିନୟ କରିବୁ। ଏପରି ନିଷ୍ପତ୍ତିର ତିନିବର୍ଷ ପରେ ଥରେ ମୋତେ ସୀତାରାମ ଅଗ୍ରଓ୍ବାଲ କହିଲେ, ଆରେ ଅର୍ଚ୍ଚିତା ଆଉ ତୁମ ଭିତରେ ପାଟିତୁଣ୍ଡ ହୋଇଛି କି? କାହିଁ ଆଉ ଏକାଠି ରୋଲ୍ କରୁନ? ମୁଁ ଉତ୍ତର ଦେଲି-ଭଲ କାହାଣୀ ମିଳିଲେ ହିଁ ଏକାଠି ରୋଲ୍ କରିବୁ। ତା’ପରେ ସେ ମୋତେ ଆଲୋଚନା ପାଇଁ ଡାକି ‘ଅଭିମାନ’ କାହାଣୀ ବିଷୟରେ ସୂଚନା ଦେଲେ ଏବଂ ତା’ପରେ ମୋତେ ଯେମିତି ଖୋଜିଲା ଚିଜ ମିଳିଯାଇଥିଲା। କମ୍ପ୍ୟୁଟର ଯେମିତି ହ୍ୟାଙ୍ଗ୍ ହେଲେ ଭାଇରସ୍ କ୍ଲିନ୍ କରାଯାଏ, ଠିକ୍ ସେମିତି ଏହି ଫିଲ୍ମ ଓଡ଼ିଆ ସିନେମାର ହ୍ୟାଙ୍ଗ୍ ଅବସ୍ଥାକୁ ନିଶ୍ଚୟ ବଦଳାଇଦେବ।’ ସିଦ୍ଧାର୍ଥ ମ୍ୟୁଜିକ୍ ବ୍ୟାନରରେ ନିର୍ମିତ ‘ଅଭିମାନ’ର ନିର୍ଦ୍ଦେଶନା ଦେଇଛନ୍ତି ମୃତ୍ୟୁଞ୍ଜୟ ସାହୁ (ବାପି)।