ଅନୁଗୋଳ ଅଫିସ, ୧।୫ – ଅନୁଗୋଳ ସହର ଉପକଣ୍ଠ କରଡ଼ାଗାଡ଼ିଆ ଭାଟିରେ ଚୋରା ମଦ କାରବାର ଅଭିଯୋଗରେ ଗିରଫ ହୋଇ ଜେଲ୍ରେ ଥିବା ଜଣାଶୁଣା ବ୍ୟବସାୟୀ ବିକ୍ରମ କିଶୋର ସାହୁଙ୍କ ସମ୍ପର୍କରେ ପ୍ରଶାସନ ପକ୍ଷରୁ ଅଧିକ ଖୋଳତାଡ଼ କରାଯାଉଛି। ଭାଟି ଲାଇସେନ୍ସ ରଦ୍ଦ ପାଇଁ ଅନୁଗୋଳ ପୋଲିସ ପକ୍ଷରୁ ଜିଲାପାଳଙ୍କୁ ସୁପାରିସ କରାଯାଇଥିବା ବେଳେ ଅବକାରୀ ବିଭାଗ ଦେଇଥିବା ରିପୋର୍ଟ ଉପରେ ପ୍ରଶାସନ ତର୍ଜମା କରୁଥିବା ସୂଚନା ମିଳିଛି। ତେବେ ଗିରଫ ହେବା ପରଠାରୁ ବ୍ୟବସାୟୀ ବିକ୍ରମ ଅସୁସ୍ଥ ଥିବା ଦର୍ଶାଇ ଆସୁଥିବା ବେଳେ ଏବେ ତାହାକୁ ଦେଖାଇ ପରିବାର ଲୋକମାନେ ବେଲ୍ ପାଇଁ ଉଦ୍ଦ୍ୟମ କରୁଥିବା ଜଣାପଡ଼ିଛି। ଏପରି କି ଗିରଫ ପରେ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିବା ବିକ୍ରମଙ୍କୁ କଟକ ମେଡିକାଲ ସ୍ଥାନାନ୍ତର ପାଇଁ ସେତେବେଳେ ବିଭିନ୍ନ ମହଲରୁ ଚାପ ପକାଯାଇଥିଲା ବୋଲି ଅଭିଯୋଗ ହେଉଛି। ଅନ୍ୟପକ୍ଷରେ ତାଙ୍କ ନାମରେ ଥିବା ଦେଶୀ ଭାଟି ଗୁଡ଼ିକ ଉପରେ ପୋଲିସ, ଅବକାରୀ ବିଭାଗ କଡ଼ା ନଜର ରଖିଛି। କେବଳ କରଡ଼ାଗାଡ଼ିଆ ଭାଟିରେ ଏପରି ଚୋରା ମଦ ପ୍ରସ୍ତୁତି ଚାଲିଥିଲା ନା ତାଙ୍କ ମାଲିକାନାରେ ଥିବା ଆଉ କେଉଁ ଭାଟି ଏଥିରେ ସାମିଲ ଥିଲା ତାହାର ଖୋଳତାଡ଼ ପ୍ରଶାସନ କରୁଛି। ଅବକାରୀ ବିଭାଗର ରିପୋର୍ଟ ହସ୍ତଗତ ହୋଇଥିବା ଅନୁଗୋଳ ଜିଲାପାଳ ମନୋଜ କୁମାର ମହାନ୍ତି କହିବା ସହ ଲାଇସେନ୍ସ ରଦ୍ଦ ସମ୍ପର୍କରେ ତର୍ଜମା କରାଯାଉଥିବା ସୂଚନା ଦେଇଛନ୍ତି। ତେବେ ଜେଲ ସମ୍ମୁଖରେ ବିକ୍ରମଙ୍କ ସମର୍ଥକଙ୍କ ଭିଡ଼ ବଢ଼ୁଥିବାରୁ ଆବଶ୍ୟକ ପଡ଼ିଲେ ପାଟ୍ରୋଲିଂ ବଢ଼ାଯିବ ବୋଲି ଏସ୍ପି ଜଗମୋହନ ମୀନା ପ୍ରକାଶ କରିଛନ୍ତି।